قوتابخانا ئاكرێ یا بنه‌ره‌ت 100 سال ده‌ربازكرن
ئاكرێ، ره‌مه‌زان زه‌كه‌ریا:
ل سنوورێ ده‌ڤه‌رداریا ئاكرێ ژیێ قوتابخانا ئاكرێ بنه‌ره‌ت 100 ساڵ ده‌رباز كرن و كه‌رنه‌ڤالا كه‌ڤناریا خواندنێ ل ئاكرێ ب ریڤه‌چوو تێدا وه‌زیرێ په‌روه‌ردێ یێ حوكمه‌تا هه‌رێما كوردستانێ پشكداربوو، سۆزه‌ك ب په‌روه‌ردا ئاكرێ دا ل دوور پاراستنا ئه‌رشیڤی كه‌ڤنارێ خواندنێ ل ده‌ڤه‌رێ.
ماموستا شه‌مال، رێڤه‌به‌رێ قوتابخانا ئاكرێ یا بنه‌ره‌ت بۆ ئه‌ڤرۆ گوت: به‌ریا 100 سالان قوتابخانا ئاكرێ یا بنه‌ره‌ت هاتیه ئاڤاكرن ل ساڵا 1920 ئێكه‌م جار ئاڤاهیێ وێ ل ئاكرێ یا كه‌ڤن بوو، پاشی هاته ڤه گوهاستن و ل گه‌ره‌كا قاپه‌كی ل سه‌نته‌رێ ئاكرێ هاته ڤه‌كرن و هه‌تا نۆكه ئه‌و ئاڤاهی مایه‌و خواندن ژی پشتی 100 سالان تێدا به‌رده‌وامه ئاڤاهی وه‌ك خۆمایه سه‌ره‌رای كه‌ڤناریا وی به‌لێ یێ دروسته.
رێڤه‌به‌رێ ناڤهاتی ئاشكراكر، قوتابخانا ئاكرێ یا بنه‌ره‌ت مێژوویه‌كا كه‌ڤنار هه‌یه و چه‌ندین به‌رپرسێن پله بلندو وه‌زیرو كارب ده‌ستێن كوردستانێ ل قوتابخانا ئاكرێ یا بنه‌ره‌ت خواندیه ،هه‌تا نۆكه قوتابخانا ئاكرێ یا بنه‌ره‌ت 13 رێڤه‌به‌ر گوهورینه هنده‌ك رێڤه‌به‌ر قوتابی بوونه ل قوتابخانا ئاكرێ یا بنه‌ره‌ت و دوڤرا بووینه مامۆستا ل هه‌مان قوتابخانێ و بووینه رێڤه‌به‌ر و خانه‌نشین بووینه، و هه‌تا نۆكه ژی خواندن به‌رده‌وامه تێدا ل رێزا ئێكێ بنه‌ره‌تی هه‌تا نه‌هێ قوتابی هه‌نه و به‌رده‌وامیێ ب خواندنا خوه دده‌ن.
په‌یڤدارێ په‌روه‌ردا ئاكرێ سابر عه‌لی بۆ ئه‌ڤرۆ گوت: رێڤه‌به‌ریا په‌روه‌ردا ئاكرێ ل قوتابخانا ئاكرێ یا بنه‌ره‌ت كه‌رنه‌ڤالا كه‌ڤناره‌یا خواندنێ ل ئاكرێ ل ژێر دروشمێ دوهیه‌كا خوراگر ئه‌ڤرۆیه‌كا سه‌ربلند سوبه‌هیه‌كا ئومێد هه‌مبێز ل ژێر چاڤدێریا دكتور ئالان حه‌مه سه‌عید وه‌زیرێ په‌روه‌ردێ یێ حوكمه‌تا هه‌رێما كوردستانێ ب چه‌ندین چالاكیێن جودا جودا هاته ئه‌نجام دان.
په‌یڤداری رێڤه‌به‌ریا په‌روه‌دا ئاكرێ هه‌روه‌سا گوت: كه‌ڤناره‌یا ئه‌ڤێ قوتابخانێ بۆ پتر ژ 100 سالان ڤه‌دگه‌رێت، گرنگیا ئه‌ڤێ قوتابخانێ دوێ چه‌ندێ دایه كو ئه‌و به‌لگه‌نامێن نوكه به‌رده‌ستن و هه‌ر ل سالا 1920 هه‌تا نوكه خواندن دناڤدا به‌رده‌وامه بێ ڤه‌قه‌تیان، ئه‌و به‌لگه‌نامه هه‌می د به‌رده‌ستن، د ئه‌ڤێ قوتابخانێ هه‌موو ئول و نه‌ته‌وا وه‌كی كورد و عه‌ره‌ب و جوهی و كریستیان و تركمان دناڤ قوتابخانێ دا خواندیه ل ده‌مێ سه‌د سالێن بووری.
سابر عه‌لی هه‌روه‌سا ئاشكراكر، وه‌زیرێ په‌روه‌ردێ سۆزدا كو مۆزه‌خانه‌كا په‌روه‌رده‌یی بۆ ئه‌رشیڤێ قوتابخانێ دروست بكه‌ت، ژبه‌ر گرنگی و كه‌ڤناره‌یا وی ئه‌رشیڤێ چه‌ندین ساله هاتا نوكه هاتیه پاراستن وه‌ك به‌لگنه‌مان لبه‌رده‌ست بمینیتن.
