تایبه‌تمه‌نده‌كا ده‌روونی: روژنامه‌ڤان پێدڤی ب پالپشتیا ده‌روونی و جڤاكیه
ئه‌ڤرو، دلڤین ره‌شید:
تایبه‌تمه‌نده‌كا ده‌روونی دیار كر كو دڤێت تاكه‌كه‌س سنوران بۆ خوه و كارێ خوه دانیت نه هه‌ر كه‌سێ داخوازه‌ك ژێ كر بێژیتێ بلا، ئانكو هنده‌ك جاران په‌یڤا نه ژی یا گرنگه ئه‌م بێژین و گۆت: خالا هه‌ره گرنگ ئه‌وه رۆژنامه‌ڤانی باوه‌ری ب خوه و شیانێن خوه هه‌بیت و بزانیت چاوا سه‌ره‌ده‌ریێ ل گه‌ل فشارێن ده‌روونی بكه‌ت.
دكتوره جیهان حوسێن عومه‌ر تایبه‌تمه‌ندا ده‌روونی بو ئه‌ڤرۆ دیار كر كو هنده‌ك جاران یا گرنگه ئه‌م بزانین سه‌ره‌ده‌ریێ ل گه‌ل سترێسێ بكه‌ین، چونكی مێشكێ مرۆڤی وه‌ك موكناتیزیه هه‌ر تشتێ بهێته گوتن ئه‌و رادكێشیت و گۆت: دڤێت ئه‌م خوه ژ وان بابه‌تێن سوشیال میدیایێ دوور بكه‌ین ئه‌وێن دبنه ئه‌گه‌ر كو فشارێن ده‌روونی ل سه‌ر مه دروست دكه‌ن وه‌ك وینه‌ێین مریان و كوشتییان.
د. جیهانێ دا زانین كو خالا هه‌ره گرنگ ئه‌وه رۆژنامه‌ڤانی باوه‌ری ب خوه و شیانێن خوه هه‌بیت و بزانیت چاوا سه‌ره‌ده‌ریێ ل گه‌ل ڤان فشارێن ده‌روونی بكه‌ت، ئه‌وژی ب رێیا دانانا پلانه‌كی بۆ كارێ خوه یێ رۆژانه ب شێوازه‌كێ ئه‌كادمی داكو بشێت خوه ژ ڤان فشاران خلاس بكه‌ت و گوت: دڤێت رۆژنامه‌ڤان گرنگیێ ب خوه بده‌ت و خوه نێزیكی وی تشتی بكه‌ت، ئه‌وێ ئه‌و ل گه‌ل ئارام، گه‌له‌ك گرنكه رۆژنامه‌ڤان گرنكیێ ب روتینیاتێن ژیانا خوه بده‌ت وه‌ك خه‌وه‌كا باش هه‌بیت وه‌رزشێ بكه‌ت بهنڤه‌دان هه‌بیت ده‌مێ خوه رێك بێخیت پلانه‌كا باش بۆ ژیانا خوه ب دارێژیت .
رۆژنامه‌ڤان حه‌سه‌ن فه‌تاح ئاشكرا كر كو رۆژانه رۆژنامه‌ڤان دناڤ روودان و كاودانێن جودا دایه و رومالا هه‌موو بوویه‌ر و پێشهاتان دكه‌ت، بێگومان ئه‌و روودان ژی كارتێكرنێن ده‌روونێ ل ده‌روونێ رۆژنامه‌ڤانی دكه‌ت، چونكی رۆژنامه‌ڤان ژی مرۆڤه و خودان هه‌سته، دیسان كارێ رۆژنامه‌ڤانیێ زێده ماندیبوون ژی تێدایه ژبه‌ركو رۆژێن بهێنڤه‌دانان نینن.
حه‌سه‌ن گۆتژی: چ پێنه‌ڤێت گه‌له‌ك ماندیبوون و دیتنا گه‌له‌ك جورێن روودانان فشاره‌كا ده‌روونی دورست دكه‌ت، ئه‌ڤه زێده‌تر كارێ نوژدارێن ده‌روونی یه، لێ بێگومان پالپشتیا ده‌روونی و جڤاكی هه‌تا سیاسی ژی بۆ كارێ رۆژنامه‌ڤانی یا گرنگه، لێ بۆ كیژان رۆژنامه‌ڤانی ئه‌وێ پیشه‌یی و ب دروستی كارێ خوه دكه‌ت، چونكی گه‌له‌ك بناڤێ رۆژنامه‌ڤانی كار دكه‌ن و ئه‌و بخۆ رۆژنامه‌ڤانی یا ژ وان به‌ریئه.
رۆژنامه‌ڤان روندك مه‌سعود عه‌بدلا دیار كر كو نه‌بونا پالپشتیا ده‌زگه‌هێ راگه‌هاندنێ یان ژی مل ملانێیا كاری بۆ رۆژنامه‌ڤانی دبیته ئه‌گه‌ر كو فشارێن ده‌روونی بۆ رۆژنامه‌ڤانی په‌یدا بییت، كێشێن ته‌كنیكی ژی دبینه ئه‌گه‌ر رۆژنامه‌ڤان تووشی فشارێن ده‌روونی ببیت، چونكی پشتی خوه ئاماده كرنێ و ماندیبونه‌كا درێژ ژ ئه‌گه‌رێن كێشێن ته‌كنیكی كارێ وێ دهێته پاش خستن .
روندكێ ئه‌و چه‌نده ژی دیار كر كو پالپشتیا جڤاكی ئه‌گه‌رێ سه‌ركه‌فتنا ئێكێ یه ژ بۆ رۆژنامه‌ڤانی د هه‌ر بواره‌كێ دا، چونكی رۆژنامه‌ڤان كارێن جودا جودا ئه‌نجام دده‌ت و ئه‌ڤ جوره پالپشتیا ده‌روونی و هه‌لسه‌نگاندنا كارێ روژنامه‌ڤانی ژلایێ خیزانێ و جڤاكی و ده‌زگه‌هێ ویڤه دبیته ئه‌گه‌رێ وێ یه‌كێ كو رۆژنامه‌ڤان كارێن به‌رهه‌مدار و باشتر ئه‌نجام بده‌ت.
ژلایه‌كێ دیڤه روندكێ گۆت: هه‌بونا خۆلێن پالپشتیا ده‌روونی و جڤاكی ژ بۆ رۆژنامه‌ڤانان گه‌له‌ك د گرنگن ژ بۆ بهێزكرنا ده‌روونێ رۆژنامه‌ڤانی داكو بشێت كارێن جوان و سه‌رنج راكێش ئه‌نجام بده‌ت ، هه‌روه‌سا هه‌بونا نۆژدارێن ده‌روونی دناڤ ده‌زگه‌هێن راگه‌هاندنێ دا كاره‌كێ گه‌له‌ك باشه، چونكی روژنامه‌ڤان گه‌له‌ك جاران پێدڤی ب كه‌سانێن شاره‌زا هه‌یه د بوارێن ده‌روونی دا، داكو ئاریشێن خوه بۆ بێژیت و نوژدارێ ده‌روونی ب شێوه‌كی زانستی و ئه‌كادمی رێكێن چاره‌سه‌ریێ بۆ ڤه‌بینیت، داكو هێزا جاران یا رۆژنامه‌ڤانی بۆ بهێته قه‌ره‌بۆ كرن، چونكی هه‌تا مه رۆژنامه‌ڤانه‌كێ خۆدان شیان و چالاك هه‌بیت ئه‌و پێدڤی ب ده‌رونه‌كێ ئارامه.
