ب وێنه و ڤیدیۆ- رێڤاسێن چیایێ گاره‌ى
فوتو و زانیارى ، نه‌وزاد هلۆرى:
چیایێ گاره و چیایێ كوره‌ژار و چه‌ند چیایه‌كێن دى ل سنوورێ قه‌زا ئامێدیێ هه‌نه و زوورترین رێَژه‌یا گژ و گیایێن بهارى تێدا هه‌نه و سالانه هژماره‌كا زورا وه‌لاتیان ب مه‌ره‌ما كۆمكرنا وان قه‌ستا چیایى دكه‌ن و بڤێ رێ داهاته‌كى په‌یدا دكه‌ن.
ئه‌وێن ل خوارێ چه‌ند دیمه‌نێن چوونا وه‌لاتیانه بۆ زنجیره چیایێ گاره‌ى ب مه‌ره‌ما كۆمكرنا رێڤاسان و د به‌ر كۆمكرنا وان دا ده‌ست ب گوتنا سترانان كریه.
سه‌عید محه‌مه‌د، ئێكه ژ وه‌لاتیێن سنوورێ ناحیا شێلادزێ و چوویه چیایێ گوندێ هلورا بۆ كۆمكرنا رێڤاسان بۆ ئه‌ڤرۆ نیوز گۆت”هه‌موو سالان ل وه‌رزێ بهارێ ئه‌م دچینه زنجیره چیایێ گاره‌ى بۆ كۆمكرنا رێڤاسان و هنده‌ك ژ وان رێڤاسان دفروشین و هنده‌كان ژى بۆ مال دئینین و دخوین و رێڤاسان ژبلى كو تامه‌كا خوه‌ش هه‌یه، د هه‌مان ده‌م دا بۆ ساخله‌میا مرۆڤان گه‌له‌ك باشه”.
زێده‌تر گۆت” ئه‌ڤ ساله ژ به‌ر كێم بارینا بارانێ رێڤاس ژیه‌كێ گه‌له‌ك كورت دبه‌ن، ئانكو سپێدێ چێدبن و هه‌تا ئێڤارى یان رۆژا پاشتر ب دووماهى دهێن ، ئه‌ڤه زێده‌بارى كو رێڤاسا ئه‌ڤ ساله گه‌له‌ك یا لاو و جوان نینه، به‌لكو بتنێ هنده‌ك دناڤ دا د لاو و باشن و ئه‌و ژى زور كێمن”.
سه‌عیدى كو ده‌به‌ر چێكرنا خوارنا نیڤرۆ ل شكه‌فته‌كا مه‌زن ستران ژى دگوتن زێده‌تر گۆت ” ده‌ڤه‌رێن چیایى بخوه وه‌كو بنگه‌هه‌كێ ساخله‌میێ یه هه‌كه مرۆڤ سالێ دو یان سێ جاره‌كان قه‌ستا چیایى بكه‌ت و ل گه‌ل خوه ژى كومه‌كا زۆر یا گژ و گیایى ب تایبه‌تى رێڤاس و چۆرین و لیش و هندرش و كارى و كڤاركان بینیت ، كو ب راستى ڤان گژ و گیایان تام و خوه‌شیه‌كا تایبه‌ت هه‌یه و بازارێن ده‌ڤه‌رێ گه‌رم كرینه و وه‌لاتى ژى ب رێیا فروتنا وان داهاته‌كێ بۆ خوه په‌یدا دكه‌ن”.
