ناهیدا دۆسكی: باخچه قوناغه‌كا گرنگ و هه‌ستیاره بۆ ب ده‌ستڤه ئینانا پێزانینا و گه‌شه‌كرنا زارۆكی
ئه‌ڤرۆ، هه‌رهین محه‌مه‌د دۆسكی:
هاریكارا رێڤه‌به‌رێ سه‌رپه‌رشتێ په‌روه‌ردێ دا زانین كو د ئه‌ڤ ساله هژمارا باخچان به‌ر ب زێده‌بوونێ یه و شه‌ش باخچێن نه‌حكومی زێده‌بووینه و سه‌رجه‌مێ هه‌موو باخچان بۆ سالا خاندنێ د بنه هه‌شتێ باخچه و ژبلی وان باخچان ئه‌وێن ل گه‌ل قوتابخانێن ئه‌نتر نه‌شینال.
ناهیدا دۆسكی، هاریكارا رێڤه‌به‌رێ سه‌رپه‌رشتێ په‌روه‌ردێ بۆ به‌رپه‌رێ په‌روه‌رده و زانكۆ یێ رۆژناما ئه‌ڤرۆ گۆت: ژمارا باخچێن زارۆیان ل سه‌ر ئاستێ په‌روه‌ردا گشتی ل دهۆكێ یێن حكومی بتنێ شێست و ئێك باخچه‌نه و یێن نه‌حكومی نوزده باخچه‌نه و سه‌رجه‌مێ هه‌موو باخچان بۆ سالا خاندنێ د بنه هه‌شتێ باخچه و ژبلی وان باخچان ئه‌وێن ل گه‌ل قوتابخانێن ئه‌نتر نه‌شینال ڤه و دئه‌ڤ ساله دا نێزیكی شه‌ش باخچێن نه‌حكومی زێده‌بووینه و ل دووڤ حشتێ ژماره (33) ئه‌وێ هاتیه ده‌ركرن ژلایێ رێڤه‌به‌ریا پرۆگرام و چاپه‌مه‌نی ل وه‌زاره‌تا په‌روه‌ردێ خالا چار ئیشاره‌تێ ده‌ت كو ده‌واما فه‌رمی یا رۆژانه ل باخچێن زارۆیان ژ ده‌مژمێر هه‌شتی سپێدێ هه‌تا كو دوازده‌ی نیڤرۆیه و نه‌كو ده‌مژمێر دوازده‌ی نیڤرۆ ده‌رگه‌هێ باخچه‌ی دهێته گرتن، به‌لكو مه خه‌فه‌ریات هه‌نه و ماموستایه‌ك و چاڤدێره‌ك دمینن و هه‌تا كو دایك و بابێن هه‌موو قوتابیان دهێن زارۆێن خوه دبه‌ن و پاشان ئه‌و ماموستا و چاڤدێره ل گه‌ل رێڤه‌به‌را باخچه‌ی ده‌رگه‌هێ باخچه‌ی دگرن و دشێن بێژین ده‌واما باخچان هه‌تا ده‌مژمێر ئێكی نیڤرۆ یه و ئه‌ڤ رێنمایه ژ جهه‌كێ بلند بۆ مه هاتین و نه‌چارێن پێگریێ ب وان رێنمایان بكه‌ین
ناهیدایێ ئه‌و چه‌نده ژی گۆت: هه‌كه جوداهیه‌كێ بكه‌ین دناڤبه‌را دهی و ئه‌ڤرۆ دا گومان تێدانینه ئه‌ڤرۆ دێ باشتربیت ژ دهی، چونكو ئه‌ڤ ته‌كنه‌لۆژیا ئه‌ڤرۆ كه په‌یدابووی كو باخچێن زارۆیان ژی مفا ژێ دیتی جودایه یێن به‌ری و هه‌كه ته‌ماشه‌بكه‌ین ل هه‌رده‌مه‌كی باخچان مفایێن خوه هه‌بووینه، چونكو باخچه قوناغه‌كا گرنگ و هه‌ستیاره بۆ ب ده‌ستڤه ئینانا پێزانینا و گه‌شه‌كرنا زارۆكی ژ هه‌موو لایان ڤه و دسالێن بوری ژی دا ل دووڤ سیسته‌م و پرۆگرام كو ئه‌وێن عیراقی بوون دباخچه ب رێڤه دچوو و نوكه ژی هه‌ر ئه‌و پرۆگرامن كو سالا 2000 ب هزره‌كا سویدی هاته رێكخستن كو پرۆگرامه‌كێ گه‌له‌كێ باش بوو، به‌لێ ئه‌ڤرۆ سه‌حكه‌ینه جیهانێ به‌رده‌وام دگوهورینێ دایه و یا گرنگه ئه‌م ژی ل دووڤ وان گوهورینانا باخچێن خوه ب گونجینین ژلایێ سیسته‌می و پرۆگرامی ڤه و پتر هاتیه رێكخستن كو ل گه‌ل ئه‌ڤرۆكه و ئه‌ڤ پرۆگرامه ب گونجن دا كو پتر بشێن زارۆیه‌كێ سه‌رده‌مانه ئاڤا بكه‌ین ژلایێ په‌روه‌ردێ و زانستی ڤه و هه‌روه‌سان ئه‌ڤرۆكه پتر داخازی هه‌یه ل سه‌ر باخچێن زارۆیان و دشێن بێژم هه‌كه ژ كێماسیا ئاڤاهین باخچان نه‌بایه چوونا زاریان كێم تر نه‌بووژ چوونا زارۆیان بۆ قوتابخانێ
هاریكارا رێڤه‌به‌رێ سه‌رپه‌رشتێ په‌روه‌ردێ گۆت: قوناغا باخچان دهێته هه‌ژمارتن ب قوناغه‌كا گرنگ ژبۆ ب ده‌ستڤه ئینانا پێزانینا و گه‌شه‌كرنا لایه‌نێن وژدانی و هه‌سته‌یی و ژێری و جه‌سته‌یی و كومه‌لایه‌تی و ده‌رونی و زمانی و باخچه دامه‌زاوه‌كێ زانستی وجڤاكی یه و تێدا زارۆك فێری چه‌وانیا سه‌ره‌ده‌ریكرنێ ل گه‌ل ئاریش و هه‌لویستێن ژیانا رۆژانه‌یێن هه‌ڤه ره‌نگ دبن و جوداهیكرن دناڤبه‌را ره‌وشتێن باش و نه‌باش و زانینا ره‌فتارا ئاخفتنێ یا دروست دبن و ره‌فتارا خارنی َو رێزگرتنا كه‌سێ به‌رامبه‌ر.
