تۆپخانێن سۆپایێ تورکی گوندێ ئۆرمانا تۆپ باران کر
ئەڤرۆ نیوز، زنار تۆڤی:
ئەڤرۆ پێنجشەمبی، ل دەمژمێر 5:10 خولەکی پشتی ئێڤاری، تۆپخانێن سۆپایێ تورکی دەردورا گوندێ ئۆرمانا ل ناحیا کانی ماسێ یێ سەر بە قەزا ئامێدیێ ڤە تۆپباران کریە و ترسەکا مەزن ل دەف ئاکنجیێن گوندی پەیدا کریە.
زێرەڤان ئاکنجیەکێ گوندێ ئۆرمانایە بۆ ئەڤرۆ نیوز دیار کر: ل دەمژمێر 5:10 خولەک تۆپخانێن سۆپایێ تورکی دەردورا گوندێ مە تۆپ باران کریە و ئەو جهێ تۆپ ڤێکەفتین 500 مەتران نێزیکی مالانە و پرچکێن وان تۆپان ب نێزیکی مالان کەفتینە و دەنگەکێ مەزن ژێ دهات و ترس ل دەف خەلکێ گوندی پەیدا کریە.
ناڤهاتی گۆت ژی: ژ ئەنجامێ وێ تۆپ بارانێ ئاگرەکێ مەزن بەربوویه رەز و زەڤیێن خەلگێ گوندی و هەتا نوکە رێژەکا مەزن یا دارستانێ ژی هاتیە سۆتن، ژ ئەنجامێ تۆپ بارانێ ئەم نەشێین بچین ئاگری ب ڤەمرینین و ب ڤێ چەندێ دێ زیانەکا مەزن گەهیتە خەلکێ گوندی.
