به‌ربژارێ سه‌رۆك وه‌زیرێن عیراقێ هاتە دیارکرن
ئەڤرۆ نیوز ، زنار تۆڤی:
هێز و پارتێن سه‌ره‌كی یێن شیعی ل عیراقێ ل سه‌ر به‌ربژارێ سه‌رۆك وه‌زیرێن عیراقێ رێككه‌فتینه و ئەو د چاڤه‌رێ نە پشتی هه‌لبژارتنا سه‌رۆك كۆماری ئەو پۆستە بهێتە راگه‌هاندن.
هه‌ڤپه‌یمانیا بینا یا هادی عامری و نوری مالكی رێككه‌فتنا خوه ل گه‌ل هه‌ڤپه‌یمانیا چاكسازی و ئاڤه‌دانكرنێ یا موقتەدا سه‌دری و عه‌بادی ل دۆر پۆستێ سه‌رۆك وه‌زیری راگه‌هاندیە و دیاركر، کو به‌ربژارێ سه‌رۆك وه‌زیرێن عیراقێ دێ پشتی هه‌لبژارتنا سه‌رۆك كۆماری ب رەنگەکێ راسته‌وخۆ هێتە راگه‌هاندن.
د هەمان دەمدا عامر ئه‌لفایز په‌رله‌مانتارێ هه‌ڤپه‌یمانیا بینا راگه‌هاندیە، کو لدووڤ رێككه‌فتنا ده‌ستپێكی ئەو به‌ربژارێ بۆ سه‌رۆك وه‌زیریێ رێككه‌فتن ل سه‌ر هاتیه كرن، ژ هه‌ڤپه‌یمانیا فەتح و سائیرون نینه، به‌لكو ب شێوەکێ ل هەڤهاتن هاتیه ده‌ستنیشان كرن.
هەروەسا نوکە ئالیێن شیعی به‌حسێ عادل عه‌بدولمه‌هدی دکەن بۆ وەرگرتنا پۆستێ سه‌رۆك وه‌زیران، دیسا پشتی عه‌بادی خوه ژ هه‌ڤركیێ ڤه‌كێشای، هه‌ڤپه‌یمانیێن فەتح و سائیرون ژی ئاماژه ب هندێ كریه، کو ئه‌و ل سه‌ر عادل عه‌بدولمه‌هدی رازیبووینه بۆ وەرگرتنا پۆستێ سەرۆک وەزیران.
