پشكداریا ئافره‌تا كه‌مینه ل كوردستانێ پتره ژ عیراقێ
دهۆك، نه‌وزاد هلۆری:
پشكه‌ك ژ سازیێن جڤاكی بزاڤێن خورت دكه‌ن كو رێژا پشكداریا ئافره‌تان د ناڤه‌ندێن بریاردانێ دا ل سازیێن جودا زێده بكه‌ن، ب تایبه‌تی زێده‌كرنا ئافره‌تێن یێن كو دناڤ پێكهاته و كه‌مینه‌یێن كوردستانێ دژین،
دلژین عه‌بدوللا، رۆژنامه‌ڤانه دیار كر كو د نوكه دا رێژا پشكداریا ئافره‌تان د جهێن بریاردانێ دا زێده‌تر دهێته دیتن و گۆت: (گه‌له‌ك گرنگه كو پشكداریا ئافره‌تان د ناڤ سازیێن جودایێن حكومی و جڤاكی و سیاسی زێده ببیت، ژبه‌ركو ئه‌گه‌ر ده‌رفه‌ت بو نه‌هێته دان نه‌شێت شیانێن خوه ده‌ربێخیت).
هیوا زه‌كی، ماموستایێ زانكۆیێ یه دیار كر كو ئافره‌تا كورد پتر هه‌موو جڤاكێن جیهانێ بها و رێز هه‌یه و گۆت: (ل كوردستانێ ئه‌رك و مافێن ئافره‌تان ب هه‌موو شێوه‌یان هه‌یه و ده‌رفه‌ت ژی بو دهێته دان، ژبه‌ركو ئافره‌ت خودان شیان بویه و خوه پێگه‌هاندیه و رولێ خوه دبینیت و خوه د سه‌لمینیت كو ئه‌و ژی دشێت خزمه‌تێ بكه‌ت).
زوزان كوچه‌ر، به‌ربژارا ده‌رچوی بۆ جڤاتا نوونه‌رێن عیراقێ یا خولا داهاتی گۆت: (بێگومان ب هه‌موو شێوه‌یان كوردستان ژ عیراقێ باشتره و ده‌لیڤه پتر بۆ ئافره‌تان دایه كو بهێته پێش و شیانێن خوه دیار بكه‌ت، ئه‌ڤجا چ ل پوستێن بریاری بیت یان ژی خزمه‌تگۆزاری و دڤێت زێده‌تر ژی بینن پێش).
ژلایه‌كێ دیڤه سوزان سه‌فه‌ر، به‌رپرسا رێكخراوا داك یا گه‌شه‌پێدانا ژنا ئێزدی كو ل چه‌ند رۆژێن بوری به‌رنامه‌یه‌ك بۆ گه‌شه‌پێدانا ئافره‌تا كه‌مینه دانایه كو رولێ خوه ببینن دناڤ دام و ده‌زگه‌هێن جودا بۆ ئه‌ڤرۆ گۆت: (ئه‌م ب هه‌ڤكاریا رێكخراوا ئه‌نته‌رنیوز یا نیڤده‌وله‌تی بزاڤێن خورت بۆ ئینانه ناڤا ئافره‌تا دناڤ پێكهاته و كه‌مینه‌یان دا دكه‌ین، داكو هه‌ر چ نه‌بیت رێژا وان بهێته زێده كرن، ژبه‌ركو رێژا وان گه‌له‌ك یا كێمه، مه هه‌وه‌ك بو ده‌ما سێ هه‌یڤان ده‌ستپێكریه و دانوستاندن و چالاكیان ل گه‌ل ته‌خ و چینێن جودا دكه‌ین داكو رێژا وان زێده بیت).
سوزانێ زێده‌تر گۆت: (پشكداری كرنا ئافره‌تان دناڤ سازیێن جودا زێده‌تر ب رێژه دهێته دان یان ژی كوتایه ب تایبه‌تی دناڤ كه‌مینه‌یان دا، ئه‌م دێ ب رێیا چالاكیێن خوه بۆ رایا گشتی و جهێن شوله‌ژێ بلند كه‌ین داكو زێده‌تر كار ل سه‌ر وێ یه‌كێ بكه‌ت مفا ژ شیانێن وان بهێته وه‌رگرتن، من دڤێت بێژم ژی كو قانوونێن ب ئافره‌تان ڤه گرێدایی بۆ پاراستنا وێ باشترن ژ عیراقێ له‌وا رێژا پشكداریا ئافره‌تا كه‌مینه ژی دناڤ سازیێن جودا زێده بویه).
