بارزانى: حوكمه‌تا عيراقێ به‌رپرسه ژ قه‌ره‌بووكرنا خه‌لكێ هه‌له‌بچه
ئه‌ڤرۆ نيوز:
مه‌سعود بارزانى راگه‌هاند كو ده‌وله‌تا عيراقێ به‌رپرسه ژ قه‌ره‌بووكرنا كه‌سوكارێن شه‌هيدێن كيميا بارانا هه‌له‌بچه.
مه‌سعود بارزانى ب هه‌لكه‌فتا سالرۆژا كيميا بارانكرنا هه‌له‌بچه ل ژمارا خوه يا تايبه‌ت ل تۆڕا جڤاكى يا تويته‌رى سه‌ره‌راى هه‌ڤخه‌مى هنارتن بۆ كه‌سوكارێن شه‌هيدان، راگه‌هاند كو مه‌ينه‌تيێن كوردان هه‌ر د به‌رده‌وامن.
بارزانى راگه‌هاند ژى كو ئه‌و كاره‌ساتا ب سه‌رێ گه‌لێ كوردستانێ ل هه‌له‌بچه هاتى، “هه‌ر يا ل به‌ر چاڤه و د دلێ مه دايه و ژبير ناكه‌ين”.
هه‌ر وه‌كو بارزانى راگه‌هاندى، هه‌ر چه‌نده حزبا به‌عسا عيراقێ د ده‌سته‌لاتێ دا نه‌مايه، به‌لێ ده‌وله‌تا عيراقێ و حوكمه‌تا نوكه يا وى وه‌لاتى به‌رپرسه ژ تاوانا كيميا بارانكرنا هه‌له‌بچه و قه‌ره‌بووكرنا كه‌سوكارێن شه‌هيدان.
رۆژا 16ى ئادارا 1988ێ حوكمه‌تا عيراقێ ب سه‌رۆكاتيا سه‌دام حسێن و ب سه‌رپه‌رشتيا عه‌لى كيمياوى هه‌له‌بچه كيميا بارانكر و د ئه‌نجام دا پێنج هزار شه‌هيد و 10 هزار بريندار بوون و ب سه‌دان دايك و باب ژ زارۆيێن خوه بێ باربوون كو نوكه ژى 189 زارۆ بێ چاره‌نڤيس ماينه.
