سه‌نته‌رێن چاره‌سه‌ركرنێ بۆ كه‌سێن مادێن بێهوشكه‌ر بكاردئینن دێ هێنه ڤه‌كرن
هه‌ولێر، قائید میرۆ:
بڕیاره ل هه‌رێما كوردستانێ هنده‌ك سه‌نته‌ر بۆ چاره‌سه‌ركرنا كه‌سێن مادیدَن بێهوشكه‌ر بكار دئینن بهێنه ڤه‌كرن و چالاكڤانه‌كێ ماددێن بێهوشكه‌ر ژی دیار كر كو رێژا كه‌سێن ماددێن بێهوشكه‌ر بكار دئینن و بازرگانیێ پێدكه‌ن زێده‌بووینه و گوت: ل هنده‌ك قوتابخانان ده‌رمانێن پزیشكی وه‌ك مادێن بێهوشكه‌ر دهێنه بكارئینان.
سه‌رمه‌ند به‌رزنجی، چالاكڤانێ مه‌ده‌نی ل دژی ماددێن بێهوشكه‌ر بۆ رۆژناما ئه‌ڤرۆ دیار كر كو چه‌ند ئه‌گه‌ره‌ك هه‌نه مرۆڤ مادێن بێهوشكه‌ر بكار بینیت ژ وانژی شێوازێ په‌روه‌رده‌كرنا زارۆكان و خرابیا ره‌وشا ئابوری و زێده‌بوونا رێژا هه‌ژاریێ، كه‌سێن تووشی ئاریشه‌یان ژی دبن زۆر جارا ماددێن بێهوشكه‌ر بكار دئینن هانده‌رێن دیژی هه‌نه مرۆڤ به‌ر ب ماددێن بێهوشكه‌ر بچیت، سالانه رێژا بكارئینان و بازرگانیا مادێن بێهوشكه‌ر زێده دبیت بۆ نموونه بتنێ ل سالا بۆری 2021ێ ئه‌و كه‌سێن ل هه‌رێما كوردستانێ هاتینه ده‌سته‌سه‌ر كرن ب تاوانا بكارئینان یانژی بازرگانیكرنێ ب ماددێن بێهوشكه‌ر زێده‌تری 1900 كه‌سان بووینه)
سه‌رمه‌ند زێده‌تر گۆت: (هه‌موو ره‌گه‌ز و ته‌مه‌ن ژی دناڤا كه‌سێن ده‌سته‌سه‌ركری هه‌بون، ئامارێن هویر ناهێنه به‌لافكرن ئه‌ڤه‌ژی ئێكه ژ ئاریشێن مه وه‌ك چالاكڤانێن دژی ماددێن بێهوشكه‌ر، چونكی ل گوره‌ی زانستێ تاوانان كه‌سێن ل سه‌ر تاوانان دهێنه ده‌سته‌سه‌ر كرن رێژه‌یا زێده‌تر ناهێنه ده‌سته‌سه‌ر كرن، مه‌ترسیه‌كا دی یا ماددێن بێهوشكه‌ر ئه‌وه نوكه سنێله ژی دهێنه ده‌سته‌سه‌ر كرن و مادێن بێهوشكه‌ر بكار دئینن، مه‌ترسیدارترین ماددێ بێهوشكه‌ر ل هه‌رێما كوردستانێ دهێته بكارئینان هێروینه، به‌لێ ئه‌ڤا زۆر ل هه‌رێما كوردستانێ دهێته بكارئینان كریستاله).
چالاكڤانێ‌َ مه‌ده‌نی گۆتژی(ل گوره‌ی قانوونا به‌رهنگاربوونا ماددێن بێهوشكه‌ر كه‌سێن مادێن بێهوشكه‌ر بكاردئینن هاتینه جودا كرن ژ كه‌سێن بازرگانیێ ب مادێن بێهوشكه‌ر دكه‌ن، ل گوره‌ی ئه‌ڤێ قانوونێ پێدڤیه ل هه‌موو پارێزگه‌هێن هه‌رێما كوردستانێ سه‌نته‌رێن چاره‌سه‌ركرنێ بۆ كه‌سێن ماددێن بێهوشكه‌ر بكار دئینن بهێنه دامه‌زراندن، به‌لێ ژبه‌ر كاودانێن هه‌رێما كوردستانێ تێدا ده‌رباز دبیت هێشتا سه‌نته‌رێن چاره‌سه‌ركرنا ماددێن بێهوشكه‌ر نه‌هاتینه ڤه‌كرن).
سه‌رمه‌ند به‌رزنجی ئاماژه بڤێ چه‌ندێ ژی كر كو كر” پێدڤیه هه‌وێن نیشتیمانی بۆ به‌رهنگاربوونا ماددێن بێهوشكه‌ر بهێنه رێڤه برن و تنێ هێزێن ئاسایشێ نه‌شێن ئه‌ركێ ده‌سته‌سه‌ركرنا كه‌سێن مادێن بێهوشكه‌ر بكاردئینن و بازرگانیێ دكه‌ن ده‌سته‌سه‌ر بكه‌ن، له‌وڕا دڤێت هه‌موو لایه‌ك پشكداربیت ل هشیاركرنا وه‌لاتیان بۆ ئاشكراكرنا زیانێن ماددێن بێهوشكه‌ر.
به‌رزنجی دا زانین كو هنده‌ك ده‌رمانێن نۆژداری ژی وه‌كی ماددێن بێهوشكه‌ر دهێنه بكارئینان، هه‌تا مه زانیاری هه‌نه ل قوتابخانه‌یێن هه‌رێما كوردستانێ حاله‌ت هه‌بووینه قوتابیان ماددێن بێهوشكه‌ر یێن پزیشكی بكارئیناینه، هه‌رچه‌نده رێگریه‌كا زۆر هه‌یه و كه‌سێن هاتینه ئاشكراكرن سه‌میانێن وان هاتینه ئاگه‌هداركرن و گۆت: (پێدڤیه وه‌زاره‌تا په‌روه‌ردێ ژی پشكدار بیت ب پرۆگرامێن خواندنێ هاریكار بیت بۆ هشیاركرنا جڤاكی ژ مه‌ترسیێن ماددێن بێهوشكه‌ر، ژبه‌ركو ماددێن بێهوشكه‌ر جه‌نگه‌كێ مه‌ترسیداره و ئه‌ركێ هه‌موو لایه‌نه‌كی یه كار بۆ به‌رهه‌نگاربوونا ئه‌ڤی جه‌نگێ مه‌ترسیدار بكه‌ت.
