” پتر ژ 30 هزار قوتابیان ل شنگال خواندنا كوردی دخوینن”
ئه‌ڤرۆ، له‌زگین جوقی
رێڤه‌به‌رێ په‌روه‌ردا قه‌زا شنگال دیار كر، دژاتیا خواندنا كوردی ل شنگال دهێته كرن كو هزار و 600 ماموستا و فه‌رمانبه‌رێن په‌روه‌ردا شنگال ل سه‌ر میلاكێ حكومه‌تا هه‌رێما كوردستانێ هاتینه دامه‌زراندن و پتر ژ 30 هزار قوتابیان ل شنگال خواندنا كوردی دخوینن”.
مه‌یسه‌ر حه‌جی سالح، رێڤه‌به‌رێ په‌روردا قه‌زا شنگال بۆ ئه‌ڤرۆ دیار كر: “پتر ژ هزار و 600 ماموستا و فه‌رمانبه‌رێن په‌روه‌ردا شنگال ل سه‌ر میلاكێ حۆكمه‌تا هه‌رێما كوردستانێ هاتینه دامه‌زراندن و مۆچێ وان ژلایێ هه‌رێما كوردستانێ ڤه وه‌ردگرن، نوكه پتر ژ 30 هزار قوتابیان ل شنگال خواندنا كوردی دخوینن و هه‌موو كه‌لوپه‌ل و پێدڤیێن خواندنێ ژلایێ حكومه‌تا هه‌رێما كوردستانێ و رێكخراوان بۆ په‌روه‌ردا شنگال دهێنه دابینكرن كو ئه‌ڤ ساله حكومه‌تا هه‌رێما كوردستانێ هه‌موو په‌رتووك بۆ په‌روه‌ردا شنگال دابین كرینه و ل سه‌ر قوتابیان هاتینه به‌لاڤكرن، پشتی ده‌مه‌كێ نێزیك دێ په‌رتووكێن وه‌رزی دوویێ ژی ل ناڤ قوتابێن په‌روه‌ردا شنگال هێنه به‌لاڤكرن”.
گه‌له‌ك ژقوتابیان چووینه قوتابخانه‌یێن عه‌ره‌بێ بخوینن، په‌شیمان بووینه
مه‌یسه‌ر حه‌جی، ئاشكه‌را كر كو: “خیانه‌تا 16 ئوكتوبه‌رێ زیان گه‌هاندیه پروسیه‌یا خواندنا كوردی ل شنگال كو بوویه ئه‌گه‌ر ئه‌و خه‌لكێ ڤه‌گه‌ریاینه شنگال پتر قوتابیان ره‌وانه‌ی قوتابخانێن عه‌ره‌بی بكه‌ن و تێدا بخوینن، لێ خواندنا عه‌ره‌بی ژی باش نینه، هه‌تا گه‌له‌ك ژ قوتابیان په‌شیمان بووینه كو چووینه قوتابخانێن عه‌ره‌بی بخوینن كو دژاتیا په‌روه‌ردا كوردی ل شنگال ژلایێ به‌غداڤه دهێـته كرن، ب تایبه‌تی ژی ئه‌و قوتابخانێن دناڤ شنگالدا هاتینه ڤه‌كرن”.
رێڤه‌به‌رێ په‌روردا قه‌زا شنگال گۆت: سالا 2014ێ به‌ری تیرۆرستێن داعش هێرشێ سه‌ر شنگال بكه‌ن، ل وی ده‌می 107 قوتابخانێن خواندنا كوردی ل شنگال هه‌بوون، پشتی هێرشا تیرۆرستێن داعش و خیانه‌تا 17 ئوكتوبه‌رێ 2017 هه‌تا نوكه ب تنێ 92 یێن هاتینه ڤه‌كرن ل ناڤ كه‌مپان و د ناڤ سه‌نته‌رێ شنگال دا پتریا قوتابخانه‌یان ل ناڤ كه‌مپان هاتینه ڤه‌كرن بۆ خواندنا كوردێ”.
مه‌یسه‌ر حه‌جی ئاشكه‌را كر: “هه‌ر ده‌مێ په‌روردا كوردێ زڤریه شنگال، دێ پتر قوتابخانه‌یێن خواندنا كوردێ ل شنگال هێنه ڤه‌كرن، لێ نوكه مه شیان نینن ل شنگال ڤه‌كه‌ین، چونكو ماموستا نه‌شێن بچنه شنگال وانه‌یان بده‌نه قوتابیان، هه‌تا ژی گوندێ خه‌رانی و مه‌حموودی و چه‌ند گوندێن دی داخواز كرینه قوتابخانێن كوردی ڤه‌كه‌ن، لێ مه شیان نه‌بووینه”.
رێڤه‌به‌رێ په‌روردا قه‌زا شنگال خویا كر: “ژبه‌ر خرابیا ره‌وشا شنگال مه نه‌شیایه چو باخچه‌یێن ساوایان ڤه‌كه‌ین بۆ زارۆكان، ب تایبه‌تی ژی سالا 2014ێ وه‌ره هه‌تا نوكه پشتی خه‌لكێ مه ئاواره بووین، قه‌ستا سنوورێ پارێزگه‌ها دهۆكێ كرین و ماینه دبن خیڤه‌تان دا و هه‌تا نوكه مه چو باخچه‌یێن ساوایان نینن”.
ناڤهاتی زێده‌تر گۆت: “قوتابێن شنگال هه‌موو ل زانكۆ و په‌یمانگه‌هێن هه‌رێما كوردستانێ هێنه وه‌رگرتن و گه‌له‌ك ژ قوتابێن شنگال سه‌ره‌رایێ ره‌وشا ئاواره‌یێ دبن خیڤه‌تان ژ قوتابیێن ئێكێ ده‌ردچن ل سه‌ر ئاستێ پارێزگه‌ها دهۆكێ، هه‌تا قوتابیێن شنگال ل زانكۆ و په‌یمانگه‌ها ژی گه‌له‌ك د زیره‌كن و پله‌یێن باش ب ده‌ست خۆڤه دئینن”.
شه‌هاب ئه‌حمه‌د، رێڤه‌به‌رێ كارگێری ل په‌روه‌ردا قه‌زا شنگال بۆ ئه‌ڤرۆ راگه‌هاند: “په‌روه‌ردا كوردی ل شنگال 92 قوتابخانه هه‌نه، ژ وان ژی 52 قوتابخانا ل شنگال هاتینه ڤه‌كرن و 40 قوتابخانه ل ناڤ كه‌مپان ل سنورێ پارێزگه‌ها دهۆكێ بۆ قوتابیێن شنگال یێن كوردی دخوینن هاتینه ڤه‌كرن، پتریا وان ل ناحیا سنوونێ یێن هاتینه ڤه‌كرن، لێ په‌روه‌ردا شنگال گه‌له‌ك كێماسی هه‌نه ب تایبه‌تی ژی ل قوتابخانێن شنگال هاتینه ڤه‌كرن”.
رێڤه‌به‌رێ كارگێڕی ل په‌روه‌ردا قه‌زا شنگال خۆیا ژی كر: “ئاریشا هه‌ره مه‌زن یا خواندنا كوردی ل شنگال نه‌بوونا ئاڤاهیێن قوتابخانه‌یانه، تیرۆرستێن داعش ساله 2014ێ پتریا قوتابخانێن شنگال تێك داینه و نوكه ژ نه‌چاری قوتابیێن خواندنا كوردی و خواندنا عه‌ره‌بی ل شنگال د ئێك ئاڤاهی دا دخوینن كو ده‌وامه‌ك خواندنا كوردی یه و ده‌وامه‌ك ژی خواندنا عه‌ره‌بی یه “.
