ئایینێن دیتر چه‌وا رێزێ ل هه‌یڤا ره‌مه‌زانا پیرۆز دگرن؟
ئه‌ڤرۆ، هه‌رهین محه‌مه‌د:
هه‌یڤا ره‌مه‌زانێ ژ هه‌یڤێن پیرۆزه و بهایه‌كێ مه‌زن هه‌یه ل ده‌ڤ خه‌لكێ كوردستانێ، به‌لێ ل گه‌ل ئایینێ ئیسلامێ ئایینێ مه‌سیحی و ئێزدی ژی هه‌نه و مه ڤیا بزانین كا ئه‌و چاوا رێزێ ل ڤێ هه‌یڤێ دگرن ل هه‌مبه‌ری برایێن خوه یێن موسلمان لدور بابه‌تی رۆژنامه‌ڤانه‌كێ ئێزدی دبێژیت: ل هه‌یڤا ره‌مه‌زانێ ئێزدی خوارن و ڤه‌خوارنێ ل به‌رچاڤێن موسلمانا ناخۆن و رێزێ لێ دگرن و بۆ جه‌ژنێ ژی دچنه جه‌ژنا خوشك و برایێن خوه یێن موسلمان.
رۆژنامه‌ڤان به‌ختیار قادر ئێزدیه دا زانین كو به‌ری سه‌دان سالان ئێزدی و موسلمان و كریستیان پێكڤه ژیاینه و جه‌ژنێن خوه ل گه‌ل ئێكدو بۆراندینه و ئه‌و گیانێ برایه‌تیێ هه‌تا نۆكه دناڤبه‌را وان دا مایه و په‌یوه‌ندیێن وان ب هێزن و د خۆشی و نه‌خۆشیان دا ب هه‌ڤرانه و ئیرۆ ل سه‌ر وێ پێكڤه ژیانا ب سه‌دان سالان هه‌ی د به‌رده‌وامن و گۆت: (د درێژاهیا دیرۆكێ دا ئێزدی رێزێ ل هه‌لكه‌فت و بوونێن پیرۆز یێن ئایینێن دیتر ل هه‌رێما كوردستانێ دگرن، ب تایبه‌ت ژی ل هه‌یڤا ره‌مه‌زانێ و بۆ جه‌ژنێ ژی دچنه جه‌ژنا خوشك و برایێن خوه یێن موسلمان، ئه‌ڤ یه‌كه دبیته ئه‌گه‌رێ پتر مكومكرن و ب هێزبوونا په‌یوه‌ندیان و تێكه‌لیێن جڤاكی و خورتكرنا گیانێ برایه‌تی و پێكڤه ژیانێ و هه‌ڤدو قه‌بولكرنێ دناڤبه‌را وان دا).
چالاكڤان د بیاڤێ جڤاكی دا ئامینا عه‌بدلقادر دیار كر كو هه‌تا راده‌كێ باش په‌یوه‌ندیێن موسلمان و ئێزدی و مه‌سیحیان ل گه‌ل ئێك د خوشن و رێزێ ل داب و نه‌ریتێن ئێكدو دگرن، ب تایبه‌ت موسلمان ده‌مێ دبنه جه‌ژنێن برایێن ئێزدی و مه‌سیحی موسلمان پشكداری جه‌ژنێن وان دبن و لێ پیرۆز دكه‌ن و گۆت: (ل به‌رامبه‌ر ئه‌و ژی رێزێ ل هه‌یڤا ره‌مه‌زانا پیرۆز دگرن ژ ڤێ چه‌ندێ دیار دبیت كو براینی و ته‌بایی دناڤبه‌را ئولان دا هه‌یه ب تایبه‌ت ل هه‌رێما كوردستانێ).
باوه‌ر مزوری گه‌نجه‌كه دیار كر كو هه‌یڤا ره‌مه‌زانێ هه‌یڤا خێر و به‌ره‌كه‌تێ و دلوڤانیێ یه ل ده‌ڤ خودێ، له‌وا ل ده‌ڤ موسلمانان ژی پیرۆزی و گرنگیا خوه هه‌یه، پێكهاتێن دی وه‌كو ئێزدی و مه‌سیحی هه‌تا راده‌كێ باش رێزێ ل هه‌یڤا ره‌مه‌زانا پیرۆز دگرن و ل پێش چاڤێن موسلمانان ناخون و ڤه‌خوون و د هاریكارن ل گه‌ل موسلمانان و گۆت: (ئه‌ڤ چه‌نده ژی دزڤریت بۆ په‌یوه‌ندیێن بهێز و كه‌ڤن یێن دناڤبه‌را ئولێن هه‌رێما كوردستانێ ب گشتی ب تایبه‌ت ل دهۆكێ هه‌موو وه‌كو ئێك خێزانن و د هه‌ڤكارن ل گه‌ل ئێكدو رێزێ ل هه‌ڤدو دگرن و د هه‌موو هه‌لكه‌فتان دا و د به‌رامبه‌ر دا موسلمان ژی رێزێ ل هه‌بوونا هه‌موو ئولان دگرن و پشكداری جه‌ژن و نه‌ریتێن وان دبن).
