رێڤه‌به‌رێ قوتابخانه‌كێ:نه‌مانا مامۆستا ل ده‌واما قوتابخانێ زیانێن خوه هه‌نه
ئه‌ڤرۆ، سالار محه‌مه‌د دۆسكی:
رێڤه‌به‌رێن هژماره‌كا قوتابخانا مانا مامۆستا ل قوتابخانێ پشتی ب دووماهی هاتنا وانێن وی بگرنگی دبینن، ئاماژه دكه‌نه وێ چه‌ندێ كو ژ نه‌بوونا بریاره‌كا ئێكگرتی نوكه هه‌ر قوتابخانه‌ك وه‌ك خوه سه‌رده‌ریێ ل گه‌ل مان و ده‌ركه‌فتنا مامۆستا ژ قوتابخانێ دكه‌ت.
مامۆستا صه‌لاح محه‌مه‌د عومه‌ر، رێڤه‌به‌رێ قوتابخانا رۆژ ل سنورێ په‌روه‌ردا ئامێدیێ بۆ به‌رپه‌رێ په‌روه‌رده و زانكۆ رۆژناما ئه‌ڤرۆ گۆت: ئێك ژ مفایێن مانا مامۆستا ل قوتابخانێ ده‌مێ سه‌میانێن قوتابیان دهێنه قوتابخانێ و پرسیارا زارۆكێن خوه دكه‌ن و هه‌كه مامۆستا ده‌ركه‌ت بیت دێ پرسیارا ژكێ كه‌ت و مانا وی دبه‌رژوه‌ندیا سه‌میانا دایه و كارگێریێ ژی دایه، قوتابخانه دهێته پێكینان ژ چه‌ندین لژنا و هه‌كه مامۆستا نه‌ما ل قوتابخانێ ئانكو چ كار ناهێته‌كرن و كارێ قوتابخانێ ل سه‌ر لژنا دهێـه دابه‌شكرن و رێڤه‌به‌ر و هاریكار نه‌شێن وی كاری هه‌میێ بكه‌ن و نه‌مانا مامۆستا ل قوتابخانێ كارێ لژنێن قوتابخانێ ناهێته‌كرن، گه‌له‌ك جاران كێشه‌ك دروست دبیت و كارگێریێ پێدڤی ب هه‌بوونا مامۆستایه وه‌ك ئه‌ندامێن لژنێ بۆ دیفچوون و بریاردان ل سه‌ر وێ كێشێ و هه‌كه مامۆستا نه‌یێ به‌رهڤ بیت ئه‌و كێشه دێ چه‌وا هێته چاره‌سه‌كرن، كومبوونانێ، كارگێریێ بووینه ئاریشه ل گه‌ل مامۆستا و لدووف رێنما نابیت ده‌واما قوتابخانێ بهێته تێكدان ل سه‌ر كومبوونێ و پتریا كومبوونا ل وانا شه‌شێ دهێنه‌كرن و مامۆستا ژی ل وانا چارێ چوویه مال چونكه وانَن خوه كرینه و ده‌ركه‌فتیه و ئه‌ڤه ژی دبیته بارگرانی بۆ كارگێریا قوتابخانێ.
هه‌مان رێڤه‌به‌ر ئه‌و ژی گۆت: هه‌كه بێژین ژ به‌ر په‌ژیكا كورۆنایێ گرنگه مامۆستا بچیته مال باشه پا چه‌وا مامۆستا دشێت پێنچ وانا بكه‌ت ل پولێ دا و هه‌ر پوله‌كێ پتر ژ 30 قوتابیان تێدا هه‌نه، ده‌ركه‌فتنا مامۆستا ژ قوتابخانێ نوكه بوویه دیارده ل پتریا قوتابخان و ئه‌ڤه ژی په‌یدا بوو ده‌مێ كورونا ده‌ست ده‌ركه‌فتی و په‌روه‌ردێ خواست مامۆستا ل قوتابخانێ نه‌مینن ،نوكه ئه‌ڤ كێشه دورست بوویه و ره‌نگه قوتابخانه‌ك ل ته‌نشت قوتابخانا ته هه‌بیت و مامۆستا وانا خوه بكه‌ت و ده‌ركه‌ڤیت و قوتابخانه هه‌بیت ژی مامۆستا بمینت و مامۆستا دێ بێژن مامۆستا بوو ئه‌م دمینن و مامۆستایێن قوتابخانێن دی ده‌ر دكه‌ڤن و بڤی ره‌نگی مه پێدڤی ب بریاره‌كێ هه‌یه.
په‌روین محسن عه‌بدوالرحیم رێڤه‌به‌را قوتابخانا مازی ئێك، ل سنورێ په‌روه‌ردا دهۆك یا رۆژئاڤا بۆ به‌رپه‌رێ په‌روه‌رده و زانكۆ رۆژناما ئه‌ڤرۆ گۆت: چوونا مامۆستا ژ قوتابخانێ باشی و خرابیێن خوه هه‌نه، باشی ده‌مێ وانێن خوه دكه‌ن و دچن مال، گیان و ساخله‌می یا مامۆستا ناكه‌ڤیته مه‌ترسیێ دا، دیسا كومێن مامۆستا ناهێنه دروستكرن و بیته بارگرانی بۆ كارگێریێ، هه‌مان ده‌م مانا مامۆستا ل قوتابخانێ باشیێن خوه هه‌نه‌ن هه‌ر سه‌میانه‌كێ سه‌ردانا قوتابخانێ كه‌ت و مامۆستا یێ به‌رهه‌ڤ بیت دێ پێزانینیا ل سه‌ر قوتابیان ده‌ته دایك و بابا، لده‌م بهێنڤه‌دانا قوتابیان دناڤبه‌را وانێ بۆ وانه‌كا دی دێ چاڤدێریا قوتابیان كه‌ت و دێ زێده‌تر قوتابی دپاراستی بن، ماوێ‌َ بێ كار دا دشێت گه‌نگه‌شێ ل گه‌ل هه‌ڤالێن خوه ل سه‌ر بابه‌تێ خوه بكه‌ت و زێده‌تر زانیاریا وه‌ربگریت و زێده‌تر بگه‌هینته قوتابیان و بیته جهێ مفا وه‌رگرتنێ، سیسته‌مێ برتش كانسل هه‌یه و هه‌ر هه‌می مامۆستا ئه‌ندامێن لژنێن قوتابخانێ دا و مانا مامۆستا لێ قوتابخانێ ره‌نگه ئه‌و لژنه باشتر كارێ خوه بكه‌ن و پتر داهێنانێ بكه‌ن، گه‌له‌ك جارا هاریكاریا كارگێریا قوتابخانێ دكه‌ت بۆ هه‌ر كاره‌كی و دیسا پاقژیا قوتابخانێ دهێته پاراستن.
مامۆستا په‌روین رێڤه‌به‌را قوتابخانا مازی ئێك ئه‌و ژی گۆت: رێڤه‌به‌ر و هاریكار كارێ كارگێری دكه‌ن و انا دبێژن و گه‌له‌ك ماندی دبن و هه‌می ده‌واما خوه دكه‌ت و به‌رامبه‌ر مامۆستا وانا خوه دكه‌ت و ده‌ر دكه‌ڤیت و مووچه‌كێ باش ژی وه‌ردگریت و هه‌كه وه‌زیرێ په‌روه‌ردێ بكه‌ته بریار و هه‌ر مامۆستایه‌كێ ده‌ركه‌ڤیت 150 هزار دینار ژێ بهێنه برین و بده‌نه مامۆستایێ، چالاكیان دكه‌ن و ئه‌وێن برێڤه‌دبه‌ن و بڤی ره‌نگی دێ خزمه‌تا قوتابخانێ باشتر لێ هێت و داخاز دكه‌ین ئه‌ڤ بابه‌ته جه‌نابێ وه‌زیری بكه‌ته بریار.
نزار سه‌لیم سه‌عید رێڤه‌به‌رێ قوتابخانا سیریێ یا كه‌ڤن ل سنورێ په‌روه‌ردا قه‌زا ئامێدیێ بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت:گرنگه هه‌ر مامۆستایه‌ك وانا خوه بكه‌ت و بچته مالا خوه چونكه كاودانێن ساخله‌میێ و په‌تایا كورونایێ نه‌یا هاریكاره مامۆستا ل قوتابخانێ بمینت، مانا مامۆستا بێ كار ل قوتابخانێ دێ ئاریشا بۆ كارگێریێ دروست كه‌ت و ره‌نگه كوتله دروست بن و كێشه زێده‌تر لێ بهێن، دیسا پێشتر وه‌زیرێ په‌روه‌ردێ ژی دیاركر بوو كو هه‌ر مامۆستایه‌كێ وانا خوه گۆت یێ ئازاده بچیته مال و ئه‌ڤه ژی ژ به‌ر پاراستنا ساخله‌می یا مامۆستا و قوتابیان، هه‌كه مامۆستا رۆژێ دو وانه هه‌بن و ده‌مژێر هه‌شت هه‌تا دوازده‌ی نیڤرۆ ما ل قوتابخانێ وی ده‌می دێ چكه‌ت
رێڤه‌به‌رێ قوتابخانا سیریێ ئه‌و ژی گۆت: 16 مامۆستا ل قوتابخانا من هه‌نه و شه‌ش پول هه‌نه و هه‌كه رۆژانه هه‌می به‌رهه‌ف بن دێ شه‌ش مامۆستا وانا بێژن و دێ 10 مامۆستا بێ كار مینن و نابینم مفا ژ مانا وان بهێته وه‌رگرتن.
