ترس و دو دلی ژ ئالییێ دەروونی و جەستەیی ڤە زیانێ دگەھینیتە قوتابییان
ئەڤرۆ، زنار تۆڤی:
د. محەمەد سەعید کزویی، سەرۆکێ پشکا پەروەردەیا دەروونناسی ل زانکۆیا دھۆکێ، بۆ رۆژناما ئەڤرۆ دیار کرکو ترس و دو دلی د سروشتێ ھەموو کەسان دا ھەیە و لێ ل دەف ھەر ئێکێ ب رێژەکا جۆدا ھەیە، ئەڤ چەندە ژیانێ خۆش دکەت و نەخۆش ژی دکەت، دیسان ئەڤە دبیتە ھوکارەک ژی کو مرۆڤ پێنگاڤێن خوە ب رەنگەکێ سەرکەفتیانە د ژیانێ دا ب ھاڤێژیت و ژیانا خوە ب پارێزیت و ژ وان تشتان دورکەڤیت یێن کو کارتێکرنا ل ژیانا وی دکەن، لێ ھەکە ئەو ترس و دو دلی گەھشتە ئاستەکێ بلند و کاریگەری ل سەر مرۆڤی کر، ل وی دەمی دێ کارتێکرنەکا خراب ل سەر ژیانا مرۆڤی دروست کەت و ئەو بەرنامێن مرۆڤی بۆ ژیانا خوە داناین نەشێت ب دروستی پەیرەو بکەت، چونکی یێ تووشی ترسێ و دو دلیێ بووی.
ناڤھاتی گۆتژی: ھەکە ترس و دو دلی ل دەف قۆتابیان زێدە ببیت، ل وی دەمی ئەو قوتابییە نەشێن کارێن خوە ب دروستی ئەنجام بدەن، چونکی یێن تووشی ڤێ نەخۆشیێ بووین، لەورا دڤێت چارەسەریا وان ژ ئالییێ کەسانێن بسپۆرڤە بھێتە کرن، ژ پێخەمەت جارەکا دی ڤەگەرنە ئاستێ خوە یێ سروشتی، ھەروەسا دو جۆرێن دو دلیێ ھەنە، جۆرەک وەکو ساخلەتەکێ یە لدەف مرۆڤی، کو ئەو ژی ل دەمێ ئەزموونان لدەف قۆتابیان پەیدا دبیت، ھەکە ئەڤ ساخلەتە بەری ھنگێ د ژیانا قوتابی دا ھەبیت، ب تایبەتی دەمێ چوویە قوتابخانێ و چاوانیا سەرەدەریا مامۆستایان ل گەل وی و دیسان ئەو کاودانێن ئەو قوتابی تێدا ژیایی دناڤا قوتابخانێ و جڤاکی دا و ل وی دەمی دێ وی قوتابی ترس و دو دلیەکا مەزن ژ ئەزموونان ھەبیت ول ڤی دەمی دڤێت دووڤچوونەکا باش بۆ وی قوتابی ھەبیت، داکو بزڤریتەڤە ژیانا خوە یا ئاسایی.
د. محەمەد سەعیدی زێدەترژی گۆت: ھەکە ترس و دو دلی ژ ئاستێ نورمال دەرکەفت ل وی دەمی مەژیێ قوتابی ب دروستی کار ناکەت، دێ ھزرێن وی تێکچن، دیسان دێ ژیان و کەسایەتیا قوتابی ژی تێکچیت، ل دەمێ ئەنجامدانا ئەزموونان ژی ئەو قوتابی دێ کەڤیتە د رەوشەکا خراب دا و نەشێت ب رەنگەکێ باش بەرسڤا خوە بدەت و ھەر چەندە دبیت پشتە ئەنجامدانا وان ئەزموونان مرۆڤ پرسیارا ژ وی قوتابی بکەت، دێ بەرسڤێن خوە ب رەنگەکێ دروست دەت، لەورا ل دەمێ ئەنجامدانا ئەزموونان دڤێن سەقایەکێ باش بۆ قوتابیان بھێتە پەیدا کرن، داکو ب ئارامی بەرسڤا خو بدەت، دناڤ جڤاک و خێزانێن مە دا گەلەک کێماسی د پەروەردەکرنا وان دا بۆ زارۆیێن وان ھەنە، ھەر چەندە دەمێ ترس و دو دلی لدەف قوتابیەکێ پەیدا دبیتن یا ب زەحمەتە دایک و باب بشێن سەرەدەریەکا باش ل گەل بکەن، لەورا دڤێت ئەڤ بابەتە ب رێیا بسپۆرێن دەروونی بھێنە چارەسەر کرن، داکو ئەڤ دیاردا ب مەترسی لدەف وان نەمینیت.
مامۆستایێ زانکۆیێ ئەو چەندە ژی گۆت: د جڤاکێ مە دا شێوازێ پەروەردەکرنا دیموکراتیێ و توندوتیژیێ و بەرەلایێ ژی ھەیە، دیسان دناڤ جڤاکێ مە دا خێزان ھندەک تشتان ب کار دئینیت، ئەو تشتە کارتێکرنەکا خراب ل سەر کەسایەتیا مرۆڤی دکەن، لەوما دڤێت خێزان وان تشتێن خراب ب کار نەئینیت، داکو بشێن ب رەمگەکێ باش زارۆکێن خوە پەروەردە بکەن، دیسان دڤێت قوتابخانە و مامۆستا د ھاریکار بن، ژ پێخەمەت بشێن نفشەکێ باش ئاڤا بکەن و وی قوتابی بەرەف ئاستەکێ باش ڤە ببەن، ھەروەسا دڤێت قوتابخانە سەرەدەریەکا ب رێزگرتن ڤە ل وان قوتابیان بگریت، یێن کو ترس و دو دلی لدەف ھەیی، دا کو ئەو قوتابی ژی بشێن خوە ب گونجینن و بگەھنە قووناغێن باش، دیسان دڤێت مامۆستا وێ ھزرێ بکەتن کانێ چەند قۆتابی د پولێ دا ھەنە و ھند جۆرێن رەوشەنبیریێ ل ھەمبەری وان ب کار بینیت، دا کو ئەو ترس و دو دلی ل دەف وان قۆتابیان نەمینیت، ئەوێن ترس و دو دلی ب رێژەکا مەزن لدەف ھەین، ل وی دەمی ژی ئەو قوتابی دێ ھەست ب ئارامیێ بکەن و دێ نفشەکێ ساخلەم ژی ھێتە ئاڤاکرن، چونکی ھەکە ئەڤ دیارە نەھێتە چارەسەر کرن، دێ ژ ئالیێ دەروونی و جەستەیی ژی زیان گەھیتە مرۆڤی.
