بسپوره‌كێ ده‌روونی: خیانه‌ت ل رێزا ئێكێ دهێت بو ژ ئێك جودا بونا هه‌ڤژینان
هه‌ولێر، سولین سلێمان :
بسپوره‌كێ ده‌روونی بو رۆژناما ئه‌ڤرۆ دیار كر كو ل دووڤ ڤه‌كولینان رێژا به‌ردانێ دناڤبه‌را هه‌ڤژینان به‌ر ب زێده‌بونێ یه، ئه‌گه‌رێ سه‌ره‌كی یێ جودابونا هه‌ڤژینان لێك تێنه‌گه‌هشتنه و گۆت:
جیاوازیا كه‌سایه‌تیا وان ئه‌گه‌ره‌كێ دی یێ ژێك جودا بونێ یه.
لدور بابه‌تی بسپورێ ده‌روونی دكتور نه‌سره‌و مسته‌فا دیار كر كو به‌ری دو كه‌س بریارا هه‌ڤژینیێ بده‌ن زور گرنگه ب ته‌مامی د ئێكدو بگه‌هن، چونكی پتریا هه‌ڤژینان پشتی پێكئینانا ڤێ پروسێ ژێك جودا دبن زاروك ژی هه‌نه و ئه‌ڤ چه‌نده كارتێكرنه‌كا خراب ل سه‌ر زاروكی دهێلیت، چونكی گه‌له‌ك جاران زاروك باجا خه‌له‌تیا دایك و بابان دده‌ت، ژبه‌ركو ده‌مێ هه‌ڤژین ژ ئێكدو جودا دبن زاروك ژ سوز و ڤیان و دلوڤانیا ئێك ژ وان بێبه‌هر دبیت و گۆت: (ئه‌ڤجا به‌ری كچ و كور هزر ل ڤێ پروسێ بكه‌ن پێدڤیه زۆر هزرێن خوه بكه‌ن، كا هه‌تا چ راده د به‌رهه‌ڤن ڤێ به‌رپرسایه‌تیێ وه‌ربگرن).
دكتوری ئه‌و چه‌نده ژی دیار كر كو گه‌له‌ك گرنگه رێزگرتن دناڤبه‌را هه‌ردو لایه‌نادا هه‌بیت، چونكی رێزگرتن پتریا ئاریشان چاره‌سه‌ر دكه‌ت و گۆت: (خیانه‌ت ل رێزا ئێكێ دهێت بو ژ ئێك جودا بونا هه‌ڤژینان، هه‌روه‌سا سوشیال میدیا مه‌زنترین ئه‌گه‌ره بو ژ ئێك جودا بونا هه‌ڤژینان و گۆت: نها سوشیال میدیا ب رێژا %45 ئه‌گه‌ره كو هه‌ڤژین ئێكدو به‌رده‌ن.
بسپورێ ده‌روونی هنده‌ك رێیه چاره‌سه‌ری دیار كرن و دا زانین كو پێدڤیه كچ و كور ب شێوازه‌كێ باش هزرێن خوه بكه‌ن به‌ری ڤێ بریارا مه‌زن بده‌ن و هزر ل وێ چه‌ندێ بكه‌ن كو ئیدی دێ به‌رپرسیاره‌تیه‌كا مه‌زن وه‌ربگرن و هه‌ردولا دێ خێزانه‌كێ ئاڤا كه‌ن كو دڤێت رێزێ ل هه‌ڤدو بگرن و لێك تێگه‌هشتن دناڤبه‌را هه‌ردوكا دا ب شێوازه‌كێ باش هه‌بیت و گۆت: (هه‌روه‌سا هزر بكه‌ن كو پێدڤیه مالێ ئاڤه‌دان بكه‌ن و ل پاشه‌روژێ دێ بنه دایك و باب به‌رپرسیاره‌تیا وان دێ زێده‌تر لێ هێت داكو بشێن زاروكێن خوه ژی ب په‌روه‌رده‌یه‌كا باش مه‌زن بكه‌ن دوور ژ ئاریشێن خێزانی).
دكتوری گۆتژی: پێدڤیه هه‌ڤژین دانوستاندنێ و شه‌ره‌ده‌ڤا ل سه‌ر ئاریشێن خوه ل هه‌مبه‌ر زاروكی نه‌كه‌ن، به‌لكو باشتره دناڤبه‌را خوه‌دا چاره‌سه‌ر بكه‌ن، چونكی شه‌ره‌ده‌ڤا به‌رده‌وام دناڤبه‌را هه‌ڤژینان ل هه‌مبه‌ر زاروكا دبیته ئه‌گه‌رێ وێ كو ل پاشه‌روژێ كارتێكرنه‌كا خراب ل ده‌روونێ زارۆیان ببیت).
