رێڤه‌به‌رێ گشتيێ خانه‌نشينيێ:پاره د سندۆقا خانه‌نشينيێ دا نه‌مايه
ئه‌ڤرۆنيوز:
رێڤه‌به‌رێ گشتيێ خانه‌نشينيێ ل هه‌رێما كوردستانێ، حازم ئيسماعيل، راگه‌هاند، پارێ برينا مووچێ خانه‌نشينيێ دسندۆقا خانه‌نشينيا دا نه‌مايه.
حازم ئيسماعيل گۆت ژى” زه‌حمه‌ته مووچێ خانه‌نشينێن كوردستانێ بچيته ب سه‌ر به‌غدا ڤه، چونكى مووچێ خانه‌نشينێن به‌غدا ژسندۆقا خانه‌نشينيێ دهێته دان، به‌لێ مه ل هه‌رێمێ پاره دوێ سندۆقێ دا نه‌مايه”.
ل دۆر چاره‌نڤيسێ وى پارێ ب ناڤێ برينا خانه‌نشينێ، ناڤبرى زێده‌تر بۆ باس گۆت” ئه‌و پاره ل شوونا برينا مووچه‌ى بۆ خانه‌نشينيێ هاتيه برن ونه‌چوويه دسندۆقا خانه‌نشينيێ دا، به‌لكو ل گه‌نجينێ مووچه هاتيه دان وژگه‌نجينێ ژى هاتيه برن، له‌وما پاره هه‌ر ل ده‌ف حوكمه‌تێ يێ ماى”.
عزه‌ت سابر، سه‌رۆكێ لژنا دارايى ل په‌رله‌مانێ كوردستانێ، گۆت”ل دووڤ دووڤچوونا مه، 7% ژ مووچێ هه‌موو فه‌رمانبه‌ران هاتيه برين ب ناڤێ خانه‌نشينيێ، به‌لێ پاره نه‌هاتيه دان بۆ سندۆقا خانه‌نشينيێ ويێ هاتيه مه‌زاختن، پێدڤى بوو ژبلى وێ 7%، حوكمه‌تێ 12% خستبا دناڤ وێ سندۆقێ دا، به‌لێ ئه‌وژى نه‌هاتيه كرن”.
وى په‌رله‌مانتارى گۆت ژى” ل سالا 2014، په‌رله‌مانێ كوردستانێ قانوونا خانه‌نشينيا عيراقى په‌سه‌ندكر، بۆ وێ چه‌ندێ ل هه‌رێما كوردستانێ بهێته بجهئينان، به‌لێ حوكمه‌تا هه‌رێمێ گۆت ئه‌م نه‌شێين بجهبينين”.
