ئه‌وقاف داخوازا سزادانا سحربه‌ندا دكه‌ت
هه‌ولێر، قائید میرۆ:
پشتی چه‌ندین سكالا ل دۆر زێده‌بوونا دیاردا سحرێ گه‌هشتینه په‌رله‌مانێ كوردستانێ بڕیاره رێكارێن توند ل هه‌مبه‌ر وان كه‌سان هه‌بن یێن ب ناڤێ ئایینی ئیسلامێ كار بۆ ب سه‌ردا برنا وه‌لاتیان دكه‌ن و ب رێیێن جودا سحرێ دكه‌ن بڕیارده‌رێ لژنا ئه‌وقافێ ژی ل په‌رله‌مانێ كوردستانێ دبێژیت: لژێر ناڤێن جودا كار بۆ تێكدانا شیرازا خێزانێ دهێته كرن و چه‌ندین خێزان ژی ژبه‌ر نه هشاریا وان و سه‌ره‌دانێن وان بۆ لایێ كه‌سێن ئایینی هاتینه هه‌لوه‌شاندن.
وه‌یسی سه‌عید، بڕیارده‌رێ لژنا ئه‌وقافێ ل په‌رله‌مانێ كوردستانێ بۆ ئه‌ڤرۆ دیار كر كو، ئێك ژ دیاردێن مه‌ترسیدار كو ل هه‌رێما كوردستانێ یا به‌ربه‌لاڤه بابه‌تێ سحرێ یه، كو مخابن كاریگه‌ریێن زۆر نه‌رێنی ل سه‌ر شیرازا خێزانێ په‌یدا كریه و خه‌لكه‌ك ئایینی پیرۆزێ ئیسلامێ بكار دئینیت هه‌تا بڤێ رێیێ سحرێ بكه‌ن و خه‌لكی سه‌ردا ببه‌ن، چه‌ندین داخوازی و گازنده گه‌هشتینه په‌رله‌مانێ كوردستانێ ل دۆر كه‌سێن ساحر، هه‌تا كار ل سه‌ر ئه‌ڤێ دیاردێ بهێته كرن و ب رێیا ده‌زگه‌هێن په‌یوه‌ندیدار كار ل سه‌ر ڤێ چه‌ندێ بكه‌ین لێپرسین ل گه‌ل وان كه‌سان بهێته كرن یێن بناڤێ ئایینێ ئیسلامێ پاره‌ی ژ وه‌لاتیان وه‌ر دگرن و بناڤێ سحركرنێ و چێكرنا نڤشتیا.
وه‌یسی گوتژی: له‌وڕا لژنا ئه‌وقاف و كارۆبارێن ئایینی بزاڤان دكه‌ت ب رێیا وه‌زاره‌تا ناڤخۆ كار بۆ ده‌سته‌سه‌ر كرنا كه‌سێن ساحر دكه‌ت، هه‌روه‌سا ب رێیا وه‌زاره‌تا ئه‌وقافێ هه‌وه‌ك ژلایێ مامۆستایێن ئایینی دژی وان كه‌سان و ئه‌ڤێ دیاردا نه شارستانی بهێته ده‌ستپێكرن و ب رێیا مینبه‌رێن مزگه‌فتان و گوتارێن رۆژێن ئه‌ینی وه‌لاتی بهێنه هشیار كرن، مه دخواز ژ وه‌زاره‌تا ره‌وشنبیری ژی كریه ب رێیا كه‌نالێن راگه‌هاندنێ كار بۆ هشیار كرنا وه‌لاتیان بهێته ئه‌نجامدان.
بڕیارده‌رێ لژنا ئه‌وقاف و كاروبارێن ئایینی ئه‌و چه‌نده ژی گۆت: ئه‌م وه‌كی لژنا ئه‌وقاف و په‌رله‌مانی دخوازین كه‌سێن كارێن سحرێ دكه‌ن دناڤا جڤاكی دا ب دژواری بهێنه سزادان، ژبه‌ركو لژێر ناڤێ ئایینێ پیرۆزێ ئیسلامێ كار بۆ سه‌ردا برنا وه‌لاتیان دكه‌ن و شیرازه‌یێ خێزانێ تێك دده‌ن، پاره‌یه‌كێ زۆر بناڤێ چاره‌سه‌ركرنا ئاریشێن وه‌لاتیان دهێته وه‌رگرتن، ل گوره‌ی زانیاریێن گه‌هشتینه مه چه‌ندین ئاریشه ژ ئه‌نجامێ سه‌ره‌دانا ئه‌ڤان كه‌سێن دبێژنێ ساحر یان ژی هه‌ر ناڤه‌كێ دی ل سه‌ر خوه دانابیت په‌یدا بووینه، چه‌ندین خێزان هاتینه هه‌لوه‌شاندن و پێدڤیه لایه‌نێن په‌یوه‌ندیدار كار بۆ نه‌هێلانا ئه‌ڤێ دیاردا نه‌شرین و نه شارستانی بده‌ن، ئه‌م هه‌موو ل گه‌ل كارێ باش و دوعایێن خێرێ نه، كو هنده‌ك كه‌س ب نیه‌ته‌كا پاقژ و بێ به‌رامبه‌ر ئه‌نجام دده‌ن، به‌رۆڤاژی هنده‌ك خه‌لك ژی په‌یدا بووینه بناڤێن جودا كار بۆ سه‌ردابرنا وه‌لاتیان دكه‌ن.
وه‌یسی سه‌عید ئاماژه پێ كر كو ل سالا 2019ێ ژلایێ وه‌زاره‌تا ناڤخۆ یا حوكمه‌تا هه‌رێما كوردستانێ هه‌موو كارێن چێكرنا نڤشتیان و ده‌ركرنا ئه‌جنا دناڤا له‌شێ مرۆڤی و هه‌موو جورێن سحر و هه‌ر ناڤه‌كێ دی ل سه‌ر هه‌بیت هاتبوو قه‌ده‌غه كرن، به‌لێ ئه‌و دیارده هه‌ر مایه دناڤ جڤاكێ مه دا و دیاره نه‌ك كێمتر نه‌بوویه، به‌لكو یا به‌ر ب زێده‌بوونێ ژی دچیت، یا فه‌ره وه‌لاتی ژی هشیار بیت ب چو ره‌نگه‌كی سه‌ره‌دانا ئه‌ڤان كه‌س و جهێن بناڤێن دوعا كرن و چێكرنا نڤشتیان و هه‌ر ناڤه‌كێ ل سه‌ر هه‌بیت نه‌كه‌ن، به‌رۆڤاژی نه‌ك ئاریشێن وان ناهێنه چاره‌سه‌ر كرن، به‌رۆڤاژی ژبلی كو ژلایێ مادیڤه دێ تووشی زیانان بن، چه‌ندین زیانێن دی یێن جڤاكی ژی هه‌نه.
