زیانێن بیڤەلەرزا رۆژهەلاتێ کوردستانێ دیار بوون
ئەڤرۆ نیوز، هۆشەنگ تاجر:
ئەڤرۆ سپێدێ ل باژێرێ خوێ و قەزا قوتور ل رۆژهەلاتێ کوردستانێ د ئەنجاما بیڤەلەرزەکا ب هێز دا گەلەک کەس بریندار بووینە و خانیێن ب دەهان وەلاتان ژی خراب بووینە.
بەهمەن تاجر وەلاتیێ کورد ل باژێرێ خوێ یێ رۆژهەلاتێ کوردستانێ بۆ ئەڤرۆ نیوز دیار کر کو ناڤەندا بیڤەلەرزێ باژێرێ خوێ بوویە و هێزا وێ ژی ٥.٧ بوویە و ل گۆر دەزگەهێن راگەهاندنا ئیرانێ نێزیکی سعەت ٩ سپێدێ بیڤەلەرزە روو دایە و گۆت: (هەتا نها ٤٠ کەس بریندار بووینە و ب سەدان خانیێن وەلاتیان ل قوتورێ و گوندێن سەر ب وێ خراب بووینە، لێ هەتا نها ناهێتە زانین کا کەسێ جانێ خوە ژ دەست دایە یان نە).
ناڤهاتی راگەهاند ژی نها تیمێن هەوارهاتنێ ل قوتورێ و دەوروبەرێن وێ هاریکاریا وەلاتیان دکەن، وەلاتیێن بریندار ژی ل نەخوشخانێن قوتور و خوێ چارەسەریا پێدڤی بۆ وان دهێتە کرن و بەرپرسێن دەولەتێ ژی سۆز داینە وەلاتیان کو دێ وان قەرەبۆ کەن.