قوربانیێن خراب بكارئینانا سوشیال میدیایێ به‌هرا پتر ئافره‌تن
ئه‌ڤرو، ئاواز یوسف جه‌میل:
سوشیال میدیایێ ژیانا مه یا داگیر كری، ب تایبه‌ت كچ ب رێیا تورێن جڤاكی یێن تووشی ئاریشێن مه‌زن دبن هه‌تا وی راده‌ی دبنه قوربانیێن خراب بكارئینانا سوشیال میدیایێ و و گه‌فێن به‌لاڤكرنا وێنه و ڤیدویێن وان لێ دهێنه كرن ژلایێ گه‌نجان ڤه.
ده‌روونناس د. ئاواز حه‌جی جه‌عفه‌ر سه‌باره‌ت بابه‌تی دیار كر كو خراب بكارئینانا سوشیال میدیایێ ڤه‌دگه‌ریت بۆ گه‌له‌ك ئه‌گه‌ران بۆ نمونه زارۆ یێ هاتیه په‌روه‌رده‌كرن نه ب شێوازه‌كێ جوان و نه ل سه‌ر رێیا حه‌زژێكرنێ و ئازادیێ به‌لكو ل سه‌ر رێیا ترسێ یێ هاتیه مه‌زن كرن و گۆت: (هه‌تا په‌روه‌ردا مه ژی ئه‌م به‌ر ب ئارسته‌كێ شاش برینه و ئه‌م نه‌شێین بۆچوونێن خوه ب ئازادانه ده‌ربرین، هه‌موو بابه‌تێن خوه د ناخێ خوه دا ڤه‌دشێرین داكو چ ئاریشه بو مه دروست نه‌بن، ده‌مێ سوشیال میدیا هاتیه دناڤ جڤاكی كه‌سێ ئه‌م هشیار نه‌كربوین ل سه‌ر چاوانیا سه‌ره‌ده‌ریكرن و بكارئینانا سوشیال میدیایێ.).
د. ئاوازێ ئه‌و چه‌نده ژی دیار كر كو هه‌ستێن مه د نه‌رێنی نه و ئه‌م ل سه‌ر شێوازێ نه‌رێنی و ترسێ هاتینه په‌روه‌رده كرن و هه‌ستێن خوه ب رێیا سوشیال میدیایێ و ئامیرێن په‌یوه‌ندی كرنێ ده‌ردبرین و هه‌ر كاره‌كێ كو دراستی دا نه‌شێین بكه‌ین ئه‌م ب رێیا سوشیالێ و ئامیرێن په‌یوه‌ندی كرنێ دكه‌ین و گۆت: سوشیال میدیایێ ده‌لیڤه‌كا مه‌زن یا دایه مه ئه‌م تاوانێن مه‌زن بكه‌ین، چ جوداهی دناڤبه‌را ژیێن كه‌سێ دا نینه هه‌موو ژی دشێن بكاربینن ب شێوه‌یه‌كێ خه‌له‌ت، كه‌سێن د ژیێن جودا دا تاوانا ل دووڤ خوه دكه‌ن ئانكو دشێن بێژین هه‌ر كه‌سه‌كی به‌هرا د خه‌له‌تیێ دا هه‌ی و گه‌له‌ك كه‌س هه‌نه گه‌فان ل ئافره‌تان دكه‌ن داكو ره‌وشتێ وان كێم بكه‌ن و گه‌له‌ك ئافره‌ت ژی هه‌نه خێزانان ژێك چودا دكه‌ن و ئاریشان دروست دكه‌ن.
سه‌باره‌ت هه‌مان بابه‌ت مقه‌دمێ مافپه‌روه‌ر هێمن سلێمان رێڤه‌به‌رێ راگه‌هاندنا پۆلیسَن دهۆكێ گۆت: ئه‌م وه‌ك رێڤه‌ربه‌ریا پۆلیسێن دهوكێ نه درازی نه ل سه‌ر بكارئینانا ئامیرێن په‌یوه‌ندی كرنێ و سوشیال میدیایێ ژ وه‌لاتیان، كو به‌رده‌وام سوشیال میدیا ژلایێ گه‌نجانڤه خراب دهێته بكارئینان و ئه‌و وه‌سا هزر دكه‌ن كو ناهێنه ده‌سته‌سه‌ر كرن.
رێڤه‌به‌رێ راگه‌هاندنا پۆلیسَن دهۆكێ گوتژی: خراب بكارئینانا سوشیال میدیایێ و تورێن جڤاكی گه‌له‌ك جورێن هه‌ین و به‌ربه‌لاڤترین كه‌یس و تاوانێن هاتینه ئه‌نجامدان ب رێیا ب ده‌ستڤه ئینانا وێنه و ڤیدویێن كچ و ژنان بون كو ئه‌و كه‌سێ وان باوه‌ری دایێ و وێنه و ڤیدیویێن خوه بو هنارتین گه‌ڤان ل وان ئافره‌تان دكه‌ن و دبێژینێ هه‌كه تو بو من هنده‌ك پاران نه‌ئینی یان تو بۆ من ڤی كاری نه‌كه‌ی دێ وێنێن ته ل تورێن جڤاكی به‌لاڤ كه‌م.
مقه‌دمێ مافپه‌روه‌ر ئه‌و چه‌نده ژی نه ڤه‌شارت كو قوربانیێن خراب بكارئینانا سوشیال میدیایێ به‌هرا پتر ئافره‌تن و تووشی ئاریشێن مه‌زن دبن و ئاریشێن وان ب رێیا قانوونێ دهێنه چاره‌سه‌ر كرن و گۆت: هه‌روه‌سا ئه‌م حه‌ز دكه‌ین هه‌ر كه‌سه‌كێ ب رێیا سوشیال میدیایێ و تورێن جڤاكی گه‌ڤ لێ بهێنه كرن بلا سكالایێ تومار بكه‌ن، رۆژانه گه‌له‌ك وه‌لاتی سكالایان تومار دكه‌ن ل سه‌ر خراب بكارئینانا سوشیال میدیایێ و تاوانبار ژی دهێنه ده‌سته‌سه‌ر كرن ژ لایێ پۆلیسان ڤه.
