شاره‌زایه‌كا جڤاكی: پێدڤیه به‌ری گرێبه‌ستا هه‌ڤژینیێ خۆلێن هشیاركرنێ بهێنه ڤه‌كرن
هه‌ولێر، قائید میرۆ:
ل گوره‌ی ئامارا سالا بۆری رێژا ته‌لاقێ ل هه‌رێما كوردستانێ ب شێوه‌یه‌كێ به‌رچاڤ زێده بوویه، شاره‌زایه‌كا جڤاكی ژی ئاماژه بڤێ چه‌ندێ دكه‌ت، كو ئه‌گه‌رێن ته‌لاقێ د ئاشكرانه د سه‌رده‌مێ نوكه دا و دبێژیت: پێدڤیه به‌ری گرێبه‌ستا هه‌ڤژینیێ بهێته ئیمزا كرن ل دادگه‌هێ خۆلێن هشیاركرنێ بۆ كوڕ و كچان بهێنه ڤه‌كرن.
ده‌ریا شێروانی، شاره‌زایا جڤاكی بۆ ئه‌ڤرۆ دیار كر، ته‌لاق دده‌مه‌كی دا په‌یدا دبیت، ده‌مێ دناڤبه‌را هه‌ڤژینان دگه‌هیته ئاسته‌كی بزانن نه‌شێن پێكڤه بژین ئه‌ڤه دێ بڕیارێ ده‌ن جودا ببن، بێگومان ئه‌گه‌رێن ته‌لاقێ زۆرن و هه‌ر ده‌ڤه‌ره‌كێ ئه‌گه‌رێن خوه هه‌نه و گۆت: (ئه‌ز باوه‌رم ته‌مه‌نێ بچووك بۆ هه‌ڤژینیێ ئه‌گه‌ره‌كێ هه‌ره سه‌ره‌كیه بۆ ته‌لاقێ، هه‌روه‌سا چاڤلێكرنێ رۆلێ خوه هه‌یه، چونكی هنده‌ك كچ بێ كو هه‌ست ب به‌رپرسایه‌تیا پێكئینانا خێزانێ بكه‌ن بتنێ بۆ وێنه‌گرتنێ و خۆشیا رۆژا ئاهه‌نگا هه‌ڤژینیێ دچنه دناڤا پرۆسا هه‌ڤژینیێ و بتنێ داكو شه‌هیانا خوه ببینن و وێنه‌یێن خوه به‌لاڤ بكه‌ن، له‌ورا نابیت ل سه‌ر ڤی بنه‌مای پرۆسا هه‌ڤژینیێ بهێته پێكئینان).
ده‌ریایێ ئه‌و چه‌نده ژی دیار كر كو پێدڤیه رێكخراوێن تایبه‌ت ب مافێن ئافره‌تێ پلانێن خوه ب گۆهۆڕن بۆ هشیاركرنا جڤاكی و هه‌ڤژینان، چونكی پێشكه‌فتنا ته‌كنه‌لۆژیایێ كاریگه‌ریێن خراب لسه‌ر جڤاكی په‌یدا كرینه و گۆت: (بتایبه‌تی ل ڤان سالێن دووماهیێ به‌لافكرنا درامایێن بیانی كارتێكرن ل سه‌ر ده‌روونێ وه‌لاتیان هه‌بوویه، هه‌روه‌سا بكارئینانا تۆڕێن جڤاكی بشێوه‌كێ خراب ژلایێ وان ژنێن هه‌ڤژین هه‌ین كو زۆر جارا دبیته ئه‌گه‌رێ خیانه‌تێ و ئه‌نجام ژی دێ ته‌لاق بیت).
شاره‌زایا جڤاكی دا زانین كو پێدڤیه به‌رنامێن هشیاركرنا جڤاكی بهێنه پێشكێش كرن ل هه‌موو ئالاڤێن به‌لاڤكرنێ، نابیت خه‌لكێ مه ژیانا خوه هه‌ڤبه‌ر بكه‌ن ل گه‌ل ژیانا دو هه‌ڤژینێن ناڤا درامایه‌كا بیانی، كو ئه‌ف هه‌ڤژینیه بۆ پاره‌ی هاتیه پێك ئینان، هه‌روه‌سا بكارئینانا تۆڕێن جڤاكی بۆ نیاسینا خه‌لكی و مفا وه‌رگرتنێ یه ژ بابه‌تێن زانستی، نه‌ك بۆ په‌یوه‌ندیێن ئه‌ڤینی و گۆت: (یا فه‌ره به‌ری ئیمزاكرنا گرێبه‌ستا هه‌ڤژینیێ ل دادگه‌هێ هه‌ردو ره‌گه‌ز پشكداری خۆله‌كا هشیاركرنێ ببن، هه‌تا بزانن كو دێ شێن ل داهاتی به‌رپرس بن ل ژیانا خوه یا خێزانی و هه‌ر ئێك ژ وان ئه‌رك و مافێن خوه بزانن ل پرۆسا هه‌ڤژینیێ دا، هه‌تا به‌رهه‌م ئینانا زارۆكان و رێڤه‌برنا خێزانێ و سه‌ره‌ده‌ریا هه‌ڤژینان ل گه‌ل خه‌لكی بو وان بهێته شرۆڤه كرن و زانیاریێن دروست بۆ هه‌ر كه‌سه‌كی هه‌بن ده‌مێ بخوازن ژیانا هه‌ڤژینیێ پێك بینن).
