رێڤەبەرێ قوتابخانا سارکێ: ھاتن وچوونا قوتابیان ب دا ڤەرستێ بۆ بەلێ زیرەک و سەرکەفتی تر بوون.
شێلادزێ، ئەسعەد رێکانی:
رێڤەبەرێ قوتابخانا سارکێ بەحسێ خاندنا گوندا وئاستەنگ ونەخوش یێن کەفتینە درێیا وان دا و ھەر ل دەستپێکا کارێ ماموستایەتیا وان وخاندنا سەر وی دەمی دکەت و دەتە زانین ژی کو وان ب داڤەرستێ ھاتن وچوون دکر و گەلەک جاران ژی گیانێ وان دکەفتە دمەترسیا ھاتن وچوونێ دا.
شڤان موحسن رێڤەبەرێ قوتابخانا سارکێ بۆ بەرپەرێ پەروەردە و زانکو گوت: قوتابخانا سارکێ دکەڤیتە لایێ دی یێ رووبارێ زیێ مەزن بەرامبەر کومەلگەھا سیریێ یا سەر ب ناحیا شێلادزێ ڤە و بەری قوتابخانە بھێتە دانان زاروکێن گوندی بۆ خاندێ دچوونە خاندنگەھێن سیریێ وھاتن وچوونا وان ژی یا دویر بۆ و گەلەک یا ب مەترسی بوو ژبەرکو ب داڤەرستێ ھاتن وچوون دکر وپاشێ ل سالا ١٩٩٩ێ قوتابخانەک ل گوندێ خاستو ژێری ھاتە ڤەکرن و زاروکێن گوندێ سارکێ چوونە وی گوندی بۆ دەوامێ و پشتی پەروەدا ئامێدیێ ھاتیە دانان ل سالا ٢٠٠٣ێ قوتابخانە ل گوندێ سارکێ ڤەکر ول وی دەمی چ ئاڤاھی نەبوون وخانیەکێ ئاخێ ھاتە دابین کرن بۆ قوتابخانێ.
زیدەتر ژی گوت: ئەو خانیێ مە دەوام تێدا دکر ژسێ ژورا پێکدھات ژ وانا ژورەک بۆ رێڤەبەر و ماموستا و فەرمانبەرا بوو و دوو ژورێن دژی بکاردئینان بو پولێن قوتابیان ژبەر نەبوونا جھی مە بتنێ ھەتا پولا چارێ ھەبوو ئەو ژی پولا ئێکێ ودوێ دپولەکێ ڤەبوو وھەروەسا پولا سیێ وچارێ دپولەکێ دابوون دەمێ وانێ ژی ب نیڤەرو دکر بۆ ھەردو قوناغا وقوتابێن مە دەمێ پولا چارێ ب دووماھی دئینا دچوونە قوتابخانا خاستوو ژێری خاندا پولا پێنجێ وشەشێ تەمام دکر ھەرچەندە ل وی دەمی مە چ ئاڤاھیێن باش ومودرێن نەبوون بەلێ سەرارەی وێ چەندێ قوتابێن مە گەلەک دزیرەک و سەرکەفتی بوون وگەلەک درژد بوون ل سەرخاندنێ وجھێ دل خوشیا مەیە نوکە قوتابێن مەیێن ل کولیژێن بلند دخوینن وھەروەسا ماموستایێن مە ژی تەخسیری نەدکر و گەلەک خوە زەحمەت دا ژبۆ وانە گوتنێ و بلندکرنا ئاستێ قوتابیان و سەراری ڤێ چەندێ ژی رێک وپرێن ھاتن وچوونێ نەبوون بۆ وان گوندا مە گەلەک نەخوشیێن رێکێ یێن دیتن نەچاربوین ھاتن وچوونا مە ب داڤەرستێ بوو گەلەکا ب مەترسی بوو ب تایبەتی دەمێ بھارا ئاڤ بلند دبیت ژیانا مە دمەترسیێ دایە.
