رێڤه‌به‌رێ كوچ و كوچبه‌رێن عێراقی ل دهۆكێ: هێشتا 27 هزار خێزانێن ئاوارێن شنگال ل دهۆكێ دژین
دهۆك، له‌زگین جوقی
رێڤه‌به‌رێ كوچ و كوچبه‌رێن عیراقێ ل پارێزگه‌ها دهۆكێ دیار كر “هه‌تا ئه‌ڤرۆ ل سنۆرێ پارێزگه‌ها دهۆكێ 27 هزار خێزانێن ئاواره ماینه هه‌موو ژی خه‌لكێ شنگال و ده‌ڤه‌رێن سه‌ر شنگالێ ڤه نه‌شیاینه ڤه‌گه‌رنه جهێن خۆ”.
ئه‌سكه‌نده‌ر محه‌مه‌د ئه‌مین، رێڤه‌به‌رێ كوچ و كوچبه‌رێن عێراقی ل پارێزگه‌ها دهۆكێ بۆ ئه‌ڤرۆ راگه‌هاند “هه‌تا نوكه ل سنۆرێ پارێزگه‌ها دهۆكێ د 16 كه‌مپێن ئاواران دا هێشتا 27 هزار خێزانێن ئاواره ماینه ل دهۆكێ هه‌موو ژی خه‌لكێ شنگال و ده‌ڤه‌رێن سه‌ر شنگالێ ڤه و نه‌شیاینه ڤه‌گه‌رنه سه‌ر جه و مالێن خۆ، هێشتا ره‌وشا شنگال باش نینه بۆ زڤرینا ئاواران و نوكه ئاواران ئومێد نینه بچنه شنگال و بێ ئومێد بووینه ژ سۆزێن به‌غدا “.
ئاشكه‌را كر : “هه‌تا رێكه‌فتنا ناڤبه‌را حكومه‌تا هه‌رێما كوردستانێ و عێراقی دا بجه نه‌هێت و پێشمه‌رگه‌هێ كوردستانێ نه‌زڤرنه شنگال و ته‌ناهی ل شنگال په‌یدانه‌بیت، ئاواره ناڤه‌گه‌رن، هه‌ر ده‌مێ رێكه‌فتنا هه‌ولێر و به‌غدا بجه هات و پێشمه‌رگه‌هێ كوردستانێ زڤرینه شنگال، دێ باوه‌ری بۆ ئاواران دروست بیت و دێ زڤرنه سه‌ر جهێن خۆ”.
ئه‌سكه‌نده‌ر محه‌مه‌د ئه‌مین، گۆت:” چو بریار بۆ دائیخستنا كه‌مپێن ئاوارێن شنگال نینن و كه‌س نه‌شێت ب زۆری ئاواران بزڤرینیته شنگال، ئه‌و ئاوارێن چووینه شنگال ژی هه‌ولده‌ن دووباره شنگال چوول بكه‌ن، چونكو ره‌وش باش نینه ناڤ شنگالدا و هێشتا گرۆپێن چه‌كدار ناڤ شنگالدا هه‌نه خه‌لك نه‌وێرن زارۆكێن خۆ ببه‌نه شنگال “.
ئه‌یاد قاسم ، ئێك ژ ئاوارێن شنگال نۆكه ل كۆمه‌لگه‌ها شاریا ئاكنجیی یه دیار كر:” پشتی جینۆسایدا شنگال هه‌تا ئه‌ڤرۆ گه‌له‌ك ژ كچ و خۆرتێن ئێزدیان دناڤ شنگال دا یێن هاتینه كوشتن و ره‌ڤاندن و بێ سه‌روشینكرن ئه‌ڤه بوویه جهێ ترسی بۆ خه‌لكێ شنگال، له‌ورا خه‌لك نه‌وێرن ڤه‌گه‌رن، ئه‌م داخوازێ ژ حكومه‌تا هه‌رێما كوردستانێ و عێراقی دكه‌ین ره‌وشا شنگال چاره‌سه‌ر بكه‌ن و پێشمه‌رگه‌هێ كوردستانێ بزڤرته شنگال “.
گۆتژی: “ل شوونا ته‌ناهی و ئاڤه‌دانی ل شنگال په‌یدابیت، مخابن تێكدانا ره‌وشا شنگال دهێته كرن و گرۆپێن چه‌كدار بووینه ئه‌گه‌ر كوشتن و ره‌ڤاندن و بێ سه‌روشینكرنا وه‌لاتیان ل شنگال یا به‌رده‌وام بیت به‌ره‌ڤ زێده‌بوونێ چوویه”.
بیزار ره‌شو، ژنه‌كا ئاواره شنگالێ یه ل دهۆكێ ئاكنجیی یه دیار كر:” ئه‌ڤه حه‌فت سالن حكومه‌تا هه‌رێما كوردستانێ و خه‌لكێ كوردستانێ مه ب خۆدان دكه‌ت ئه‌گه‌ر ته‌ناهی نه‌بیت ئه‌م نه‌شێین بچینه شنگال”.
خه‌له‌ف حامد، ئێك ژ ئاوارێن شنگال ل دهۆكێ دژیت دیار كر :”ئه‌م گه‌له‌ك بێ ئومیدبووینه بۆ زڤرینا شنگال، چونكو رۆژ ل دووڤ رۆژێ ره‌وشا شنگال خرابتر دبیت و ته‌ناهی نینه”.
مه‌نجی سه‌عدو، ژنه‌كا ئاواره یا ئێزدیه ل قه‌زا سێمێلی ئاكنجیی یه دیار كر:” ئه‌م نه‌وێرین زارۆكێن خۆ ببه‌ینه شنگال، چونكو مه باوه‌ری وان هێز و گرۆپێن چه‌كدار یێن ناڤ شنگالێ دا نینه، ئه‌گه‌ر پیشمه‌رگه‌هێ كوردستانێ بچیته شنگال ئه‌م دێ زڤرینه شنگال”.
هادی سفوكا، به‌رپرسێ نڤیسینگه‌ها كۆمه‌لایه‌تی لقێ 17 پارتی ل شنگال راگه‌هاند:” هه‌ر كه‌سه‌كێ چوویه ناڤ گرۆپێن نه‌شه‌رعیێ دا یان هاتیه خاپاندن ژلایێ وانڤه پشتی تێكه‌ل بووی نه‌شێت ده‌ستان ژ گرۆپێن چه‌كدار به‌رده‌ت چونكو ئه‌و گرۆپ رێ وان ناده‌ن رێزیێن وان بجه بهێلن ئه‌گه‌ر گرۆپێن چه‌كدار رێ ب خه‌لكێ بده‌ت هه‌موو خه‌لكێ شنگال دێ ده‌ستان ژ وان به‌رده‌ن لێ خه‌لك دهێته چاڤ ترساندن و گه‌ڤ ل وان دهێنه كرن هه‌تا ژی ئه‌و كه‌سێن په‌كه‌كێ دهێلن نه‌شێن ل شنگال بژێن چونكو دهێنه كوشتن یان ره‌ڤاندن ژلایێ په‌كه‌كێ ڤه”.
هادی سفوكا ئاشكه‌را كركو:” هه‌ر كه‌سه‌كێ گرۆپێن چه‌كدار دخاپاندی نه‌شێت په‌یوه‌ندی دگه‌ل دایك وباب وكه‌س و كارین خۆ بكه‌ت هه‌تا ژی ناڤه‌كێ نهێنی ل وان دكه‌ن گه‌له‌ك كه‌سێن نوكه ناڤ وان گرۆپان دا ل شنگال نه خه‌لكێ شنگالێ نه به‌لكو خه‌لكێ توركیا و سوریایێ نه ئیناینه شنگال”.
گۆتژی:” هه‌ر كه‌سه‌كێ گرۆپێن چه‌كدار بهێلت دهێته كوشتن یان ژی ره‌ڤاندن وبێ سه‌روشینكرن پشتی جینوسایدا شنگال 3/8/2014ێ هه‌تا نوكه 30 هه‌تا 40 زه‌لامیێن خه‌لكێ شنگال یێن هاتینه بێ سه‌روشینكرن كه‌س تشته‌كێ ژ چاره‌نڤیسی وان نوزانیت هه‌تا ژی ئه‌و خێزانێن مالێن خۆ برینه شنگال په‌شێمان بووینه دووباره زڤرنه هه‌رێما كوردستانێ چونكو خه‌لك ل ته‌ناهی دگه‌ریت نه‌شێن ناڤ شنگال دا بژین”.
