جڤاك و خێزان زور كێم گوهداریا گه‌نج و سنێلان دكه‌ن
دهۆك، نه‌وزاد هلۆری:
هه‌رچه‌نده كار ب ئه‌قلی دهێته كرن و مه‌زناهی نابیته پیڤه‌ر، به‌لێ پرانیا تاكێن جڤاكی و خێزانێ ژی چ گرنگیێ ب گوهداریكرن و ئاخفتنێن گه‌نج و سنێلان ناده‌ن، ئه‌ڤ یه‌كه ژی هنده‌ك جاران دبیته ئه‌گه‌رێ پاشكه‌فتنا وان.
ئدریس نوری، ماسته‌ر ب په‌روه‌ردا ده‌رونی هه‌یه دیار كر كو ره‌فتار ل گه‌ل گه‌نج و سنێلان ئێك ژ كارێن هه‌ره ب زه‌حمه‌ت یێن په‌روه‌رده‌یی یه و گۆت: (گه‌نج و سنێله پێكهاته‌یێن سه‌ره‌كی یێن جڤاكی نه و زورترین كه‌سن كو دشێن ب رێیا هێزا له‌شی و ئه‌قلی كار بو باشتركرنا ژیانێ بكه‌ن، له‌وا دڤێت ب رژدی مفا ژ شیانێن وان و هزر و بیر و ره‌فتارێن وان بهێته وه‌رگرتن).
ئدریس زێده‌تر گۆت: (هه‌رچه‌نده گه‌نج و سنێله خوه دبینن ل ئاسته‌كێ هه‌ره بلند و هنده‌ك جاران بتنێ خوه ددانن كو دشێن گورانكاریێ بكه‌ن و هه‌تا راده‌یه‌كێ ئاخفتنا وان ژی راسته، به‌لێ دڤێت ئه‌و ژی باش بزانن كو كه‌سانێن مه‌زن سه‌ربوور پتر ژ وان هه‌نه و وان دونیا پتر دیتیه و پتر ژی توشی شكه‌ستن و سه‌ركه‌فتنان بوینه هه‌تا كو گه‌هشتینه وی ئاستی، له‌وا ب سه‌ربورێن دانعه‌مران و ب هێز و باسكێن گه‌نج و سنێلان ئه‌م دشێین خێزان و جڤاكه‌كێ ساخله‌م و بهێز ئاڤا بكه‌ین).
ناڤبری دیار كر ژی كو هنده‌ك ره‌فتار دناڤ جڤاكی دا زور دشاشن و دبنه ئه‌گه‌ر كو گه‌نج و سنێله‌یێن مه پاشڤه بچن و گۆت: (دهێته گوتن كو ده‌مێ مرۆڤ دبێژنه زارۆیی زارۆیه و چ نوزانیت، ده‌مێ دبیته گه‌نج دبێژن هێشتا خوین گه‌رمه و شاره‌زایی نینه، ده‌مێ دبیته كه‌سه‌كێ دانعه‌مر دبێژن هزرێن خوه یێن ژ ده‌ستدایی و پێدڤی ناكه‌ت لدووڤ بچن، له‌وا دبێژین دڤێت د هه‌ر قوناغه‌كا ژیانێ دا مرۆڤ مفای ژ تاكێن جڤاكی وه‌ربگریت).
ئدریس نمونه‌ك ئینا و دیار كر بو نموونه ده‌مێ مرۆڤ زارۆ مفای ژ په‌روه‌رده‌كرنا وی وه‌ربگریت داكو ده‌مێ دبیته گه‌نج بشێت خزمه‌تا جڤاكی ب هێز و شیانێن خوه بكه‌ت، ده‌مێ ئه‌و دبیته كه‌سه‌كێ دانعه‌مر ل وی ده‌می مفای ژ سه‌ربورێن وان وه‌ربگرین و گۆت: (لێ مخابن خێزان و جڤاك ژلایێ مه‌زنێن مالێ ڤه هاتینه كونترولكرن و كێمترین مفا ژ گوتن و كریار و ئاخفتنێن وان دهێنه وه‌رگرتن، له‌وا دێ بینین كو هزاران گه‌نجێن بێ به‌رهه‌م دناڤ جڤاكێ مه دا هه‌نه و نه‌شێن چ بكه‌ن، ژبه‌ركو موله‌ت و ده‌رفه‌ت ب وان نه‌هاتیه دان هه‌تا خوه بوچونا خوه بێژن).
