دێرالۆكێ پێدڤی ب سه‌ربرخانه‌كێ هه‌یه
ئامێدیێ، مه‌حمود نهێلی
گه‌له‌ك ژ گوشت فروشان گازنده ژ نه‌بوونا سه‌ربرخانا ل ناحیا دێره‌لۆكێ هه‌نه و دیار دكه‌ن كو، ئه‌ڤ یه‌كه بوویه جهێ بێزاریا وان، ب تایبه‌تی یێن دناڤ بازاری دا و هه‌ر ژ به‌ر ڤێ یه‌كێ گه‌له‌ك جاران ئه‌ڤ گوشت فروشه هاتینه سزادان.
ئێك ژ گوشت فروشان بو رۆژناما ئه‌ڤرۆ دیار كر، هه‌تا نوكه چو جهه‌كی باش نه‌هاتیه دیتن بۆ سه‌رژێكرنا په‌ز و ئاژه‌لی و گۆت: (ئه‌ڤ یه‌كه بۆ مه وه‌ك گوشت فروشت بوویه ئاریشه، چونكو گه‌له‌ك جاران ژ به‌ر نه‌بوونا جهێ سه‌رژێكرنا ئاژه‌لی هند ژ گوشت فروشان ل به‌ر ده‌رگه‌هێ گوشتفروشیێ ئاژه‌لی سه‌ر ژێك ژ دكه‌ن و چێدبیت ئاریشه‌یێن ساخله‌میێ ژی لێ دروست ببن ئه‌ڤه زێده‌باری وێ یه‌كێ دهێنه سزادان).
ناڤهاتی داخاز ژی كر، جهه‌ك بۆ وان بهێته دابینكرن تایبه‌ت یێ سه‌رژێكرنا ئاژه‌لی هه‌م بۆ وان ژی باشه و هه‌م ژی بۆ خه‌لكێ ده‌ڤه‌رێ و بۆ حكومه‌تێ ژی، چونكو گه‌له‌ك جاران ئه‌م ل سه‌ر ڤێ یه‌كێ هاتیه سزادان.
ئه‌ندازیار عه‌بدولمه‌ناف ره‌شید سه‌رۆكێ باژێرڤانیا دێره‌لۆك بو رۆژناما ئه‌ڤرۆ دیار كر، راسته نه‌بوونا سه‌ربرخانێ ل دێره‌لۆكێ ئاریشه‌یه و گۆت: ژلایێ خوه ڤه و ب هه‌ڤكاری ل گه‌ل رێڤه‌به‌ریا ناحیێ مه بزاڤێن رژد كرینه بۆ چاره‌سه‌ركرنا ڤێ ئاریشه‌یێ، لێ دیاره ژ به‌ر چه‌ند ئاریشه‌یێن مادی نه‌هاتیه چاره‌سه‌ر كرن.
دیار كر، پێدڤیه ڤێتێرنه‌ری و ساخله‌میا ده‌ڤه‌رێ گڤاشتنێن باش ل سه‌ر ڤان گوشت فروشان بكه‌ن بۆ وێ یه‌كێ ژلایێ ساخله‌میێ ڤه زیان و مه‌ترسی ل سه‌ر هاولاتیان نه‌بن تا كو جهه‌كی تایبه‌ت بۆ دهێته دیتن و گۆت: دورێن 7 دوكانێن گوشت فروشان ل سه‌نته‌رێ ناحیا دێره‌لۆك هه‌نه هنده‌ك ژ وانا ئاژه‌لی ل سه‌ربرخانا شێلادزێ سه‌رژێدكه‌ن لێ بۆ هنده‌كا ناگونجیت ببه‌نه شێلادزێ ژ به‌ر كو دێ گران سه‌ر راوه‌ستیت.
و ته‌كه‌ست كر، پێدڤیه ژلایێ ساخله‌میێ ڤه هه‌موو ئاژه‌ل بهێنه پشكنین كرن ل هه‌ر جهه‌كی بهێته ڤه‌كووشتن به‌ری بهێته فروتن و هه‌ر گوشت فروشه‌كی بێ ختما ڤێتێرنه‌ریێ گوشتی بفروشیت دێ ل دووڤ رێنمایان سه‌ره‌ده‌ری دگه‌ل دا هێته كرن.
دیاركر ژی، هه‌تا نوكه هژماره‌كا گوشت فروشان ژلایێ ساخله‌میێ و لژنا بازاری ڤه هاتینه سزادان، ژ به‌ركو ل دووڤ رێنامیان كار نه‌كریه و گۆت: (ژ بۆ ڤه‌كرنا سه‌ربرخانێ ل دێره‌لۆكێ مه گه‌له‌ك جاران بزاڤ كرینه و ل ڤێ داویێ ژلایێ مه ڤه جهه‌ك بۆ هاتیه ده‌ست نیشانكرن و ڤه‌دیتن بۆ هاتیه كرن و راده‌ستی قایمقامێ قه‌زا ئامێدیێ هاتیه كرن و ئه‌و چاڤه‌رێ وێ یه‌كێ نه كوژمه‌كێ پاره‌ی بۆ بهێته ده‌ست نیشانكرن و ده‌ست ب چێكرنا كارێ وێ بهێته و ب ڤێ یه‌كێ ژی ئه‌ڤ ئاریشه دێ چاره‌سه‌ر بیت).
