پێدڤیه هه‌موو مامۆستا ڤاكسینێ وه‌ربگرن
هه‌ولێر، قائید میرۆ
بڕیاره رۆژا 14ی ئه‌ڤێ هه‌یڤێ ئێكه‌م رۆژا سالا نوویا خواندنێ بهێته ده‌ستپێكرن و به‌رپرسه‌كێ ئێكه‌تیا مامۆستایێن كوردستانێ ژی ئاشكراكر، ئه‌گه‌رێن بڕیارێن نوو هه‌یه لدۆر ده‌ستپێكرنا ده‌واما قوتابخانا و دبێژیت، بڕیارا وه‌زیرێ په‌روه‌ردێ لدۆر بجه ئینانا سیسته‌مێ ئه‌لكترۆنی دو دلی بۆ قوتابیا په‌یداكریه و پێدڤیه تنێ خواندن دناڤا پۆلێ دا بهێته‌كرن نابیت چه‌ند جوره‌كێن خواندنێ هه‌بن.
ئه‌م وه‌كی ئێكه‌تیا مامۆستایان پشته‌ڤانیا بڕیارا وه‌زاره‌تا په‌روه‌ردێ دكه‌ین بۆ ده‌ستپێكرنا سالا نوویا خواندنێ ل نیڤا ئه‌ڤێ هه‌یڤێ، ئه‌م دگه‌ل ده‌واما قوتابخانین هه‌موو رۆژه‌كێ ده‌وام بهێته‌كرن وه‌ك سالێن به‌ری كۆرۆنایێ، هه‌روه‌سا بهه‌ر شێوه‌یه‌كێ هه‌بیت پێدڤیه قه‌ره‌بوویا دو سالێن بۆری بهێته‌كرن یێن خواندنێ، چونكه دو سالێن بۆری زیانێن مه‌زن ب كه‌رتێ په‌روه‌ردێ گه‌هشتینه و دڤێت بهێنه قه‌ره‌بووكرن، به‌لێ بابه‌تێ خواندنا ئه‌لكترۆنی بۆ ئه‌ڤساله دێ كاریگه‌ریێن خراپ لسه‌ر ئاستێ زانستیێ خواندنێ هه‌بن و دڤێت ئێك جورێ خواندنێ هه‌بیت، واته تنێ خواندن دناڤا پۆلێ دا بهێته خواندن و ئه‌ز دگه‌ل سیسته‌مێ ئه‌لكترۆنی نیمه، چونكه خویایه دو سالێن بۆری سیسته‌مێ خواندنا ئه‌لكترۆنی شكه‌ستن ئینایه، بڕیارا وه‌زاره‌تا په‌روه‌ردێ كو تێدا هاتیه قوتابی دشێت ب سیسته‌مێ ئه‌لكترۆنی به‌رده‌وامیێ بده‌ته خواندنێ جوره‌كێ دو دلی و باوه‌ر بخۆ نه‌بوونێ دێ په‌یداكه‌ت، ئێك شێوازێ خواندنێ زێده‌تر دێ سه‌ركه‌فتی بیت نه‌ك چه‌ند جوره‌ك هه‌بن، سالێن بۆری قوتابی و كه‌س و كارێن وانا پێگیری خواندنا سیسته‌مێ ئه‌لكترۆنی نه‌بووینه، ئه‌زموونا دو سالێن بۆری نابیت بهێته ژبیركرن و قوتابیان زیانێن زۆر هه‌بووینه لسه‌ر ده‌ستێ بڕیارا خواندنا ئه‌لكترۆنی، ژبه‌ركو خواندنا ئه‌لكترۆنی ژی پێدڤیێن خۆ هه‌نه و دڤێت پێگیری ب سیسته‌مه‌كی بهێته‌كرن و هه‌موو به‌رهه‌ڤی ژی بۆ هاتبنه‌كرن، به‌رۆڤاژی ماده‌م یێ سه‌ركه‌فتی نینه بۆچی دوباره بهێته بجه ئینان.
لدۆر بڕیارێن نوو به‌ری ده‌ستپێكرنا سالا خواندنێ ئه‌ڤی به‌رپرسێ ئێكه‌تیا مامۆستایان گۆت” ره‌نگه مه‌ره‌ما وه‌زیرێ په‌روه‌ردێ و وه‌زاره‌تێ ل ده‌ركرنا بڕیارێن نوو ئه‌ڤه‌بیت دگه‌ل گۆهڕینا ره‌وشا كۆرۆنایێ بڕیارێن نوو بهێنه‌دان بۆ نموونه ئه‌گه‌ر ره‌وشا كۆرۆنایێ دژوار ببیت پێشبینی هه‌یه ده‌ستپێكرنا ده‌واما قوتابخانان بهێته پاشخستن، ئه‌ڤه دێ مینیت لسه‌ر راپۆرتا ساخله‌می، ره‌وش یا گونجای بیت ئه‌ڤه دێ هه‌موو رۆژه‌كێ ده‌وام هێته‌كرن، به‌رۆڤاژی ئه‌گه‌رێن دی لبه‌ر ده‌ست هه‌نه ئێك ژوان حه‌فتیێ سێ رۆژان ده‌واما قوتابخانان بهێته‌كرن، بڕیارا وه‌زاره‌تا په‌روه‌ردێ گرێدایی راپۆرتێن وه‌زاره‌تا ساخله‌میێ و لایه‌نێن په‌یوه‌ندیداره ئه‌م هه‌موو دخوازین ره‌وش ئاسایی ببیت و ژیانا مامۆستا و قوتابی مه‌ترسیێ دا نه‌بیت ده‌مێ ده‌ستپێكرنا ده‌وامێ.
به‌رهه‌م مسته‌فا ئاماژه‌كر” ئێكه‌تیا مامۆستایان دگه‌ل ده‌ستپێكرنا ده‌واما قوتابخانانه لڕۆژا 14ی ئیلوونێ، ب مه‌رجه‌كی پێدڤیێن خۆ پاراستنێ بهێنه به‌رده‌ستكرن بۆ قوتابی و مامۆستا، هه‌روه‌سا زۆرترین مامۆستا ڤاكسینا دژی كۆرۆنایێ بكار بینن، چه‌ندین بنگه‌هێن ساخله‌می تایبه‌تن ب ڤاكسینا مامۆستا، هه‌تا زۆرترین هژمارا مامۆستا ڤاكسینێ بكار بینن، ئه‌م باوه‌رین دوماهیێ دانانا ڤاكسینێ بۆ مامۆستا دێ بیته مه‌رج، مخابن وه‌كی هه‌موو ته‌خێن دی مامۆستاژی وه‌ك پێدڤی پێگیر نینن ب دانانا ڤاكسینێ، به‌لێ یا فه‌ره مامۆستا ڤاكسینێ بكار بینن، چونكه دێ گیانێ وانا یێ پاراستی بیت هه‌گه‌ر خودێ نه‌كه‌ت تووشی ڤایرۆسا كۆرۆنایێ ژی ببن مه‌ترسی لسه‌ر ژیانا وان نابیت، دڤێت خه‌لك ب گشتی و مامۆستا بتایبه‌ت بهێنه هشیاركرن لدۆر مفایێن لێدانا ڤاكسینێ، ئه‌ركێ به‌رپرسێن حوكمه‌تێ یه ب رێیا دزگه‌هێن راگه‌هاندنێ وه‌لاتیان پشتڕاست بكه‌ن لدۆر كاریگه‌ریێن ڤاكسینێ، هه‌تا مامۆستاژی پشتڕاست بن لدۆر بكار ئینانا ڤاكسینێ.
