دڤێت ره‌مه‌زان هزر و ره‌فتار و كریارێن مرۆڤی بگوهریت
شێلادزێ، نه‌وزاد هلۆری:
هه‌ر چه‌نده د سرۆشت دا دڤێت مرۆڤ ب درێژاهیا ژیێ خوه كه‌سه‌كێ باش و دلوڤان و باش بیت د هزر و ره‌فتار و كریارێن خوه دا، به‌لێ ره‌مه‌زان ژی ده‌لیڤه‌یه‌كه كو ئه‌و هه‌موو كار و كریاره به‌ر ب باشتر بچن و گورانكاریه‌كا گشتی بكه‌ت، به‌لێ هێشتا پشكه‌ك ژ جڤاكی ره‌مه‌زانێ زێده‌تر ب بابه‌ته‌كێ په‌رستنێ دبینن.
مه‌لا جیهاد موسته‌فا، وتاربێژێ ئێك ژ مزگه‌فتێن ده‌ڤه‌را شێلادزێ بۆ ئه‌ڤرۆ گۆت: (ره‌مه‌زان ئێكه ژ وان هه‌یڤێن كو دڤێت مرۆڤ ب گشتی و موسلمان ب تایبه‌تی هزر و كار و كریار و ره‌فتارێن خوه بگوهریت و به‌ر ب باشتر ڤه ببه‌ت، ره‌مه‌زانێ زێده‌تر وه‌كو بابه‌ته‌كێ په‌رستنێ و ئه‌رك ل سه‌ر ملێن خوه نه‌بینیت، ژبه‌ركو پێغه‌مبه‌ر سلاڤێت خودێ ل سه‌ر بن د هه‌یڤا ره‌مه‌زانێ دا پتر ژ هه‌موو هه‌یڤان خێر و خێرات دكرن و پتر هاریكاریا خه‌لكی و هه‌ژاران دكر و به‌رده‌وام ژی خه‌لك پال ددا كو زێده‌تر خوه ماندو بكه‌ن د خزمه‌تكرنا جڤاكی و خه‌لكێ پێدڤی دا).
زێده‌تر گۆت: (جهێ داخێ یه هنده‌ك ژ وه‌لاتیان ره‌مه‌زانێ ب ده‌لیڤه دبن نكو بازاران گران بكه‌ن، په‌یوه‌ندیێ، جڤاكی لاواز دكه‌ن، ده‌مێ خوه پتر ب نڤستن و بێ كاری دبه‌ن، كو ئه‌ڤ یه‌ك ژی شاشیه‌كا هه‌ری مه‌زنه و رۆژی مرۆڤی فێر دكه تكو دڤێت ژ هه‌موو رویان ڤه مرۆڤ خوه بگوهریت و باشتر بیت).
مه‌لا جیهادی د درێژاهیا ئاخفتنێن خو دا دیاركر ژی كو ره‌مه‌زان وه‌كو شه‌حنه‌كا ئیمانی یه و دڤێت بۆ هه‌موو هه‌یڤێن دی ئه‌و شه‌حنه مرۆڤی رابگریت و گۆت ژی: (دجڤاكێ مه‌دا زۆر كه‌سانێن هه‌ژار و پێدڤی هه‌نه و دڤێت هاریكاریا وان بهێته‌كرن، دیسان خودان كار و بازار و خودان پێشه و كه‌سانێن خێرخواز به‌رده‌وام هاریكاریا هه‌ژاران و كه‌سانێن پێدڤی بكه‌ن، داكو خودایێ مه‌زن ژی ره‌مه‌زانێ و رۆژیان ل مرۆڤی قبول بكه‌ت).
