ل پتریا قوتابخانا گه‌شتێن زانستی هاتینه راوستاندن
ئه‌ڤرۆ ، سالار محه‌مه‌د دۆسكی”
پتریا رێڤه‌به‌رێن قوتابخانا هه‌بوونا گه‌شتێن زانستی و چالاكیێن هونه‌ری ل قوتابخانێ بگرنگی دبینن و داخازێ دكه‌ن ئه‌ڤ كاره بهێته ئه‌نجامدان.
مامۆستا مه‌سعود لاوه‌ند ته‌حلو رێڤه‌به‌رێ قوتابخانا جودی ل په‌روه‌ردا زاخۆ بۆ رۆژناما ئه‌ڤرۆ گۆت: ئه‌ڤه چه‌ندین سال بوو ده‌وام ل قوتابخانێ نه‌بوو و پتر گرنگی ب پاقژكرنێ دهاته‌دان ل قوتابخانێ، هه‌مان ده‌م گه‌شتێن زانستی گه‌له‌ك گرنگیا خوه هه‌یه ل قوتابخانێ بهێنه ئه‌نجامدان، ئارمانج ژ گه‌شتێن زانستی ئه‌وه قوتابی ژ وی سه‌قایێ خواندنێ دوور كه‌ڤیت ئه‌وێ سالێ هه‌میێ تێدا و پتر په‌یوه‌ندی دناڤبه‌را مامۆستا و قوتابیان دا بهێته خورتكرن و ئه‌ڤه جودایه سه‌قایێ پولێ و قوتابخانێ.
هه‌مان رێڤه‌به‌ر ئه‌و ژی گۆت: پێشتر گه‌شتێن زانستی هه‌بوون و بیرهاتن بوون بۆ زارۆكان و هه‌ر چ جورێ گه‌شتێ بیت گرنگیا خوه هه‌یه و پتر جهێن گه‌شتیاری و شینواری تایبه‌ت مه‌ندیا خوه بۆ زارۆكی گه‌له‌ك هه‌یه و بیرا مه‌دهێت ده‌مێ زارۆك و مه گه‌شتیێن زانستی ئه‌نجام دان گه‌له‌ك كه‌یفا مه دهات و هه‌تا نوكه ئه‌و بیرهاتن ل بیرا مه‌نه و گرنگه مامۆستا و قوتابخانه كار ل سه‌ر ئه‌نجامدانا گه‌شتێن زانستی بكه‌ن.
هه‌مان رێڤه‌به‌ر گۆتژی: خوه‌شیا گه‌شتێ دوێ چه‌ندێ دایه ده‌مێ قوتابی رۆژه‌كێ به‌ری ئه‌نجامدانا گه‌شتێ به‌رهه‌ی یا دكه‌ت و دزانیت سوباهی دێ قوتابخانا وی چیته گه‌شته‌كێ و به‌رهه‌ڤیێن ته‌مام بۆ ڤێ چه‌ندێ دكه‌ت.
مامۆستا تارق سه‌عید عه‌باس رێڤه‌به‌رێ قوتابخانا بیرێ ل په‌روه‌ردا ئامێدیێ بۆ رۆژناما ئه‌ڤرۆ گۆت:گرنگه قوتابخانێ به‌رنامه‌كێ دارێتی و رێخكستی هه‌بیت بۆ ئه‌نجامدانا گه‌شتێن زانستی چونكه ئه‌ڤ گه‌شته گه‌له‌ك ب مفانه و پتر قوتابی دێ حه‌ز ل سه‌ر خواندنێ هه‌بیت و دێ ئاستێ ویێ زانستی بلند بیت.
هه‌مان رێڤه‌به‌ر گۆت: چونكه ئه‌نجامدانا گه‌شتان پێدڤی ب پاره‌كی و داهاته‌كی یه هه‌تا نوكه وه‌ك قوتابخانا مه چ گه‌شتێن زانستی ئه‌نجام نه‌داینه و مه هیڤی هه‌نه رۆژێن بهێت گه‌شتێن زانستی ئه‌نجام بده‌ین، هه‌ر چ جهه‌كێ هه‌بیت قوتابی سه‌ردانێ بۆ بكه‌ن مفایێ خوه هه‌یه و ئه‌و جه ل مێشكێ زارۆكی دا گه‌له‌ك مه‌زن دبیت و دبیته بیرهاتن هندی دژیانێ دا هه‌بیت و هه‌می قوناغا پێدڤی ب گه‌شتێن زانستی هه‌یه به‌لێ قوتابیێن ئاماده‌یی زێده‌تر پێدڤی ب هه‌بوونا گه‌شتێن زانستی هه‌یه و سه‌ره‌دانا زانكۆ و په‌یمانگه‌هان بكه‌ن و پێزانیان ل سه‌ر وه‌ربگرن.
مامۆستا محمود محه‌مه‌د سه‌لیم، رێڤه‌به‌رێ قوتابخانا مام یه‌زدینا ل سنورێ په‌روه‌ردا شێخان بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت:چالاكیێن هونه‌ری و گه‌شتێن زانستی گه‌له‌ك گرنگیا خوه هه‌یه ل قوتابخانێ و گرنگه ئه‌ڤ گه‌شته بهێنه ئه‌نجامدان چونكه قوتابی دێ چه‌ندین وانا ل سه‌ر ئێك وه‌رگریت وه‌ك بیركاری و زانست و كوردی و كومه‌لایه‌تی و مێشكێ وی دێ تژی بیت وی ده‌می ئه‌و قوتابی پێدڤی ب بهێنڤدانه‌كا ب مفا هه‌یه وه‌ك گه‌شته‌كا زانستی و گرنگه بۆ وێ چه‌ندێ گه‌شتێن زانستی بهێنه ئه‌نجامدان و دیسا ئه‌ڤه بزاڤه‌كا گه‌له‌ك باشه بۆ قوتابخانێ..
هه‌مان رێڤه‌به‌ر گۆت: ژ به‌ر په‌ژیكا كورونایێ هه‌تا نوكه قوتابخانا مه چ گه‌شتێن زانستی ئه‌نجام نه‌داینه و دو هه‌یڤان خواندنا ئه‌لكترونی بوو و ده‌رگه‌هێن قوتابخانا هاتنه داخستن و هه‌تا راده‌كی خواندن هاته راوستاندن و ئه‌ڤه دو سال بوو مه گه‌شت زانستی و چالاكیێن هونه‌ری ل قوتابخانێ نه‌بوون.
هه‌مان مامۆستا گۆتژی:گرنگه قوتابی پشكداری پیشانگه‌هان بیت و تایبه‌ت ده‌مێ هه‌ڤركی دناڤبه‌را قوتابخانان دا دروست بیت و پتر قوتابخانه پێدڤی ب پاره‌ی نه و گرنگه هه‌یڤێ جاره‌كێ قوتابی گه‌شته‌كێ بكه‌ت و سه‌ردانا فه‌رمانگه‌هه‌كێ بكه‌ت و مفایی وه‌ربگریت و قوتابخانه ژی دێ پێش كه‌ڤیت.
