ماموستایه‌كێ وانا سرۆدێ:قوتابێن ژبه‌ر وانا سرۆدێ و هونه‌ری و وه‌رزشێ حه‌ز ژ قوتابخانێ دكه‌ن
ئه‌ڤرۆ، هه‌رهین محه‌مه‌د:
ماموستایه‌كێ وانا سرۆدێ دیاركر، پێدڤیه وانا سرۆدێ ژی وه‌كو هه‌موو وانێن دی بیته سیسته‌م و قوتابی ل سه‌ر بچن، و ماموستا ژی گوهێ قوتابی ئاڤا بكه‌ن و هه‌ردیسان وانا سرۆدێ و مۆزیكێ و وه‌رزشێ ل ده‌ستپێكا ده‌وامێ بهێنه گۆتن دا قوتابی بۆ وانێن دووڤدا یێ چالاك و زیره‌ك بیت.
جومعه حه‌یده‌رجه‌رجیس ماموستایێ وانا سرۆدێ ل كولیژا به‌هره‌داران یا دهۆكێ بۆ به‌ر په‌رێ په‌روه‌رده و زانكۆ گۆت: وانا سرۆدێ قوتابێن مه گه‌له‌ك حه‌زژێ دكه‌ن، و گرنگیێ ده‌نێ، چونكو وانێن دی دزانستی نه و ئه‌ڤ وانه وه‌كو بهێنڤه‌دانه‌كێ یه بۆ وان و وانا سرۆدێ ژی ب شێوه‌كێ پێشكه‌فتی بۆ قوتابیان شرۆڤه‌دكه‌م بۆ نمونه بیردوزێن مۆزیكێ نیشا قوتابیان ده‌م دا كو گۆهێ وان یێ مۆزیكێ ب هێز بكه‌ڤیت و سرۆدێن نه‌ته‌وه‌یی ده‌ینێ و ل سه‌ر مۆزیكا جیهانی دئاخڤین و گه‌نگه‌شێ دكه‌ین و گرۆپان چێدكه‌ین و كورسه‌كێ مۆزیكێ ژی بۆ قوتابخانێ دروستكه‌ین، ئانكو ب شێوه‌كێ ئه‌كادیمی وانا مۆزیكێ بۆ قوتابیان دبێژین و ب ڤی ره‌نگی كه‌ش و هه‌وایێ قوتابیان دهێته گوهۆرین ژ وانێن زانستی بۆ مۆزیكێ و سترانێ و گه‌له‌ك یا پێدڤیه ل هه‌موو قوناغان هه‌تا ئاماده‌یی وانا سرۆد و مۆزیكێ هه‌بیت، چونكو ل قوناغا ناڤنجی حه‌زێن قوتابی دیاردبن كا هه‌رقوتابیه‌ك حه‌زچ دكه‌ت و ب ڤی ره‌نگی قوتابی دێ پتر ب خاندنێ ڤه هێته گرێدان و ده‌رۆنێ وی ژی دێ یێ ئارام بیت هه‌كه وانا مۆزیكێ هه‌بیت و پتریا جاران ده‌مێ قوتابی حه‌ز ژ قوتابخانێ دكه‌ت ژبه‌ر وانا سرۆدێ و هونه‌ری و وه‌رزشێ یه و ب مخابنی ڤه كارگێریێن گه‌له‌ك قوتابخانا وانا هونه‌ری و مۆزیكێ ب گرنگی ڤه نا وه‌رگرن و دبینم گرنگترین وانه بۆ قوتابی وانا هونه‌ری و مۆزیكێ یه و وه‌رزشێ و مۆزیك و هونه‌ر مێشكێ قوتابی ڤه‌دكه‌ن و پێدڤیه هه‌ر وانه‌كا بهێته خاندن ماموستا بێژیته قوتابی وێ وانێ ب وێنه چێكه و وه‌سا قوتابی دێ پتر هزرا خوه ده‌ته كاری و وه‌كو روبوته‌كی نابیت دپولێ دا و هه‌ردیسان ئێك ژ خه‌له‌تێن دی یێن كارگێرێن قوتابخانان دكه‌ن ئه‌وه كو وانا سرۆد و هونه‌رو وه‌رزشێ دێ به‌نه وانا دووماهیێ و گرنگه ل وانا ده‌ستپێكێ سرۆد و هونه‌رو وه‌رزش بن دا كو گێولێ قوتابی خوه‌ش بیت بۆ وانێن دووڤدا و تشتێ ژ هه‌موو گرنگتر ئه‌وه بهێته كرن وانا سرۆدێ ژی بیته سیسته‌م و قوتابێن بنه‌ره‌ت و ماموستا هه‌موو ل سه‌ر وی سیسته‌می بچن و گوهێ قوتابی بهێته ئاڤاكر.
ناڤهاتی زێده‌تر گۆت: و گه‌له‌ك جاران تاقیكرنێ ب قوتابیان دكه‌ین كا گوهێ وان یێ مۆزیكێ چه‌ندێ بهێزه و دناڤ قوتابیان دا دیار دبیت، كو قوتابی هه‌نه حه‌زا مۆزیكێ و ستران گۆتنێ یا هه‌ی و دڤێت فێری مۆزیكێ بیت و دیسان ئه‌و قوتابیێ دهێته كولیژا مه سه‌د ژ سه‌دێ گوهێ وی یێ درسته و پتریا وان ئه‌وه یێن زیره‌ك و شیره‌تێ ل هه‌موو ماموستایێن سرۆدێ یین وانا ل قوناغا بنه‌ره‌ت دبێژن، پێدڤیه وانه‌كا تایبه‌ت بۆ بیردوزێن مۆزیكێ بهێته گۆتن و دیسان گۆهێ قوتابی بهێته ئاڤاكرن وه‌ك مۆزیك و پاشی ستران، چونكو ئه‌و قوتابیێ گۆهێ وی دروست بۆ ده‌نگا وه‌رگریت ل قوتابخانێ ژی ژ هه‌موویان زیره‌كتره ژ قوتابیه‌كێ گوهێ وی یێ سه‌قه‌ت.
ماموستایێ وانا سرۆدێ دووپاتكر, دازانین ژی كو كولیژا به‌هره‌داران بتنێ زانستی یه و قوناغا ئه‌ده‌بی ل گه‌ل نینه و قوتابیان ژ قوناغا ناڤنجی وه‌ردگرین هه‌تا ئاماده‌یی و فورمه دهێنه به‌لاڤكرن و ئه‌و قوتابێن ل سه‌ر دهۆكێ ئاستێ وان یێ ئیكێ و ل ده‌ستپێكێ تاقیكرنه‌ك ب قوتابیان دهێته‌كرن و ئه‌و قوتابێن ب سه‌ر دكه‌ڤن دوێ تاقیكرنێ دا جاره‌كا دی تاقیكرنه‌كا دی پێ دهێته‌كرن وه‌كو مقابه‌له و كا چه‌ند ئه‌و قوتابیه یێ ب هزره و هنده‌ك مه‌رجێن دی ژی هه‌نه وه‌زاره‌ت راسته‌وخو وان وه‌ردگریت و هه‌رسال نێزیكی ده‌ه دوازده قوتابی دهێنه وه‌رگرتن، ئانكو ئه‌و قوتابی دهێنه وه‌رگرتن یێن تێكرایێ وان ژنمرا 95 سه‌ردا دهێنه وه‌رگرتن و یێ ب بابه‌تێ بیركاری و كوردیێ و ئنگلیزیێ و زانستێ و پێدڤیه ب ڤان هه‌رچار بابه‌تان رێژا نمرا وی ژ 95 سه‌ردا هه‌بیت.
