رێڤه‌به‌رێ په‌یمانگه‌ها په‌روه‌ردا وه‌رزشی: دڤێت رولێ كولیژ و په‌یمانگه‌هێن وه‌رزشی بۆ په‌روه‌رده‌كرنێ بهێته كاراكرن
دهۆك، نه‌وزاد هلۆری:
پڕانیا وه‌رزشڤانان ب هێز و شیانێن خوه چوینه ناڤا جیهانا وه‌رزشی و كێمتر ژ وان ل قوناغێن په‌روه‌رده‌یا وه‌رزشی ده‌رباز بوینه، به‌لێ ل ڤان سالێن دووماهیێ چه‌ندین ناڤه‌ندێن په‌روه‌رده‌یی یێن گرێدای وه‌رزشێ هه‌نه، رێڤه‌به‌ره‌ك ژی دده‌ته دیاركرن، كو وه‌رزش نوكه بوویه تشته‌كێ سه‌ره‌كی و دڤێت گرنگی پێ بهێته‌دان.
مه‌تین عه‌لی، رێڤه‌به‌رێ په‌یمانگه‌ها په‌روه‌ردا وه‌رزشی یا ڤیا ل دهۆكێ دیاركر، كو دنوكه دا وه‌رزش بوویه تشته‌كێ سه‌ره‌كی و دڤێت گرنگیه‌كا تایبه‌ت پێ بهێته‌دان، و گۆت: (پشكه‌كا هه‌ره زۆر یا وه‌رزشڤانان ل كوردستانێ و دهۆكێ ژی ب حه‌ز و هێز و شیانێن خوه چوینه ناڤا جیهانا وه‌رزشی و تایبه‌تمه‌ندن ب ئێك یان چه‌ند جوره‌كێن كێم یێن وه‌رزشی، له‌وا گرنگه ب رێیا ناڤه‌ندێن په‌روه‌رده‌یێن وه‌رزشی به‌ره‌بابێ نوو ل سه‌ر هه‌موو جور و شێوه و ره‌نگێن وه‌رزشی ب تێر و ته‌سه‌لی بهێنه په‌روه‌رده‌كرن داكو بشێن وه‌رزشڤانێن ئه‌كادیمی و پێشكه‌فتی دروست بكه‌ین)
مه‌تین عه‌لی زێده‌تر گۆت: (ل ڤان چه‌ند سالێن دووماهیێ حوكمه‌تا هه‌رێما كوردستانێ ب رێیا زانكۆ و په‌یمانگه‌هان گرنگی ب په‌روه‌رده‌كرنا كادرێن وه‌رزشی دایه و ده‌رفه‌ت ژی دایه په‌یمانگه‌هێن كه‌رتێ تایبه‌ت كو ئه‌و ژی مل بملێ حوكمه‌تێ كار ل سه‌ر په‌روه‌رده‌كرنا به‌ره‌بابێ نوو بكه‌ن، ئه‌ڤ یه‌ك پێنگاڤه‌كا هه‌ره باشه ژبه‌ركو پشكه‌ك ژ وه‌رزشڤانان دبیت ده‌رفه‌ت نه‌بیت، كو بخوینن و دنوكه دا دشێن ب رێیا په‌یمانگه‌هێن تایبه‌ت بخوینن و خوه زێده‌تر ل سه‌ر وه‌رزشێ په‌روه‌رده بكه‌ن).
ناڤبری دیاركر ژی كو زێده‌باری چه‌ندین ئاسته‌نگ و ئاریشان، به‌لێ د نوكه دا ئاستێ په‌روه‌ردا وه‌رزشی ل كوردستانێ و پارێزگه‌ها دهۆكێ ژی به‌ر ب باشترڤه دچیت، كو ب رێیا په‌روه‌ردا وه‌رزشی چه‌ندین جورێن وه‌رزشی ل كوردستانێ هاتینه دیتن و گه‌شه‌یێ دكه‌ن و پێشتر نه‌بوون، له‌وا دڤێت زێده‌تر گرنگی ب ڤان جوره زانكۆ و په‌یمانگه‌هێن وه‌رزشی ل هه‌ردوو كه‌رتێن حوكمی و تایبه‌ت بهێته‌دان، داكو بشێن ل ئاینده ژێرخانه‌كا په‌روه‌رده‌ی یا باش دروست بكه‌ین، دیسان دڤێت هه‌موو جوره یاریگه‌هێن گرێدای جیهانا وه‌رزشی بهێنه دروستكرن بۆ وێ یه‌كێ وه‌رزشڤانێن مه بشێن قاره‌مانی و خول و راهێنانێن خوه تێدا بكه‌ن.
