ل قوتابخانا ره‌زا مامۆستا پترن ژ قوتابیان
دهۆك، نه‌وزاد هلۆری:
قوتابخانا ره‌زا كو دكه‌ڤیته ناڤا چاكسازیا ئافره‌ت و سنێله‌یان ل دهۆكێ ل سالا 2003ێ هاتیه دامه‌زراندن و مه‌ره‌م ژی ئه‌و بویه كو خواندنا قوتابی ژێ نه‌چیت و هه‌ڤده‌م ئه‌و كه‌سێن وه‌كو قوتابی ل وێ قوتابخانێ دخوینن بهێنه په‌روه‌رده‌كرن، رێڤه‌به‌رێ قوتابخانێ ژی دیاركر كو چوو جوداهی دناڤبه‌را قوتابخانا وان و قوتابخانه‌كا دن دا نیه.
به‌یار دێڕه‌شی، رێڤه‌به‌رێ قوتابخانا ره‌زا ل چاكسازیا ئافره‌ت و سنێله‌یان ل دهۆكێ بۆ رۆژناما ئه‌ڤرۆ گۆت: (ل سالا 2003ێ قوتابخانا ره‌زا ب مه‌ره‌ما بێ به‌هرنه‌بوونا وان كه‌سێن كو وه‌كو گرتی ل چاكسازیا ئافره‌ت و سنێله‌یان دمینن هاتیه چێكرن و ژ وێ سالێ هه‌تا نوكه خواندن تێدا به‌رده‌وامه و سه‌دان سنێله‌یان تێدا خواندیه، دیسان خاله‌كا دن یا مه‌ره‌ما دامه‌زراندنا قوتابخانا ره‌زا دزڤریت بۆ وێ یه‌كێ كو قوتابیان په‌روه‌رده بكه‌ت، داكو ئه‌و بشێن وان ره‌فتاران بگوهریت كو بویه ئه‌گه‌ر بكه‌ڤیته ناڤا چاكسازیێ دا).
زێده‌تر گۆت: (هه‌ر سنێله‌كێ بخوازیت بخوینیت یێ ئازاده و چوو زوری ل سه‌ر نینه كو ئیلا بخوینیت یان ژی نه‌خوینیت، هنده‌ك ژ وان هه‌یڤه‌كێ یان دوو هه‌یڤان و چوار هه‌یڤان و هنده‌ك ژی چه‌ند ساله‌كا ل ڤێره دخوینیت، د نوكه دا پولا چوارێ و پولا پێنجێ و پولا شه‌شێ و پولا هه‌شت و پولا بنه‌ره‌تی هه‌یه، نوكه مه حه‌فت قوتابی ل هه‌موو پولان هه‌نه كو هه‌ر ژ پولا ئێكێ بنه‌ره‌تی هه‌تا پولا نه‌هێ بنه‌ره‌تی خواندن هه‌یه، بێگومان پشتی ڤه‌كرنا قوتابخانێ كارتێكرنێن زۆر باش ل سه‌ر ره‌وشت و ئاستێ هوشیاریا قوتابیان هاتیه‌كرن).
رێڤه‌به‌رێ قوتابخانێ دیاركر ژی كو ئه‌گه‌ر قوتابیه‌كێ وان به‌ری دوماهی هاتنا وه‌رزێ خواندنێ بهێته ئازادكرن دێ زڤریته‌ڤه قوتابخانا خوه یا به‌رێ ب تنێ د حاله‌تێ ئه‌زموونێن دوماهیا سالێ نه‌بیت ژبه‌ركو ڤه‌گوهاستن نامینیت ب تایبه‌تی پشتی هه‌یڤا چوارێ و تنێ دێ تاقیكرنان هێته قوتابخانا ره‌زا و گۆت ژی: (خواندن ل قوتابخانێن ده‌رڤه‌یێ چاكسازیێ چه‌وایه و قوتابیان چوو ماف هه‌یه، ب هه‌مان شێوه‌یه ل قوتابخانا ره‌زا ژی وه‌سایه و هه‌مان ئه‌رك و ماف هه‌نه، سوپاس بۆ خودێ ماموستایێن تایبه‌تمه‌ند هه‌نه كو هژماران وان دبنه 13 ماموستا، ره‌فتارا مه و قوتابیان وه‌كو دایك و باب و زاروكانن، ئه‌م ره‌فتاره‌كا وه‌سا ل گه‌ل دكه‌ین كو هه‌ست نه‌كه‌ت تاوانباره و خوان ئاریشه‌یه).
به‌یار دێڕه‌شی د درێژاهیا ئاخفتنێن خودا دیاركر ژی كو ئه‌و ژی سالانه چالاكیان وه‌كو قوتابخانێن دن ئه‌نجام دده‌ن و گۆت ژی: (بو قوتابیان بسكوێت و شه‌ربه‌ت و ئاڤ و كه‌لوپه‌لێن خواندنێ دهێنه‌دان، په‌یوه‌ندیه‌كا باش دناڤبه‌را مه و خێزانێن وان هه‌نه ژبه‌ركو هه‌ر ماله‌كا ل باژێره‌كێ، ئه‌م دخوازین كو ئه‌و قوتابیێن ل ڤێره ده‌ردچن ل ده‌رڤه ژی به‌رده‌وامیێ ب خواندنێ بده‌ن و هنده‌ك ژ وان ژی خواندنا خوه دوماهی ئینایه و هنده‌ك ژی چوینه زانكویان.
