بۆ باشترکرنا کارێ چاندنێ پێدڤیە ل وەرزێ پاییزێ جۆتیار ڤان گاڤان بهاڤێژن
ئەڤرۆ نیوز، زنار تۆڤی:
گرنگە ئەڤ كريارە د وەرزێ پاییزێ دا بهێنە كرن، ل سەر وان داروبارێن بەلگێن خوە دوەرینن، داکو ل وەرزێ بهارێ ئەڤ چەندە ببيتە بارسڤکیەک بۆ جوتياران، لەوما یا پێدڤیە جۆتیار د ڤی وەرزی ڤان گاڤان بهاڤێژن، ژ پێخەمەت بشێت بەرهەمەکێ باش بەرهەم بینن.
محەمەد عەبدولرەحمان بەرواری، رێڤەبەرێ ڤەکۆلینین چاندنێ ل پارێزگەها دهۆکێ، بۆ ئەڤرۆ نیوز دیار کر: د وەرزێ پاییزێ دا پێدڤیە جۆتیار زەڤیێن خوە یێن چاندنێ پاقژ بکەن، ژ بەرمايكێن بەرهەمى و بەلگێت وەريایی و باشترە وان بەلگ و بەرمایکان ب سۆژن، چونکی ئەڤە دێ بیتە ئەگەرێ ژناڤبرنا نەساخيا و مێش و موران ژی، هەروەسا پێدڤیە جۆتیار کژ و گیای ب درویت و ب سۆژیت، ب مەرەما ژناڤبرنا ئەگەرێن نەساخيا و نەمانا مێش و موران ئەوێن ل وەرزێ زڤستانێ ل سەر گژ و گیای دمينن.
ناڤهاتی گۆت ژی: د پاییزێ دا باشترە ئەرد بهێتە زبل کرن ب زبلێ گیانەران، ب مەرجەکێ ئەو زبل هاتبیتە رزاندن بۆ دەمێ دو سالان، دیسان باشترە هەر سێ سالان جارەکێ، زبلێ گیانەران ب کار بینی بۆ چاندنێ، نابیت جۆتیار وی زبلی بکەتە بەر وان دارێن ژیێ وان ژ سێ سالان کێمتر بیت، هەروەسا زبل کرنا زەڤیێن چاندنێ ب زبلێ دەستکرد ژی کارەکێ باشە، لێ دڤێت لدووڤ پێدڤیێن ئاخێ و لدووڤ ژیێ دارێن چاندنێ بیت، دڤێت ئەرد ژی بهێتە کێلان، ب مەرەما بن ئاخكرنا زبلى، هەروەسا بن ئاخکرنا بەلگان و بەرمايکێن داروبارى ژی.
محەمەدی ئەو ژی ئاشکرا کر: باشتره ل دووماهیا وەرزێ پاییزێ، کریارا کەزاختنا داروبارێ چاندنێ بهێتە کرن، بمەرجەکێ پلێن گەرماتیێ نزم ببن، هەروەسا دار چوبیتە د قۆناغا متبوونێ دا، پاشی بەرمايكێن وان دارێن کەزاختی بهێنە کۆم کرن و بهێنە دوورخستن ژ زەڤیێ هەتا كو هشك دبن و پاشی بهێنە سۆتن، هەروەسا باشتره ئەو نەمامێن ژنوو هاتینە چاندن بهێنە گرێدان، داکو ئەو نەمامە بهێتە پاراستن، ژ هرروبایێن ب هێز یێن زڤستانێ، دیسان دوورپێچکرنا قورمێن داران ب گیایی یان ب نایلۆنی، بۆ پاراستنێ ژ گیانەرێن وەکو کێڤریشکان و مشکی و جوردان، داکو قورمێن وان سپی نەکەن، دڤێت ل وەرزێ بهارێ ئەو گیا و نایلۆن بهێنە راکرن و سۆتن.
