ئیرادا پێشمه‌رگه‌ى د شۆڕه‌شا گولانێ دا ژچه‌كێ دوژمنى بهێزتر بوو
غه‌ریب یوسف
پشتى ل سالا 1975 ب پیلانه‌كا نێڤده‌وله‌تى شۆڕه‌شا مه‌زنا ئیلۆنێ تووشى شكه‌ستنێ بووى، دوژمن و نه‌حه‌زان وه‌سا هزركرن كو ئێدى شۆَڕه‌ش نه‌ما و تۆڤێ كوردان شوین نابیت، لێ نه‌زانین ب سه‌ركێشى و رابه‌ریا مه‌لا مسته‌فایێ بارزان ب ده‌مه‌كێ كێم جاره‌كا دى شۆَره‌شه‌كا نوو ده‌ستپێكر، ئه‌و ژى شۆڕه‌شا بیست و شه‌شى گولانێ بوو ل سالا 1976 و ئه‌وێ شۆڕه‌شێ به‌رێ بنیاتى بۆ سه‌رهلدانێ دانا، هه‌روه‌سا بۆ هێڤینه‌ك كو په‌رله‌مان و حكومه‌تا هه‌رێما كوردستانێ بهێنه هه‌بوونى و نوكه یێ كارى بۆ ده‌وله‌تبوونێ دكه‌ن.
هه‌لبه‌ت پشتى رێكه‌فتنا خیانه‌تكاریا جه‌زائیر هه‌تا راده‌كى جۆره بێ ئۆمێده‌یه‌ك ل ده‌ف هنده‌ك كه‌سان په‌یدا بوو لێ بارزانیێ نه‌مر و ئدریسێ جانه‌مه‌رگ و مه‌سعود بارزانى و هه‌موو سه‌ركردایه‌تا پارتى هه‌ر زوو كار ژبۆ هندێ كرن دا جاره‌كا دى شۆڕه‌شێ زیندى كه‌نه‌ڤه و كه‌یف و گرنژینێ بێخنه سه‌ر لێڤێن هه‌موو كوردان و پشتى چه‌ندین كۆمبوون و رونشتنان سێ پێشمه‌رگێن قه‌هره‌مان هاتنه ده‌ستنیشانكرن دا جاره‌كا دى به‌رهه‌ڤیان بۆ ده‌ستپێكرنا شۆڕه‌شێ بكه‌ن، ئه‌و ژى (جه‌وهه‌ر نامق سالم و كه‌ریم شنگارى و ئه‌سعه‌د خۆشه‌ڤى) بوون، پشتى ل سه‌ر سنۆرێن عیراقێ و توركیا ده‌ست ب گه‌ڕیان و كۆمبوونێن خوه كرین ل گه‌ل خه‌لكێ باژێرك و گوندان ئه‌و ئاگه‌هداركرن كو جاره‌كا دى دێ شۆڕه‌ش ده‌ستپێكه‌ته‌ڤه و ب خۆشحالى ڤه پتریا خه‌لكێ كوردستانێ به‌رهه‌ڤیا خوه دیاركرن و دیاركرن ئه‌و ب هه‌موو شیانێن خوه ڤه، هه‌روه‌سا ب مال و نانێ خوه دێ پالپشت و پشته‌ڤانێن پێشمه‌رگه‌ى بن، هه‌روه‌سا دڤێت ژبیرنه‌كه‌ین كو (حه‌جى عه‌مه‌ر شه‌تیونسى) پشته‌ڤان و پالده‌ره‌كێ بهێز بوو بۆ دوباره ده‌ستپێكرنا شۆڕه‌شێ و رۆلێ وى دشۆَڕه‌شا گولانێ دا ناهێته مانده‌لكرن، هه‌لبه‌ت ده‌مێ شۆڕه‌شا بیست و شه‌شى گولانێ ده‌سنپێكرى پێشمه‌رگه‌ى چو چه‌كێ وه‌سا یێ ب هێز نه‌بوو كو به‌رسنگێن فرۆكه و تانك و توپێن دوژمنى بگریت، چنكو عیراقا ل وى سه‌رده‌مى چه‌كه‌كێ بهێز و پێشكه‌فتى هه‌روه‌سا هژماره‌كا زۆرا سه‌ربازان هه‌بوو، لێ ژبه‌ركو ئیرادا پێشمه‌رگه‌ى یا بهێز بوو ئه‌و چه‌ند بۆ ئه‌گه‌ر كو دوژمن خوه ل به‌ر سنگێ وان نه‌گریت و دئه‌نجامدا هژماره‌كا زۆرا سه‌ربازێن عیراقى هاتنه كوشتن و ئێخسیركرن، هه‌روه‌سا چه‌كه‌كێ زۆر ژى كه‌فته ده‌ستێن پێشمه‌رگه‌ى و ئه‌ڤ چه‌نده بۆ ئه‌گه‌ر زێده‌تر چریسكا شۆڕه‌شێ گه‌ش بیت و ئێدى جاره‌كا دى هیڤى و ئومێدن بۆ خه‌لكێ كوردستانێ چێبوونه ڤه كو جاره‌كا دى كورد ڤه‌ژین و ئێدى شۆڕه‌شا گولانێ بوو هێڤنێ ده‌ستپێكرنا سه‌رهلدانا پیرۆز هه‌روه‌سا دانانا په‌رله‌مان و حكومه‌تا هه‌رێما كوردستانێ كو ئه‌ڤرۆ ب ئازادانه ئه‌م یێ ل بن سیبه‌را ئالایێ كوردستانێ دژین و ب وێ هیڤیێ ینه ده‌وله‌تا كوردى ژى بهێته راگه‌هاندن دا ئێدى ئه‌م كورد ژ هه‌موو نه‌خۆشى و كاره‌ساتان رزگارببینن.
ل دووماهیێ ب هه‌لكه‌فتا بۆرینا چل و پێنج سالان ل سه‌ر ده‌ستپێكرنا شۆڕه‌شا مه‌زنا ئیلۆنێ سه‌رێ رێز و نه‌وازشێ بۆ هه‌موو شه‌هیدێن كورد و كوردستانێ ب تایبه‌ت ژى بارزانیێ نه‌مر و ئدریسێ جانه‌مه‌رگ دچه‌مینیین و هیڤیا مه ژ خودێ مه‌زن ئه‌وه هه‌موو شه‌هێدێن مه ب به‌هه‌شتا خوه یا به‌رین شاد بكه‌ت و بژیت كورد و كوردستان، نه‌مرى و سه‌ر شۆرى بۆ هه‌موو دوژمنان.
