ده‌ستپێكا هه‌یڤا داهاتی سالا نوویا خواندنێ دێ بڕێڤه‌چیت
هه‌ولێر، قائید میرۆ
بڕیاره ده‌ستپێكا هه‌یڤا ئیلوونا داهاتی سالا نوویا خواندنێ بهێته ده‌ستپێكرن و سه‌رۆكێ ئێكه‌تیا مامۆستایێن كوردستانێ ژی ئاشكراكر، وه‌زاره‌تا په‌روه‌ردێ پلان هه‌نه بۆ سالا نوویا خواندنێ و چه‌ندین پێشنیارژی داینه سه‌رۆكایه‌تیا جڤاتا وه‌زیران هه‌روه‌سا دبێژیت، كۆنفڕانسه‌كێ زانستی لدۆر ره‌وشا په‌روه‌ردێ دێ هێته گێڕان و نه‌خشه‌یه‌ك بۆ به‌رده‌وامیا خواندنێ دێ هێته دیاركرن.
عه‌بدولواحید محه‌مه‌د، سه‌رۆكێ ئێكه‌تیا مامۆستایێن كوردستانێ بۆ رۆژناما ئه‌ڤرۆ دیاركر” سالا نوویا خواندنێ نێزیك بوویه و به‌ری نوكه ئه‌م دگه‌ل وه‌زاره‌تێ و وه‌زیرێ په‌روه‌ردێ پرسا ده‌ستپێكرنا سالا خواندنێ گوتوبێژكریه، وه‌زاره‌تا په‌روه‌ردێ پلانه‌ك دانایه بۆ ده‌ستپێكرنا سالا نوویا خواندنێ، هه‌ر پێشنیاره ك و بڕیاره‌ك د به‌رژه‌وه‌ندیا كه‌رتێ په‌روه‌ردێ بیت ئه‌مژی دێ هاریكاربین بۆسه‌رخستنا كه‌رتێ په‌روه‌ردێ، مه پلان دانابو لدۆر ره‌وشا كه‌رتێ په‌روه‌ردێ كۆنفڕانسه‌ك بهێته ئه‌نجامدان و لیژنه‌یه‌ك هاتبو پێك ئینان و به‌رهه‌ڤیژی بۆ ئه‌نجامدانا كۆنفڕانسی هاتبوونه‌كرن، هه‌تا مه په‌یوه‌ندی دگه‌ل وه‌زاره‌تێن په‌روه‌رده و خواندنا بلندژی هه‌بو، به‌لێ ره‌وشا كۆرۆنایێ دژواربو ئاسته‌نگ په‌یدابوون، به‌لێ هێشتا ده‌لیڤه مایه و ئه‌گه‌ر ره‌وش هنده‌ك به‌ره‌ف باشتر بچیت ئه‌ڤه كۆنفڕانس دێ هێته رێڤه‌برن، چونكه هێشتا ده‌لیڤه مایه و ئێكه‌تیا مامۆستایان بفه‌ر دزانیت كۆنفڕانسه‌كا زانستی بهێته گێڕان و تێدا نه‌خشه‌یه‌ك بۆ سالا خواندنێ بهێته دیاركرن، بزاڤێن مه هێشتا د به‌رده‌وامن بۆ گێڕانا كۆنفڕانسێ په‌روه‌رده‌یی و هه‌رده‌مێ ده‌لیڤا په‌یدابو ئه‌ڤه بێگومان دێ هێته ئه‌نجامدان.
سه‌رۆكێ ئێكه‌تیا مامۆستایێن كوردستانێ گۆتژی” مخابن دو سالێن بۆری دا زیانێن مه‌زن به‌ر كه‌رتێ په‌روه‌ردێ كه‌فتینه و دێ هه‌موو شیانێن خۆ مه‌زێخین خواندنا بهه‌روه‌چوی دو سالێن بۆری دا بهێته قه‌ره‌بووكرن، به‌لێ پێدڤیه به‌رهه‌ڤی بهێته‌كرن بۆ قه‌ره‌بووكرنێ، هه‌تا نوكه دوماهی بڕیارا وه‌زاره‌تا په‌روه‌ردێ ئه‌ڤه 1ی هه‌یڤا ئیلوونێ ده‌ست ب پرۆسا خواندنێ بهێته‌كرن و پشكه‌ك ده‌ستپێكا سالا نوویا خواندنێ بۆ قه‌ره‌بووكرنا سالا بۆری بهێته ته‌رخانكرن، ئه‌و پیت و بابه‌تێن نه‌هاتینه خواندن سالا بۆری ئه‌ڤساله دێ پێداچوون بۆ بهێته‌كرن و دوڤدا دێ بابه‌تێن سالا نوو هێنه خواندن، وه‌زاره‌تا په‌روه‌ردێ پێشنیاره‌ك دایه سه‌رۆكایه‌تیا جڤاتا وه‌زیران بۆ قه‌ره‌بووكرنا خواندنا سالا بۆری.
عه‌بدولواحید محه‌مه‌د ئاماژه‌كر” ناهێته ڤه‌شارتن دده‌مێ نوكه هه‌رێما كوردستانێ ژلایێ مه‌ترسیا كۆرۆنایێ به‌ره‌ف هێلا سۆر دچیت و ره‌وش یا دژواره، به‌لێ ئیدی كۆرۆنا یا به‌رده‌وامه و نابیت ئه‌م خه‌مساریێ بكه‌ین و كۆرۆنا بوویه پشكه‌ك ل ژیانامه و هه‌موو مرۆڤایه‌تیێ، نابیت ژیان بهێته راگرتن و پرۆسا په‌روه‌ردێ بهێته راگرتن، سالا بۆری خواندن هاته راگرتن و زیانێن مه‌زن گه‌هشتینه هه‌رێما كوردستانێ، نابیت ئه‌ڤساله ب چو شێوه‌یه‌كی پرۆسا خواندنێ بهێته راگرتن، چونكه ڤایرۆسا كۆرۆنایێ دیاره دێ یا به‌رده‌وامبیت دڤێت ئه‌م خۆ بگونجینین دگه‌ل كۆرۆنایێ، هه‌ر بهایه‌كێ هه‌بیت و بهه‌ر شێوه‌یه‌كێ هه‌بیت نابیت پرۆسا خواندنێ بهێته راگرتن و مینا دو سالێن بۆری خواندن ببیته قوربانی.
