بۆچی زارۆكێن مامۆستا هه‌ر سال ئێكه‌من ل قوتابخانێ؟
هه‌ولێر، قائید میرۆ
سالانه سه‌میانێن قوتابیان گازنده ل دانا نمره‌یان هه‌نه و هنده‌ك وه‌لاتی ئاماژه بڤێ چه‌ندێ دكه‌ن، مامۆستا نمره‌یێن زێده‌تر ده‌نه زارۆكێن خۆ ل قوتابخانێ و به‌رۆڤاژی قوتابیێن زیره‌ك هه‌نه و نمره‌یێن وان وه‌ك پێدڤی نینه به‌رپرسه‌كێ ئێكه‌تیا مامۆستایێن كوردستانێ ژی ئاشكراكر، هه‌ر وه‌لاتیه‌كێ گازنده هه‌بن و بزانیت غه‌در ل زارۆكێن وی هاتیه‌كرن دشێت سكالایێ تۆمار بكه‌ت.
عه‌تا ئه‌حمه‌د، جێگرێ سه‌رۆكێ ئێكه‌تیا مامۆستایێن كوردستانێ بۆ رۆژناما ئه‌ڤرۆ دیاركر” هه‌ر كه‌سه‌كێ بزانیت ژلایێ مامۆستایانڤه نمره‌یێن پێدڤی ب زارۆكێن وان نه‌هاتینه دان ل قوتابخانێ ماف هه‌یه ل رێڤه‌به‌رایه‌تیا قوتابخانێ یانژی په‌روه‌ردێ سكالایێ تۆمار بكه‌ت، چونكه جوداهی نینه ناڤبه‌را چو قوتابیاندا و زارۆكێن مامۆستا یان هه‌ر كه‌سه‌كی بن وه‌ك ئێكن و نابیت مامۆستا جوداهیێ بكه‌ت، واته مامۆستا نمره‌یێن بلند بده‌ته زارۆكێن خۆ ل قوتابخانێ، به‌لێ ئاریشه ل وانه‌یێن هونه‌ر و وه‌رزشێ هه‌یه، چونكه تاقیكرن زۆر جاران بۆ هه‌ردو وانا ناهێته‌كرن و مامۆستا نمره‌یان دیاری دكه‌ت بۆ هه‌ر قوتابیه‌كی، ئه‌گه‌ر بهێت و تاقیكرن نه‌هاتبیته‌كرن بۆ وانه‌یا وه‌رزشێ یان هونه‌رێ و نمره بۆ قوتابیه‌كی هاتبنه دانان ئه‌و نمره كێمتربن ل نمره‌یێن وانه‌یێن دی ئه‌ڤه ناهێته قه‌بوولكرن و سه‌میانێ قوتابی مافێ سكالایێ هه‌یه، ئه‌ركێ كارگێڕیا قوتابخانێ و رێڤه‌به‌ری ئه‌ڤه دوفچوونێ بۆ دیاركرنا نمره‌یێن قوتابیان بكه‌ن و ئه‌گه‌ر بزانن مامۆستایه‌كی جوداهی كریه و نمره‌یێن زێده بۆ زارۆكێن خۆ داناینه بهێته راستڤه‌كرن و پێڕابوون هه‌مبه‌ر بهێنه وه‌رگرتن، چونكه قوتابی هه‌موو وه‌ك ئێكن بۆ مامۆستای.
سالانه ل هه‌رێما كوردستانێ گازنده هه‌نه لدۆر بابه‌تێ دانا نمره‌یان و هنده‌ك وه‌لاتی گازندا ڤێ چه‌ندێ دكه‌ن، مامۆستا نمره‌یێن زێده‌تر ده‌نه زارۆكێن خۆ ل قوتابخانێ، بتایبه‌تی ئه‌و وانه‌یێن لاوه‌كی یێن نمره ژلایێ مامۆستای تێنه دیاركرن و هه‌لسه‌نگاندن بۆ دهێته‌كرن.
مامۆستا هه‌یفا عومه‌ر بۆ رۆژناما ئه‌ڤرۆ گۆت” مامۆستا به‌رپرسه ل هه‌مبه‌ر ئه‌ركێ خۆ یێ پیشه‌یی و جڤاكی رێزه‌كا تایبه‌ت بۆ مامۆستای دانایه، هه‌تا ل ده‌رڤه‌ی قوتابخانێ ژی خه‌لك هه‌موو رێزێ ده‌نه مامۆستای، له‌وڕا نابیت مامۆستا ئه‌ڤێ پیرۆزیا خۆ نه‌هێلیت و ببیته ئه‌گه‌ر كه‌س و كارێن قوتابیان ل جهێ باوه‌ری و رێزێ گومانێ ل مامۆستای بكه‌ن، ئه‌ز بخۆ مامۆستامه و زۆر جاران هه‌بوویه مامۆستایێن هه‌ڤالێن من گۆتیه زارۆكێن ته ل فلانه وانێ وه‌ك پێدڤی نینه و ئه‌گه‌ر بخوازی نمره‌یێن زێده‌تر دێ ده‌ینێ، به‌لیچ من ئه‌و چه‌نده لسه‌ر خۆ قه‌بوولنه‌كریه و بۆمن زارۆكێن من و هه‌موو قوتابی وه‌ك ئێكن، نابیت مامۆستا جوداهیێ بكه‌ت ناڤبه‌را قوتابیان، چونكه قوتابی ئه‌مانه‌ته‌كێ ئه‌خلاقی و قانوونی یه دده‌ستێ مامۆستایێ قوتابخانێ.
ئه‌ڤێ مامۆستایێ ئاشكراكر” له‌وانه‌یه هه‌بن مامۆستایێن وه‌سا نمره‌یێن بلند بۆ زارۆكێن خۆ دانن، به‌لێ ئه‌ڤه ڤه‌دگه‌ڕیت بۆ وژدانا مامۆستای، نابیت مامۆستا ببیته ئه‌گه‌رێ تێكچوونا عه‌داله‌تێ ناڤا كه‌رتێ په‌روه‌ردێ، ژبه‌ركو ئه‌و مامۆستایێ ئه‌ڤی كاری دكه‌ت بخۆژی دزانیت كاره‌كێ نه‌هه‌ژیه و دزانیت ئه‌ڤه ئاستێ زارۆكێ وی نینه، مه‌ژی ل ده‌رڤه گوه ل ئه‌ڤان گازندابوویه بۆچی زارۆكێن مامۆستا هه‌رده‌م ئێكه‌من، دڤێت دوفچوون بهێته‌كرن ل هه‌ر قوتابخانه‌كا شاشیه‌كا وه‌سا بهێته‌كرن، ئه‌ز بخۆ ب تاوان دزانم و نابیت مامۆستا خۆ بینیت ئاستێ هندێ زارۆكێ هه‌ژاره‌كی ب هزار حال هه‌تا وانه‌یان دخوینیت و دوماهیێ زارۆكێ مامۆستای نمره‌یان ببه‌ت، وه‌ك دبێژن ئه‌م و خودێ قوتابی یێل سه‌ر به‌ختێ مامۆستای.
