شاره‌زایه‌كێ ئابۆری: ل كوردستانێ بازارگێری یا سه‌ركه‌فتی نینه
ئه‌ڤرۆ، هه‌رهین محه‌مه‌د:
شاره‌زایه‌كێ وارێ ئابۆری خوه‌یادكه‌ت كو ڤه‌كرنا جهێن گه‌شتیاری ل پارێزگه‌ها دهۆكی گه‌له‌ك مفایێن خوه هه‌نه و رێژا بێكاریێ دناڤ مه دا دێ كێم بیت و دیسان داهاته‌ك ژی دێ ژ وان جهان هێت و ئابورێ پارێزگه‌ها دهۆكێ دێ پێ خوه‌ش بیت. دیسان ته‌كنه‌لۆژیایێ ژی كارتێكرنه‌كا مه‌زن ل سه‌ر كه‌رتێ گه‌شت و گوزارێ هه‌یه و ئه‌و باژێری ته‌كنه‌لۆژیا یا پێشكه‌فتی بیت دێ كه‌رتێ گه‌شت و گوزاری ژی رۆله‌كێ مه‌زن هه‌بیت.
ئیڤان شاكر وه‌كو بسپور و شاره‌زا د وارێ زانستێ ئابوریێ دا دبێژیت: ب شێوه‌كێ گشتی ڤه‌كرنا جهێن گه‌شتیاری وه‌كو تلفریكا چیایێ زاوا و بابلۆ گه‌له‌ك دباشن بهێنه ڤه‌كرن بۆ خه‌لكی و گه‌شتیاران و دیسان دبیته ده‌رفه‌تا كاری بۆ گه‌له‌ك گه‌نجان، به‌لێ یا گرنگ ئه‌وه بازارگێری هه‌بیت و نوكه مه دو جهێن تلفریكا هه‌نه یا چیایێ زاوا و بابلۆ و ده‌مێ بازارگێریه‌كا پرۆفشنال دهێته چێكرن گه‌شتیارێن خاریا عیراقێ دێ قه‌ستا دهۆكێ كه‌ن ب تایبه‌تی ژبه‌ر تلفریكێ كا چاوا نوكه خه‌لك قه‌ستا دوبه‌ی دكه‌ن ژبه‌ر بۆرج خه‌لیفه، وه‌سا گه‌شتیار ژی دێ قه‌ستا دهۆكێ كه‌ن ژبه‌ر تلفریكێ و دبینم ئه‌ڤه پرۆژه‌كێ سه‌ركه‌فتیه و گه‌شت و گوزارێ ب هێز دئێخیت.
خویاژی كر، د هه‌مان ده‌م دا كارگێریا وێ دڤێت سیاسه‌ته‌كا دروست ژی هه‌بیت كو بهایێ ڤان پرۆژان گونجای كه‌ن و چه‌ند پرۆژه یێ گونجای بیت گه‌شتیار و خه‌لكێ دهۆكێ پتر دێ قه‌ستا تلفریكا دهۆك و زاوا كه‌ن و هه‌ر دیسان ژبه‌ر تلفریكێ خارنگه‌ه و هوتێل و موتێل و بازارێن مه ژی دێ كاركه‌ن، به‌لێ كوردستان یا پێدڤه وه‌كو حكومه‌تا هه‌رێمێ ده‌زگه‌هه‌كی ب دامه‌زرینت كو گرێدای گه‌شت و گوزارێ بیت و كاره‌كێ پرۆفشنال بكه‌ت و هه‌تا نوكه مه ئه‌و جه‌زگه‌هێ گه‌شت و گوزاری ل كوردستانێ نین كو ستراتیجیه‌كێ ب دانن بۆ گه‌شت و گوزارێ دا كو گه‌شت و گوزارا مه ژی بگه‌هیته وه‌لاتێن پێشكه‌فتی.
ناڤبری زێده‌تر دبێژیت: بۆ گه‌شتیاری ئه‌م پێدڤی ئه‌پله‌كه‌یشنه‌كا تایبه‌تین كو گرێدای جهێن گه‌شتیاری بیت وه‌كو خارنگه‌ه و ئوتێل و تلفریكا زاوا و بابلۆ و چیایێ زاوا و گه‌لیێ دهۆكێ و سیلاڤێ و گه‌له‌ك جهێن دی و ب رێیا ئه‌نترنێتێ گه‌شتیار دێ قه‌ستا دهۆكێ كه‌ن بۆ گه‌شت و گوزارێ و نوكه گه‌له‌ك كه‌س هه‌نه به‌ری ده‌ست ب گه‌شتا خوه بكه‌ن بۆ وه‌لاته‌كی ب رێیا ئه‌نترنێتێ دێ بخوه (حجز) كه‌ت، به‌لێ هشتا ل كوردستانێ ئه‌م نه‌گه‌هشتینه ڤێ چه‌ندێ و پێدڤیه مه ئه‌ڤ تشته ژی هه‌بیت ب ێیا ئه‌نترنێتێ گه‌شت و گوزارێ پێش بێخین و یا پێدڤیه ژی وه‌زاره‌تا گه‌شت و گوزاری ب ڤێ چه‌ندێ رابن و ل دووڤ ته‌كنه‌لۆژیا سه‌رده‌م بچن و ته‌كنه‌لۆژیایێ ژی كارتێكرنه‌كا مه‌زن ل سه‌ر كه‌رتێ گه‌شت و گوزارێ هه‌یه و ئه‌و باژێری ته‌كنه‌لۆژیا یا پێشكه‌فتی بیت دێ كه‌رتێ گه‌شت و گوزاری ژی رۆله‌كێ مه‌زن هه‌بیت و هه‌كه ته‌ماشه‌ی گه‌له‌ك وه‌لاتان بكه‌ین داهاتێ گه‌له‌ك وه‌لاتان ل سه‌ر گه‌شت و گوزارێ یه ئه‌و ژی ب رێیا ته‌كنه‌لۆژیایێ جهێن خوه یێن گه‌شتیاری نیشانده‌ن و هه‌كه ئه‌م ژی جهێن خوه یێن گه‌شتیاری گرنگیێ بده‌ینێ و ل سوشیال میدیایێ ب گشتی به‌لاڤكه‌ین دێ پتر كه‌رتێ گه‌شت و گوزاری رۆلێ خوه بینت، به‌لێ دێ هه‌ربێژم ڤێ چه‌ندێ دڤێت وه‌زاره‌تا گه‌شت و گوزارێ پێ رابیت.
شاره‌زایێ ئابورژی ئه‌و چه‌نده ژی گۆت: هه‌بوونا دو تلفریكا ل دهۆكێ تشته‌كێ سه‌ركه‌فتیه، به‌لێ ب مه‌رجه‌كی بهایێ گونجای بیت و نوكه تلفریكا چیایێ زاوا پلێتا وێ بهایێ ده‌ه هزار دینارایه و خه‌لك هه‌موو دبێژن بۆچی هه‌ر نه‌فه‌ره‌ك ب ده‌ه هزاردیناران و هه‌كه بهایی پیچه‌كێ ئه‌رزان كه‌ن دێ پتر خه‌لك قه‌ستكه‌تێ‌ن به‌لێ هه‌كه كارگێریا ڤی جهی بێژن بۆ خێزانان ب بهایێ بیست و پێنچ هزاردیناران یه وه‌سا دا گه‌له‌ك خێزان قه‌ست كه‌نێ، چونكو هه‌تا نوكه پتریا خه‌لكێ دهۆكێ نه‌چووینه د تلفریكێ دا و هه‌كه یا ئه‌رزان ژی بیت دێ گه‌شتیار ب رێژه‌كا مه‌زن قه‌ستا ڤی پرۆژه‌ی كه‌ن و وه‌كو من گۆتی ژی دێ گه‌له‌ك جهێن دی ژی ب خێرا ڤی جهی كاركه‌ن.
ئیڤانی گۆت: بنیاتێ هه‌ر تشته‌كی بازاركرنه و هه‌كه بازاركرن یا سه‌ركه‌فتی بیت دێ د گه‌له‌ك لایان دا یێ سه‌ركه‌فتی بی، به‌لێ بازارگێریا مه یا كوردستانێ نه‌هند یا سه‌ركه‌فتی یه و به‌ری چه‌ند سالان هه‌ولێر هاته هه‌لبژارتن بیته پایته‌خیتێ گه‌شت و گوزارێ، به‌لێ مه چ بازاركرن نه‌بوو و هه‌تا نوكه مه سیاسه‌تا دروست یا گه‌شت و گوزارێ نینه، بۆ پێ@شكه‌فتنا كه‌رتێ گه‌شتیاری پێدڤیه گه‌شتیار ل وه‌لاتێن بیانی ژی بهێن قه‌ستا كوردستانێ بكه‌ن بۆ گه‌شت و گۆزاری و نوكه گه‌شتیارێن مه یێن هه‌رما كوردستانێ ده‌ستنیشانكری نه و ب تنێ ژ عیراقێ دهێن و ئه‌ڤه ژی دبیته ئه‌گه‌رێ هندێ مه چ پلان نینن ژلایێ حكومه‌تێ ڤه و چ پشته‌ڤانیا گه‌شت و گوزاری ناهێته كرن.
جه‌لال محه‌مه‌د سه‌بری، به‌رپرسێ راگه‌هاندنا كۆمپانیا(UB) گرۆپ بۆ ئه‌ڤرۆ گۆت: روبه‌رێ پاركا سه‌ر ب تلفریكا چیایێ زاوا 80 دونه‌من ژ بۆ قوناغا ئێكێ و بۆ قوناغا دوێ دێ به‌رفره‌ه تر لێ كه‌ین و دیسان دێ هنده‌ك موتێل و ئوتێل و مه‌له‌ڤانگه‌ه و یاریگه‌ه و جهێن سه‌ماكرنێ ڤه‌كه‌ین كو بیته جهه‌كێ گه‌شت و گوزاری و بزاڤێ كه‌ین ئه‌ڤ جهه ببیته رێكه‌ك گه‌شتیارێ عیراقی و یێ بیانی بهێنه ڤێرێ و سه‌رنجا وان ب راكێشیت و خوه‌شیێ ژ ڤی جهی بینبت.
ناڤبری گۆت ژی: ئه‌ڤ جهه بۆ خه‌لكێ دهۆكێ یێ هایه ئاڤاكرن و ئه‌و كه‌سێ دهێته ڤێرێ پێدڤیه چاڤێ خوه بده‌نێ و هنده‌ك تشت ل ڤێرێ قه‌ده‌غه‌نه، وه‌كو چه‌ك هه‌لگرتن و ڤه‌خارنێن كحولی، چونكو ئه‌و كه‌سێن دهێنه دناڤ ڤان باخچه‌یان بێنا خوه لێ ڤه‌ده‌ن و ئه‌ڤ كه‌ل و په‌لێن ناڤا ڤێ پاركێ دا هنده‌ك یێن مه ب خوه نه و هنده‌ك ژی ژ ده‌رڤه هاتینه وه‌كو ئه‌و نافورا د ئاڤێ دا ل گه‌ل ده‌نگێ موزیكێ كاردكه‌ت و كه‌ل و په‌لێن خارنگه‌ها پێنچ ستێر وه‌كو دی ژی مه باخچه چێكرینه و ئاڤ مه ئینا سه‌رێ چیایی و شانۆیا رۆمانی مه چێكریه ژ بۆ وێ چه‌ندێ مفا ژێ بهێته وه‌رگرتن ژ بۆ ئاهه‌نگێن نشتیمانی.
