تۆركیا دێ سێیه‌م ده‌رگه‌هێ بازرگانی ل گه‌ل پارێزگه‌ها دهۆكێ ڤه‌كه‌ت
ئه‌ڤرۆ نيوز
وه‌زیرێ بازرگانی و گۆمركێن توركیا راگه‌هاند كو سێیه‌م ده‌رگه‌هێ سنووری دێ ل گه‌ل هه‌رێما كوردستانێ هێته ڤه‌كرن، ده‌زگه‌هێن ئێمناهی ل زاخۆ ئاشكرا دكه‌ن كو ئه‌و ده‌رگه‌هه دكه‌ڤیته دناڤبه‌را چیایێ باكوور و رووبارێ دیجله دا، به‌لێ هێشتا چو بریارێن فه‌رمی نینن. ، رێڤه‌به‌رێ خالا سنوری یا سه‌رزێری سه‌ر قه‌زا ئامێدی ڤه ئاشكرا دكه‌ت كو ل سالا بۆری ل ده‌رگه‌هێ سه‌رزێری دا 176 هزار كه‌سان ب مه‌ره‌ما سه‌ره‌دان و گه‌شتیاریێ د ده‌رگه‌هێ سه‌رزێری دا هاتن و چوون كریه.
ژێده‌ره‌كێ ئێمناهیێ ل قه‌زا زاخۆ تایبه‌ت بۆ ئه‌ڤرۆ راگه‌هاند، هه‌تا نها ب تنێ دوو ده‌رگه‌هێن سنووری یێن سه‌ره‌كی ل گه‌ل وه‌لاتێ تۆركیا هه‌نه، به‌لێ هه‌تا نها چو بریار بۆ ڤه‌كرنا ده‌رگه‌هێ سێی یێ سنوورێ ل گه‌ل وه‌لاتێ تۆركیا نه‌هاتینه كرن و ب تنێ به‌ری ساله‌كێ به‌حسێ ڤه‌كرنا ڤی ده‌رگه‌هی هه‌بوویه و چو بریارێن فه‌رمی نه‌هاتیه دان.
خویاژی كر كو ئه‌و ده‌رگه‌هێ سنوورێ یێ وه‌زیرێ بازرگانی یێ توركیا به‌حس دكه‌ت دكه‌ڤیته دناڤه‌را چیایێ باكۆرێ كوردستانێ و رووبارێ دیجله دا و ژ مێژه‌یه به‌حسێ ڤه‌كرنا وی ده‌رگه‌هی هاتیه كرن، به‌لێ هێشتا چو نڤیسارێن فه‌رمی و گفتۆگۆ ل گه‌ل وه‌لاتێ توركیا نه‌هاتینه كرن ده‌رباره‌ی ڤه‌كرنا وی ده‌رگه‌هی و ئاریشه ل وی جهی هه‌نه ژ به‌ر هه‌بوونا گه‌ریلایێن په‌كه‌كێ ل نێزیك وی جهی.
خویاژی كر كو به‌حس ل وێ یه‌كێ دهێته كرن كو دوور نینه ئه‌و ده‌رگه‌هێ نوو هه‌كه بهێته ڤه‌كرن ل كۆمه‌لگه‌ها باجیكا بیت كو دكه‌ڤیته نێزیكی كۆمه‌لگه‌ها ئیبراهیم خه‌لیل، به‌لێ هه‌تا نها ژی هێشتا حكوومه‌تا هه‌رێما كوردستانێ ل دوور ڤه‌كرنا وی ده‌رگه‌هی نه‌هاتیه ئاگه‌هداركرن.
ئاشكرا ژی كر كو نها ل ده‌رگه‌هێ فه‌رمی یێ ئیبراهیم خه‌لیل رۆژانه نێزیكی 2000 ترۆمبێلێن تایبه‌ت و بارهه‌لگر هاتن و چوونێ دكه‌ن.
رێڤه‌به‌رێ ناحیا كانی ماسی ژی راگه‌هاند، رۆژانه پتر ژ 1500 هاوولاتیان و 150 ترۆمبێلان هاتن و چوونێ ل ده‌رگه‌هێ سه‌رزێری یێ سنووری دناڤبه‌را وه‌لاتێ توركیا و هه‌رێما كوردستانێ دا دكه‌ن و خه‌لكێ باكوور ژی دخواز ئه‌ڤ ده‌رگه‌ه 24 ده‌مژمێران یێ ڤه‌كری بیت.
ل رێككه‌فتی 2/9/2015 ب شێوه‌یه‌كێ فه‌رمی ده‌رگه‌هێ سنووری یێ سه‌رزێری ل ناحیا كانی ماسێ دناڤبه‌را وه‌لاتێ توركیا و هه‌رێما كوردستانێ دا هاتیه ڤه‌كرن و د حه‌فتیێ دا ب تنێ پێنچ رۆژان دهێته ڤه‌كرن و هه‌ر رۆژ ب تنێ (9) ده‌مژمێران دهێته ڤه‌كرن، به‌لێ كوردێن باكووری هه‌رده‌م داخواز ژ مه دكه‌ن ئه‌ڤ ده‌رگه‌هه به‌رده‌وام یێ ڤه‌كری بیت.
ئاشكرا ژی كر، هه‌تا نها ئه‌ڤ ده‌رگه‌هه پتر بۆ گه‌شتیاریێ و گه‌شتیاران یێ ڤه‌كریه و پێدڤی بۆ بازرگانیێ ژی یێ ڤه‌كری بیت و رێ بهێته دان خه‌لكێ هه‌رێمێ و كوردێن باكووری بازرگانیێ ژی د ڤی ده‌رگه‌هی دا بكه‌ن و گۆتیشی: رۆژانه 1500 هاوولاتی و نێزیكی 150 ترۆمبێلان هاتن و چوونێ د ڤی ده‌رگه‌هی را دكه‌ن.
دیار كر: “نوكه حوكمه‌تا هه‌رێما كوردستانێ كوژمێ 500 ملیون دیناران ته‌رخان كرینه بۆ دانانا دیزاینا به‌رفره‌هكرنا ریێا گۆمركا سه‌رزێری بۆ ده‌شتا دوورێ و ژ وێرێ بۆ ئه‌لكیشكێ و ئه‌ڤ پرۆژه دێ ب دوو قوناغان هێته چێكرن، هه‌ر ده‌مێ ئه‌ڤ دیزاینه ب دووماهی هات دێ ده‌ست ب پێكرنا رێكی هێته كرن ژ سه‌رزێری هه‌تا ئه‌لكشكی و دهۆكێ و ل دووڤ دا ژی دێ ده‌ست ب چێكرنا تۆنیلا چیایێ مه‌تینا هێته كرن ئه‌و تۆنێله ژی دێ ب دوو قوناغان هێته دروستكرن”.
ئاشكه‌را ژی كر: “نوكه ئه‌و كه‌سێن هاتن و چوونێ ل ده‌رگه‌هێ سنۆری یێ سه‌رزێری دكه‌ن دشێن پتر ژ جاران كه‌لوپه‌ل ل گه‌ل خوه ببه‌ن ژ هه‌رێما كوردستانی بۆ وه‌لاتی توركیا، ئه‌ڤ چه‌نده ژی پشتی مه داخواز ژ وه‌لاتی توركیا كری وان رازیبوونا خوه ل سه‌ر كریه ب تنی د سالا بۆری دا ل 2017 ل ده‌رگه‌هێ سه‌رزێری دا 176 هزار كه‌سان ب مه‌ره‌ما سه‌ره‌دان و گه‌شتیاریێ د ده‌رگه‌هێ سه‌رزێریدا هاتن و چوون كریه ژ هه‌رێما كوردستانێ بۆ وه‌لاتی توركیا و ژ توركیا بۆ كوردستانێ”.
عیرفان سلێمان، رێڤه‌به‌رێ خالا سنوری یا سه‌رزێری سه‌ر قه‌زا ئامێدی دیار كر: “ل گۆری رێكه‌ڤتنا ناڤبه‌را هه‌رێما كوردستانێ و توركیا دا هاتیه كرن ده‌واما خالا سنوری یا سه‌رزێری هاته زێده‌كرن و بهنڤه‌دانا نێڤرۆ ژی هاته كێمكرن دا پتر رێڤینگ هاتن و چوونێ بكه‌ن”.
رێڤه‌به‌رێ خالا سنوری یا سه‌رزێری ئاشكه‌را كر: “پشتی مه سه‌ره‌دانا چه‌لی و وانی كری و دانوستاندن دگه‌ل توركیا هاتینه كرن ل گۆری رێكه‌ڤتنا ناڤبه‌را هه‌رێما كوردستانێ و توركیا دا ده‌واما خالا سنوری یا سه‌رزێری هاته زێده‌كرن.
