ب وێنه – هروبای زیانێن مه‌زن ب چاندن و داروبارێ ده‌ڤه‌را دینارتێ گه‌هاند
ئه‌ڤرۆ نیوز ، نه‌وزاد هلۆرى:
پشتى كو چه‌ند رۆژێن بۆرى پێله‌كا بارانێ و هروبایى ب سه‌ر ده‌ڤه‌را دینارتێ داهاتى ، زیانێن مه‌زن گه‌هاندن داروبارێ فێقى و چاندنێ، وه‌لاتى دخوازن قه‌ره‌بوویا وان بهێته‌كرن.
عه‌كان عه‌بدولسه‌لام، جوتیاره‌كێ گوندێ گومانا یا سه‌ر ب ناحیا دینارتێ یه بۆ ئه‌ڤرۆ نیوز گۆت” چه‌ند رۆژێن بۆرى پێله‌كا بارانێ و هروبایى ب سه‌ر ده‌ڤه‌را دینارته دا هات و زیانێن مه‌زن گه‌هاندن داروبارێ فێقى و كه‌سكاتى و چاندنا ده‌ڤه‌رێ ، ب شێوه‌یه‌كى به‌رهه‌مێ پتريا چه‌م و باغێن داروبارێن فێقى مینا حلیك و مژمژ و هنار و ترى و سێڤ ئێخستنه ئه‌ردى و پووچكر، دیسان گه‌نم و جه‌هـ و باقلك ژى ئێخستنه ئه‌ردى و پووچكریه”.
زێده‌تر گۆت “زێده‌بارى ئێخستنا به‌رهه‌مێ فێقى و داروبارى، دهه‌مان ده‌م دا گه‌له‌ك دار ب خوه ژى ئێخستنیه و زیان گه‌هاندینه وان و خواركرینه و هنده‌ك ژ وان شتلێن كو ئه‌ڤ ساله هاتینه چاندن هاتینه شكاندن، ديسا زیان گه‌هاندینه هنده‌ك خانىان ژى”.
شه‌مال عه‌بدوللا، وه‌لاتیه‌كێ گوندێ بامشمش یێ سه‌ر ب هه‌مان ده‌ڤه‌رێ یه ، بۆ ئه‌ڤرۆ نیوز گۆت”هروبایێ چه‌ند رۆژێن بۆرى زیان گه‌هاندینه پتريا گوندێن ده‌ڤه‌را دینارته و گوندێ بامشمش ژى ئێكه ژ وان گوندێن كو زیان گه‌هشتیێ ، دخوازین حوكمه‌ت هاریكاریا جوتیار و وه‌لاتیان بكه‌ت داكو بكارن ل سه‌ر كاروبارێن خوه به‌رده‌وام بن، ژ به‌ركو زیانێن مه‌زن گه‌هشتیه جوتیاران و به‌رهه‌مێ وان یێ داروبار و فێقى و چاندنێ”.
زێده‌تر گۆت” سالا بۆرى ژى ب هه‌مان شێوه هروبایى زیانێن مه‌زن گه‌هاندن جوتیار و وه‌لاتیان و هه‌تا نها ژى حوكمه‌ت و لایه‌نێن شوله‌ژێ چو قه‌ره‌بویا وه‌لاتیان نه‌كریه ، هه‌ر زیانه‌كا ژ ئه‌نجامێ هروبایى و به‌فر و بارانان بگه‌هیته چاندنێ زیانێن مه‌زن دگه‌هن جوتیاران”.
