مامۆستایه‌كێ زانكویێ: د جڤاكی دا وه‌كو پێدڤی گرنگی ب قووناغا ده‌زگریێ نه‌هاتیه دان
ئه‌ڤرۆ ، زنار تۆڤی:
قووناغا ده‌زگریێ، قووناغه‌كا هه‌ره گرنگ و هه‌ستیاره دناڤبه‌را كور و كچان دا بتایبه‌ت د ڤێ قووناغا ژیانێ دا، هه‌ردو دێ شاره‌زایی سالوخه‌تێن ئێكدو بن، لێ مخابن هه‌تا نوكه وه‌كو پێدڤی گرنگی ب ڤێ قووناغێ نه‌هاتیه دان، له‌وما پشتی پێكئینانا ژیانا هه‌ڤژینیێ، گه‌له‌ك ئاریشه دناڤبه‌را ژن و مێران دا په‌یدا دبن و دگه‌هنه قووناغا ژێكجۆدابوونێ، یان ژی هه‌بوونا ئاریشێن به‌رده‌وام دناڤبه‌را وان ژن و مێران دا.
د. كه‌ریم شه‌ریف قه‌ره‌چه‌تانی، مامۆستایێ زانكۆیا سلێمانیێ و و بسپۆرێ ده‌روونی، د دیداره‌كێ دا بۆ ئه‌ڤرۆ دیار كر، قووناغا ده‌زگریێ گه‌له‌ك یا گرنگه د ژیانا كور و كچان دا، هه‌رچه‌نده هه‌تا نوكه د جڤاكی دا، وه‌كو پێدڤی گرنگی ب ڤێ قووناغێ نه‌هاتیه دان و گه‌له‌ك ژ ژنان تووشی ژێكجۆدابوونێ بووینه و گه‌له‌ك ژ وان ژنان دایه دیار كرن كو هه‌ڤژینێن وان ل گه‌ل وان د خراب بووینه، گۆتنێن كرێت گۆتینه وان و ئه‌و ئێشاندینه و توندۆتیژی ل هه‌مبه‌ری وان ب كارئینایه.
قه‌ره‌چه‌تانی د به‌رده‌وامیا ئاخفتنێن خوه‌دا گۆت: (ئه‌ڤه ژ وێ چه‌ندێ په‌یدا بوویه، كو د قووناغا ده‌زگریێ دا وه‌كو پێدڤی ئه‌و د ئێكدۆ نه‌گه‌هشتینه، هه‌روه‌سا به‌ری ژن ئینانێ، قووناغا ده‌زگریێ هاتیه دانان، داكو ئه‌و كور و ئه‌و كچه شاره‌زایی ئێكدو ببن و كار و ره‌فتارێن ئێكدو بزانن، له‌وما یا گرنگه كچ له‌زاتیێ د شووكرنێ دا نه‌كه‌ن و كور ژی له‌زاتیێ د ژن ئینانێ دا نه‌كه‌ن و دیسان نه‌هێلن كه‌سێ سیێ بهێته د ژیانا وان دا باشتره، ئه‌و ب خوه ئاریشێن خوه چاره‌سه‌ر بكه‌ن و نه‌هێلن كه‌س مایتێكرنێ د ژیانا وان دا بكه‌ت).
بسپۆرێ ده‌روونی ئه‌و چه‌نده ژی دا زانین كو دناڤا مرۆڤان دا چه‌ند كه‌سایه‌تی هه‌نه، ژ وان ژی هنده‌ك كه‌سایه‌تی هه‌نه، ب ئێشاندنێ و شكاندنا مرۆڤان بێهنا وان دهێت و پێ كه‌یف خۆش دبن، هنده‌ك كه‌س هه‌نه خه‌مۆكینه، به‌رده‌وام خه‌م و ژان د ژیانا وان دا هه‌نه، هه‌روه‌سا هنده‌ك كه‌س هه‌نه دو دلن و هنده‌ك ژی هه‌نه دلێ وان یێ پیسه، مرۆڤ چو ژ وان نزانیت، له‌وما یا گرنگه د ده‌مێ ده‌زگریێ دا ئه‌ڤ تشته بهێنه زانین و گۆت: (هه‌رچه‌نده چو كه‌س د قووناغا ده‌زگریێ دا 100% هه‌موو ساخله‌ت و كار و ره‌فتارێن ئێكدو نزانن، به‌لێ دێ هنده‌ك تشت ژێ دیار بن، وه‌كو دل پیسی و هنده‌ك ره‌فتارێن دیتر یێن كرێت).
ماموستایێ زانكویێ ئاماژه بڤێ چه‌ندێ ژی كر كو هه‌كه ئه‌ڤ چه‌نده ل ده‌ف ئێك ژ وان هه‌ردویان دیار بوو، ل وی ده‌می دشێن هه‌لویستی وه‌ربگرن، كا دێ ل گه‌ل ئێكدو به‌ردوام بن، یان نه؟، هه‌موو ره‌فتار بۆ وان هه‌ردویان دێ دیار بن، كو ئه‌و كه‌سێ وان هه‌لبژارتی كۆمه‌كا سالۆخه‌تان تێدا هه‌یه و ل گه‌ل ئێك ناگۆنجن و گۆت: (له‌وما هه‌كه د قووناغا ده‌زگریێ دا ژێكجۆدا ببن باشتره ژ هندێ پشتی شووكرنێ و هه‌بوونا زارۆیان ژێكڤه ببن).
