كێشا ئاماده‌یێن ئێڤاران نه‌هاتنا قوتابیانه
ئه‌ڤرۆ، سالار دۆسكی:
رێڤه‌به‌رێ ئاماده‌یا سیمه‌رخ یا ئێڤاران ئاشكراكر كو پتریا قوتابیێن وی كرێكار و فه‌رمانبه‌ر و ل دانێ ب رۆژ بۆ خێزانێن خوه كار دكه‌ن و ه‌ك كارگێری پشته‌ڤان و هاریكارێ گشت قوتابیانه.
صه‌لاح حسێن سلێمان، ده‌رچوویێ كولیژا ئادابێ یه ل زانكۆیا صه‌لاح الدین و ماوێ دوازده ساله رێڤه‌به‌ریا قوتابخانا دكه‌ت، چار ساله رێڤه‌به‌رێ ئاماده‌یا سیمه‌رخ یا ئێڤاران، بۆ ئه‌ڤرۆ ئاشكراكر كو ل سالا 2006 ئاماده‌یا ناڤبری هاتیه دامه‌زراندن و نێزیكی 200 قوتابیێن كور تێدا ده‌وامێ دكه‌ن 39 مامۆستا و فه‌رمانبه‌ران بخوه ڤه دگریت ژ وێ هژمارێ بتنێ دو مامۆستا ئافره‌تن، خواندنا ئاماده‌یێ زانستی یه و سنورێن وه‌رگرتنا قوتابیان ژ رۆژئاڤا تاخێ گه‌لی ده‌ست پێ دكه‌ت هه‌تا دگه‌هیته دووماهی یا تاخێ زركا..
ل دووڤ گۆتنا رێڤه‌به‌رێ ئاماده‌یا سیمه‌رخ ده‌واما ژ ده‌مژمێر 6ی ئێڤاری ده‌ست پێ دكه‌ت هه‌تا 30 و 9 شه‌ڤێ ئه‌ڤ ژڤانه هاتیه دیاركرن ب وێ مه‌به‌ستێ كو هاریكاری بۆ قوتابیان چونكه پتر ژ 80% یا قوتابیان فه‌رمانبه‌ر و كرێكار و كاركه‌رن..
رێڤه‌به‌رێ ئاماده‌یا سیمه‌رخ چیرۆكه‌كا راست و دروست ل ئاماده‌یا خوه ڤه‌گێرا و گۆت: ساله‌كێ مه قوتابیه‌ك هه‌بوو رۆژانه دهات و مه‌ی ئانكو (مشروب) ڤه‌دخار و بهێن گه‌له‌ك ژێ دهات و به‌رنیاس ب بوو و هه‌می مامۆستا دگۆت دڤێت ئه‌ڤه بهێنه دویرخستن ئانكو(فصلكرن) چونكه سمعه‌ت بۆ قوتابخانێ نه‌هێلا، لێ من ڤیا دیفچوونێ بكه‌م كا ئه‌گه‌ر چنه چونكه كارێ مه چاكسازیكرنه نه‌بتنێ ده‌ركرنا فه‌رمانایه، پشتی دیفچوونێ ل گه‌ل قوتابی روینشتمه خوار دیاربوو كو دایكا وی وه‌غه‌ركریه و ژن باب هه‌یه و ئه‌وی قوتابی نه‌ڤێت بچمه مال و شینوارێن دایكا خوه دبینت و دگریت و ب ڤه‌خوارنا (مه‌ی) قه‌هرێن خوه ره‌ڤینت و پشتی بابێ وی ژی ل سه‌ر بابه‌تی هاتیه ئاگه‌هداركرن و هاریكاریا وی قوتابی هاتیه‌كرن ئێدی ده‌ست ژ ڤه‌خوارنێ به‌ردا و زڤری قوتابخانێ وه‌ك قوتابیه‌كێ ئاسایی و كێشه هاته چاره‌سه‌كرن.
رێڤه‌به‌رێ ئاماده‌یا سیمه‌رخ ئاماژه‌كره وێ چه‌ندێ كو كێشا هه‌ره سه‌ره‌كی نه‌هاتنا قوتابیانه و سه‌ره‌رایی هاریكاریێن به‌ره‌ده‌وام ل گه‌ل قوتابیان و گه‌له‌ك قوتابیان ژ ئه‌گه‌رێ نه‌هاتنێ، سیسته‌مێ خواندنا خوه گوهورینه بۆ ئونلاین و بتنێ ل وه‌رزێ ئێكێ ل ئه‌ڤ ساله 42 قوتابیان ل پولێن جودا خواندنا خوه كرینه ئونلاین، ئه‌ڤه و پشتی رۆژێن نه‌هاتنێ گه‌له‌ك زێده‌بووین و هوشداری ژلایێ كارگێریێ ڤه ب ئه‌وان قوتابیان هاتیه‌دان.
مامۆستا صه‌لاح نه‌ڤه‌شارت ژی كو هه‌تا دووماهی ماوه هاریكارن ل گه‌ل قوتابیان چونكه پتریا قوتابیان كاردكه‌ن و ئه‌گه‌رێ نه‌هاتنا وان بۆ كاركرنا رۆژانه ل بازاری ڤه‌دگه‌ریت و گه‌له‌ك ژ قوتابیان خودان خێزانن و ژێده‌ره‌ێ سه‌ره‌كیێ كومكرنا داهاتێ خێزانێ نه.
هه‌ڤده‌م رێڤه‌به‌رێ ئاماده‌یێ ئاماژه كره وێ چه‌ندێ كو ل دووڤ رێنمایێن وه‌زاره‌تا په‌روه‌ردێ هه‌ر ده‌ما نه‌هاتنا قوتابیان گه‌هشته 26 رۆژان ئه‌و قوتابی پشتی سێ هوشداریان دهێته دویرخستن ژ قوتابخانێ وێ سالێ دهێته هه‌ژمارتن كه‌فتی…
ل دووڤ گۆتنا مامۆستایێ په‌روه‌ردا تایبه‌ت(محه‌مه‌د تاها ابراهیم) ژ سه‌رجه‌مێ 200 قوتابیان بتنێ قوتابیه‌كێ په‌روه‌ردا تایبه‌ت هه‌یه ئه‌و ژی ژ جورێ كێم بینه و هه‌می ئاسنكاری بۆ دهێنه‌كرن و ئه‌و قوتابی نه‌هاتیه جوداكرن ژ قوتابیێن ئاسایی دا هه‌ست ب كێماسیێ نه‌كه‌ت.
هه‌ڤده‌م ل دووڤ نڤیساره‌كا ئاماده‌یا سیمه‌رخ یا ئێڤاران كو ب مێژوو 14/2/2022 و ئیمزا هاریكارێ رێڤه‌به‌ر (شاكر عه‌لی محه‌مه‌د) ل سه‌ر هه‌یه و دانه‌ك ب ده‌ست من كه‌فتیه، تێدا هاتیه كو دیفچوون رۆژانه ل سه‌ر نه‌هاتنا قوتابیان هه‌یه و هاریكارێ رێڤه‌به‌ری بۆ كارۆبارێن قوتابیان به‌رپرسه ل سه‌ر ڤی بابه‌تی بۆ سالا خواندنێ 2021 – 2022 رێژا ئاماده‌بوونا قوتابیان ل ئاماده‌یا سیمه‌رخ 70% بوویه و ئه‌ڤه دهێته هه‌ژمارتن رێژه‌كا باش به‌رامبه‌ر ئاماده‌یێن دی چونكه ئاماده‌ی یا شه‌ڤێ یه و پتریا قوتابیان كار دكه‌ن ب رۆژ.
