ل سلێمانيێ دژى شاسوار عه‌بدولواحد خوه‌نيشاندانه
ئه‌ڤرۆ نيوز، عه‌زيز هه‌ورامى:
پرۆژێ چاڤى لاند پرۆژه‌كێ گه‌شتيارى يه و ژ لايێ شاسوار عه‌بدولواحد ڤه هاتيه ئاڤاكرن ب رێيا فرۆتنا پشكان، 10 هزار وه‌لاتى بووينه خودان پشك د وى پرۆژه‌ى دا، به‌لێ ژبلى ناڤه‌ك و ژماره‌كێ چو داهاته‌كێ وه‌سان ب ده‌ست ناكه‌ڤيت، ژ به‌ر هندێ نوكه خودان پشكان خوه‌نيشاندان ئه‌نجام داينه و داخوازا مافێن خوه دكه‌ن.
دانا محه‌مه‌د پارێزه‌ر و خودان پشك ل چاڤى لاند بۆ رۆژنامه‌ڤانان راگه‌هاند: شاسوار عه‌بدولواحد مافێ خودانپشكێن چاڤى لاند يێ خوارى و ئاماده نينه ئه‌و داهاتێ د پرۆژه‌ى دا ب ده‌ست دكه‌ڤيت بده‌ته خودان پشكان، نوكه ژ لايێ پۆليسان 70 سكالا ل سه‌ر هاتينه تۆماركرن.
دانا محه‌مه‌د گۆتژى: “ژ لايێ شاسوار عه‌بدولواحد ل رێيا چه‌ند كه‌نالێن تايبه‌ت ب وى ڤه گه‌ف لێ دهێته كرن كو ده‌ستبه‌ردارى پشته‌ڤانيا خودان پشكێن چاڤى لاند ببيت، هه‌كه نه دێ ب خرابى بۆ ڤه‌گه‌ريت”.
ناڤبرى دبێژيت: “د ده‌مه‌كى دا 10 هزار پشكێن چاڤى لاند يێن وه‌لاتيانه و پارێ كاش دايه، نزانن چاوان شاسوار ب تنێ بوويه خودانێ 80% ژ پرۆژه‌ى و ئه‌و رێژا كێم يا دمينيت ژى گه‌له‌ك يا گۆماناوى يه و ديار نامينيت”.
هه‌ر وه‌كو دانا محه‌مه‌د دا زانين خودانێ كۆمپانيا ناليا بۆ فێلكرنێ ل خودان پشكان و خوه ڤه‌دزين د پێدانا مافان، باحس ل وێ دكه‌ت، هه‌موو پشكێن خوه فرۆتينه كۆمپانيا سه‌ما لوئلوئه و گۆت: “ئه‌و كۆمپانيه‌كا وه‌همى يه و چو بنكه و جهـ نينن”.
