سه‌رۆكێ پشكا رابه‌ری یا په‌روه‌ردێ ل زانكۆیا دهۆك: دڤێت زانكۆ پێدڤیێن جڤاكی و بازاری به‌رهه‌ڤ بكه‌ت
ئه‌ڤرۆ ،سالار محه‌مه‌د دۆسكی:
سه‌رۆكێ پشكا رابه‌ری په‌روه‌رده ل كولیژا په‌روه‌ردا بنیات ل زانكۆیا دهۆكێ، ئاشكراكر كو گرنگه كونفرانسه‌ك ل سه‌ر ئاستێ زانكۆیێن پارێزگه‌هێ بهێته‌گرێدان پێخه‌مه‌ت بلندكرنا كوالێتی یا خواندنێ و دووڤ دا ئه‌و كونفرانس ل سه‌ر ئاستێ كوردستانێ بهێته‌گرێدان.
د.محه‌مه‌د سه‌عید، سه‌رۆكێ پشكا رابه‌ری په‌روه‌رده ل كولیژا په‌روه‌ردا بنیات ل زانكۆیا دهۆكێ بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: گرنگه كوالێتی یا خواندنێ ل هه‌ر دو خواندنێن ئێڤاران و سپێده‌هیان دا هه‌بیت و دڤێت كار بۆ ئه‌ڤێ چه‌ندێ بهێته‌كرن، لێ دڤێت مرۆڤ مفایێ خواندنا ئێڤاران ژی ل به‌رچاڤ وه‌ربگریت چونكه هاتنا قوتابیان بۆ كولیژێ ده‌رفه‌ته‌كه خواندنا خوه ته‌مام بكه‌ت، زانكۆیێن ئه‌هلی و نه حوكمی بهایێ خواندنێ گه‌له‌كێ گرانه و جڤاكێ كوردی ژی هه‌ر خێزانه‌كێ گه‌له‌ك زارۆك هه‌نه و ره‌نگه كاودانێن ئابووری نه دهاریكاربن كرێیا خواندنێ بۆ هه‌می زارۆكێن خوه دابین بكه‌ت، قوتابیێ نه‌هێـته خواندنا ئێڤاران دێ كیڤه چیت و گرنگه پێ گوهور هه‌بیت و كار ل سه‌ر په‌یمانگه‌هێن پیشه‌ی بكه‌ن و گرنگ ئه‌وه فێری پیشه‌یه‌كێ بیت و به‌رده‌وامیێ بده‌ته ژیانا خوه و هه‌مان ده‌م دڤێت ده‌رفه‌ت بۆ ده‌رچوویێن زانكۆیێ ژی بهێته خوشكرن و كار بۆ بهێنه دیتن.
د.محه‌مه‌د سه‌عید ئه‌و ژی گۆت:جوداهی دناڤبه‌را قوتابیێن سپێده‌هی یان و ئێڤاران دا هه‌یه چونكه ئه‌و قوتابیێ سپێده‌هی یا دخوینت ره‌نگه تێكرا نمرێن وی ژ 75 كێمتر نه‌بیت و خودانێ ئه‌ڤان نمرا شیانێن زێده‌تر هه‌نه و دژیانێ دا جوداهی هه‌یه، لێ هه‌مان ده‌م هه‌ر ده‌م مامۆستایێن زێده‌تر شیان هه‌ین مه بۆ ده‌واما ئێڤارا ژێدگرتن و مه داخاز ژێ دكر دا كوالێتی یا خواندنێ باشتر لێ بهێت.
سه‌رۆكێ پشكا رابه‌ری په‌روه‌رده ئه‌و ژی گۆت: هاتنا قوتابیان بۆ خواندنا ئێڤاران وه‌ك هاریكاری و بها باشتر بوویه و هاریكاریا خه‌لكی بوویه، بگرتنا پشكا ئێڤاران دێ گه‌له‌ك خه‌لك مینته ل ده‌رڤه و نه‌شێت بخوینت چونكه بهایێ خواندنا زانكۆیێن ئه‌هلی یا گرانه و ره‌نگه ئه‌ڤ پێنگاڤه كارتێكرنێ ل وی كه‌سی بكه‌ت و نه‌هێته وه‌رگرتن و ره‌وشه‌نبیریا وی كێمتر بیت ژ كه‌سه‌كێ دی و هیڤیا مه ئه‌وه هه‌ر پێنگاڤه‌كا بهێته هاڤێتن هه‌می تشت ل به‌رچاڤ بهێته وه‌رگرتن.
سه‌رۆكێ هه‌مان پشك ئه‌و ژی گۆت: گرنگ بوو هه‌می زانكۆیێن پارێزگه‌ها دهۆكێ كار ل سه‌ر بلندكرنا كوالێتی یا خواندنێ كربا و باشتر بوو كونفرانسه‌كێ سه‌رانسه‌ری هاتباكرن و ل سه‌ر ئاستێ كوردستانێ ژی ئه‌ف كاره هاتباكرن و كا ب چ ره‌نگ و شێوه دێ شێن كوالێتی یا خواندنێ پێشڤه‌به‌ن و دێ زانكۆ چه‌وا شێت كه‌سه‌كی به‌رهه‌ڤ كه‌ت لدیف پێدڤیێن بازاری و بڤی ره‌نگی دێ سه‌ركه‌فتی تربن.
