رازیبوون ل سەر به‌لاڤكرنا 207 پارچێن ئەردی بۆ شەهیدان هاتیە
ئەڤرۆ، سالار دۆسكی:
رێڤەبەرێ گشتیێ كاروبارێن شەهید و ئەنفالكریان ل پارێزگەها دهۆكێ دیاركر كو (1011) كچ و كورێن شەهیدان خێزان پێكئینایە و چاڤەرێ بەخشینا پێكئینانا خێزانێ نە كو 5 ملیار و 55 ملیۆن دینار بووینە و ئەڤە بۆ سالێن(2013/2014/2015/2016/2017)
رەجه‌ب ئیبراهیم، رێڤەبەرێ گشتیێ كاروبارێن شەهید و ئەنفالكریان ل پارێزگەها دهۆكێ بۆ ئەڤرۆنيوز گۆت” هژمارا قوتابیێن بۆ زانكۆ و پەیمانگەهێن حكومی بۆ سالا بۆری هاتینە ورەگرتن (205) قوتابی بووینە ب كوژمێ411 ملیۆن و 502 هزار دینار بووینە، هەروه‌سا ل سالا بوۆری قوتابیێن ل زانكۆ وپه‌يمانگه‌هێن ئەهلی خواندین ل پارێزگەهێ هاتینە وەرگرتن 697 قوتابی بووینە ب كوژمێ دو ملیار و 706 ملیۆن و 91 هزار دیناران بووینە”.
گۆت ژی” رازیبوونا ل سەر دانا پارچێن عەردی بۆ هەژمارەكا خێزانێن شەهیدان هاتیە و207 خێزانان هەتا نوكە وەرنەگرتینە، دیسا بۆ (30) كەسان پازدە ملیۆن بۆ چارەسەریا نەخوشیان هاتینە مەزاختن ژلایێ رێڤەبەریا مە ڤە، 22 ملیۆن دینار ل سەر دو گه‌رێن نەخوه‌شان هاتینە بەلاڤكرن كو 31 كەس بووینە.