ئه‌ندامه‌كێ لژنا فه‌توایێ:ئه‌و كه‌سێ وێنێن خوارنێ ل هه‌یڤا ره‌مه‌زانێ به‌لاڤ دكه‌ت گونه‌هكاره
ئه‌ڤرۆ، هه‌رهین محه‌مه‌د:
به‌لاڤكرن و هنارتنا وێنێن خوارنێ د تورا سناپ چاتی دا دیارده‌كه دناڤ هه‌موو جڤاكا دا یا به‌ربه‌لاڤ، به‌لێ دناڤ جڤاكێ كوردی دا ئه‌ڤ دیارده ب تشته‌كێ نه‌جوان دهێته زانین لدور ڤێ چه‌ندێ ئه‌ندامه‌كێ لژنا فه‌توایێ دبێژت: ئه‌و كه‌سێ وێنێن خوارنێ دكه‌ته ستریك یان به‌لاڤ دكه‌ت گونه‌هكاره.
زێره‌ڤان حه‌سه‌ن، فه‌رمانبه‌ره ل رێڤه‌به‌ریا كاره‌بێ دیار كر كو دیاردا به‌لاڤكرنا وێنێن خوارنێ د سناپی دا به‌رب زێده‌بوونێ یه و ب تایبه‌تی د هه‌یڤا ره‌مه‌زانێ دا نه‌ك بتنێ ژن ڤی كاری دكه‌ن ل ڤێ دووماهیێ زه‌لام ژی فێر بووینه ستریكا بۆ خوارنێ دگرن و بۆ هه‌ڤال و كه‌س و كارێن خوه دهنێرن، یان ژی ل ده‌مێ دچنه خارنگه‌هه‌كێ وێ خارنا داخواز كری هه‌موویێ وێنه دكه‌ن و دئیننه خوارێ.
زێره‌ڤان زێده‌تر گۆت: (ب دیتنا من ئه‌ڤ دیارده گه‌له‌ك نه یا جوانه و دبیت ل گه‌له‌ك وه‌لاتان تشته‌كێ نورمال بیت به‌لێ ل گه‌ل جڤاكێ مه یێ كوردی ناگونجیت و ب چاڤه‌كێ كێم دبینین، چونكی د جڤاكێ مه دا دانانا خوارنێ بۆ مێهڤانا، یان بۆ كه‌سانێن مال ب تشته‌كێ سه‌رفه‌راز دانن و هه‌كه دوی ده‌می دا بهێته وێنه كرن و به‌لاڤكرن دبیت ژلایێ گه‌له‌ك كه‌سێن نێزیك ڤه بهێنه لومه كرن و دانا وێ خوارنێ ب مه‌تحه ب دانن).
لدور هه‌مان بابه‌ت ماموستا ئه‌رده‌شێر زوزانی گۆت: هنارتنا وێنێن خوارنێ وه‌كو ستریك، یان به‌لاڤكرن بتنێ بۆ مه‌تحه‌یه و دا بۆ وان كه‌سا دیار كه‌ت كو مه ئه‌ڤرۆ ئه‌ڤ خوارنه یا چێكری و پتریا كه‌سێن ڤی كاری دكه‌ن كچن و ئه‌ڤ دیارده رۆژ بۆ رۆژێ به‌رب زێده‌بوونێ یه و گۆت: (بدیتنا من ئه‌ڤه كاره‌كێ نه‌جوانه و هه‌تا شه‌ریعه‌تێ ئیسلامێ ژی قه‌بوول ناكه‌ت، چونكو دبیت ئه‌و كه‌سێ وێنه بۆ دهێته هنارتن د شیاندا نه‌بیت ئه‌وێ خوارنێ بخون، یان ب كرن ل وی ده‌می دێ هه‌ست ب كێماسیێ كه‌ت د جڤاكێ كوردی دا ئه‌و كه‌سێن ڤی كاری دكه‌ن ژی دچاڤێن گه‌له‌ك كه‌سان دا دكێمن و دهێنه لومه كرن، ژبه‌ركو كاره‌كێ نه جوانه).
عه‌بدوللا عیسا، ئه‌ندامێ لژنا فه‌توایێ دا زانین كو هه‌تا نوكه مه چو فه‌توایێن ره‌سمی لدور به‌لاڤكرنا وێنێن خوارنێ دتورێن جڤاكی دا نه‌داینه، به‌لێ مه ل گه‌له‌ك مالپه‌ران دا دیار كریه و د گه‌له‌ك ل رۆژێن ئه‌ینی ژی مه گۆتیه كو ئه‌ڤ دیارده تشته‌كێ به‌رۆڤاژی شه‌ریعه‌تیه و گۆت: (دبیت كه‌سێ به‌رامبه‌ر یێ هه‌ژار بیت و پێچێنه‌بیت وه‌ك وی كه‌سی خوارنێ دابین بكه‌ت و ب خوشحالی ڤه ئه‌ڤ دیارده وه‌كو سالا بوری نینه).
عه‌بدولا د به‌رده‌وامیا ئاخفتنا خوه‌دا دیار كر كو ئه‌ڤه مه‌زاختنه و مه‌تحا ب نیعمه‌تێن خودایێ مه‌زن دكه‌ن و جوره‌كێ حه‌ساده‌تێ په‌یدا دبیت و گۆت: (به‌لاڤ كرن و هنارتنا وێنێن خوارنێ د ڤێ هه‌یڤێ دا رۆژی پێناكه‌ڤیت، به‌لێ ئه‌و كه‌سه ب وێ چه‌ندێ گونه‌هكار دبیت و هه‌تا كو د شه‌ریعه‌تی دا هاتیه و ده‌مێ مرۆڤ گۆشته‌كی ل مالا خوه چێدكه‌ت هندی ژ مرۆڤی بهێت بلا بهێن نه‌چیته جیرانێ مرۆڤی و هه‌كه بهێن چوویێ و زانی ته گۆشت یێ چێكری پێدڤیه بو ببه‌ی دا كو دلێ وان نه‌مینت و ل كه‌رب ژ كه‌سێن ده‌وله‌مه‌ند نه ڤه‌بیت).
