پ.د ئیبراهیم ئه‌حمه‌د سمۆ: 100% ئه‌ز دژی سیسته‌مێ هه‌لبژارتنا مه وداخوزاێ ژ وه‌زیرێ په‌روه‌ردێ دكه‌م بهێته ڕاكرن
ئه‌ڤرۆ، سالار محه‌مه‌د دۆسكی:
سه‌رۆكێ به‌رێ یێ لژنا په‌روه‌رده و خواندنا بلند ل په‌رله‌مانێ هه‌رێما كوردستانێ ئاشكراكر، باشتره ل قوناغا په‌روه‌ردێ 75% خواندن بیت و 25 % بزاڤ ل ده‌رڤه‌ی پولێ بن و ل زانكۆیان به‌رۆڤاژی بیت، یانورماله هه‌ر پارێزگه‌هه‌كێ زانكۆیه‌كا ب رێكو پێك هه‌بیت و بتنێ هه‌ولێرێ زێده‌تر بن وه‌ك پایته‌خت.
پ.د.ئیبراهیم ئه‌حمه‌د سمۆ، سه‌رۆكێ خولا به‌رێ یێ لژنا په‌روه‌رده و خواندنا بلند ل په‌رله‌مانێ كوردستانێ، شیره‌تكارێ زانكۆیێن جیهان ل هه‌رێمێ بۆ رۆژناما ئه‌ڤرۆ گۆت: هه‌تا په‌روه‌رده‌كا ب رێكو پێك و راسته‌قینه نه‌هێته دروستكرن تو نه‌شێی زانكۆیه‌كا ساخله‌م بینیه پێش، په‌روه‌رده‌كا ساخله‌م زانكۆیه‌كا ساخله‌م دووڤ دا دهێت، مخابنی ڤه هه‌تا نوكه ئه‌م نه‌شیاینه دو هزری یا په‌روه‌رده و زانكۆیێ.
پ.د.ئیبراهیم سمۆی گۆت: هه‌كه په‌روه‌رده‌كا ساخله‌م هاته ئاڤاكرن دێ زانكۆیه‌كا ساخله‌م هێـته پێش، چونكه زانكۆ جهێ وه‌رگرتنا خوانده‌ڤانایه بۆ رێكه‌كا راست و باشتر، ده‌مێ قوتابی دچیته زانكۆیێ نه قوتابیه‌كه دێ شنوو چاڤێن خوه ڤه كه‌ت، 100% ل گه‌ل سیسته‌مێ هه‌لبژارتنان نینم ل په‌روه‌ردێ، چونكه هه‌تا ل به‌ر قوتابی دهێته ب ساناهیكرن به‌رۆڤاژی زیان ژی ب قوتابی دكه‌ڤیت، نه‌شێـت دو رێزێن دارشتنه‌كێ بنفیست و گه‌له‌ك بۆ قوتابی ب ساناهی دكه‌ڤیت و مامۆستایێن چاڤدێرێن خراب گه‌له‌ك ب ساناهی نیشا قوتابیان دده‌ن، و هه‌تا بۆ قوپیایێ ژی گه‌له‌ك ب ساناهی قوتابی دكه‌ن و گه‌له‌ك جاران قوتابیان ژ ده‌ف خوه هه‌لبژارتن داناینه و ده‌رچوویه و هاتیه زانكۆیێ، به‌رۆڤاژی ده‌مێ قوتابی ل به‌رێ سیێ ناڤنجی ته‌مام دكر و دهاته قوناغا ئاماده‌یێ شیانێن باش هه‌بوون دنڤێسینێ دا.
پ.د. ئیبراهیم ئه‌حمه‌د سمۆ، زێده‌تر گۆت: تشته‌كێ نورمال بوو زانكۆیه‌كا ب رێكو پێك ل دهۆكێ و ئێك ل سلێمانیێ و چه‌ند زانكۆ ل هه‌ولێرێ هه‌بن وه‌ك پایته‌خت، نوكه 15 زانكۆ ل سلێمانیێ و زێده‌تر ل دهۆكێ و هه‌ولێرێ هه‌نه، ئایا مه پێدڤی ب زێده‌كرنا زانكۆیانه؟، ئه‌م دێ دبێژینه قوتابیێ خوه تو ل كیش تاخی و گه‌ره‌كیێ ئه‌م دێ بووته زانكۆیه‌كێ ئینه پشت مالاته، هه‌كه زانكۆیه‌ك ل سه‌نته‌رێ باژێری بیت و قوتابی ل ده‌رڤه بهێنه وێ زانكۆیێ هه‌ر چ نه‌بیت ئه‌و قوتابی دا تاما غه‌ریبێ و ماندیبوونێ بزانن و كارتێكرنا خوه هه‌یه، مالیزیا زانكۆیێن خوه برنه سه‌ر سنوران و ل دووماهیێ ل جهێن ئه‌وان زانكۆیان باژێرێن مه‌زن هاتنه ئاڤاكرن.
شیره‌تكارێ زانكۆیێن جیهان دیاركر، كو مه‌ره‌م ژ شێوازێ هه‌لبژارتنان بۆ قوتابیان ئه‌و بوویه دا ب تسلیحكرنێ ب ساناهی بكه‌ڤن و ئامیره‌ك هه‌می كاغه‌زا ل ئێك ده‌م تسلیح بكه‌ت، باشتر بوو مامۆستا دو هه‌یڤان تسلیحكربانه نه ب لاپه‌ره‌كێ سومو و هه‌لبژارتنان قوتابی به‌رسف دابانه، دیسا ئێك ژ خالێن خوه به‌رزه‌كرنا زانكۆیان ئه‌وه قوتابیان جلكێن وه‌ك هه‌ڤ نه‌كرینێ وه‌ك ئازادی پێ هاتیه‌دان، د ناڤبه‌را ده‌ربرینا ئازادیێ دا و دیموكراسیكرنا وه‌لات برێڤه‌برنێ دا ل گه‌ل ته‌كنلوژیا سه‌قه‌تا گه‌هشتیه مه و ل گه‌ل لادانا ئه‌وان خالێن حوكمه‌تا عیراقێ ل سه‌ر دچوو كو دڤێت ئه‌و خال و برگه هه‌موو بهێنه ره‌دكرن، چونكه عیراقێ زولم و زورداری ل ملله‌تێ مه كری و ئه‌م شاش چووینه بابه‌تی و دڤیابا مه لایه‌نێ په‌روه‌رده‌ێ تێكه‌ل نه‌كربا چونكه ئه‌ڤ لایه‌نه به‌ری رژێمێن عیراقێ دروست بووین هه‌بوویه و ئه‌م رابووینه مه گه‌له‌ك قانوون ره‌دكرن، داخازێ ژ وه‌زیرێ په‌روه‌ردێ دكه‌م سیسته‌مێ هه‌لبژارتنان ره‌دبكه‌ت و پولا شه‌شێ سه‌ره‌تایی بیته ویزاری و پولا سیێ ناڤنجی بیته ویزاری، چونكه 75% قوتابخانێن مه نمرێن باش ده‌نه قوتابیان و قوتابی دێ چیته تاقیكرنا نشتیمانی بتنێ پێدڤی ب چه‌ند نمرانه و ده‌مێ چیته ئاماده‌یێ دیسا هه‌لبژارتنن و هه‌تا چیته زانكۆیێ شنوو دێ كه‌ڤیته به‌ر خواندنێ و زمانان و شرۆڤه‌كرن و تاقیگه‌ه و دروستكرنا راپورتانه و هه‌لبژاتن نینن.
ناڤبری گۆت: قوتابی ل پولا ئێكێ هه‌تا دوازدێ ئاماده‌یی دێ زمانێ دایكێ خوینت و دێ هێته زانكۆیێ زمانێ دایكێ نینه و باراپتر زمانێ ئنگلیزی و عه‌ره‌بی یه و دڤێت زانكۆ ژی ل سه‌ر مامۆستایێن خوه بكه‌نه بریار كو پرۆگرامێن خوه بكه‌نه زمانێ كوردی دا قوتابی بشێت زمانێ كوردی بخوینت.
پ.د.ئیبراهیم ئه‌حمه د سمۆ ئه‌و ژی گۆت: هه‌لسه‌نگاندنا مامۆستا مه كریه ده‌ستێ قوتابیان دا و زه‌وقێ من ل گه‌ل قوتابیان خوه‌شه و دێ نمرێن باش ده‌نه من و دێ چمه پێش، و نابیت چاره‌نڤیسێ مامۆستا بكه‌ڤیته دده‌ستێن قوتابی دا، یا گرنگه جڤاتا زانكۆیێ چه‌ند نموویێن قوتابیان وه‌ربگرن ل سه‌ر ئاستێ زانستی و ره‌وشا زانكۆیێ و ئه‌ڤ هه‌موو ئاریشه و دڤێت ل سه‌ر ب راوستین.
پ.د.ئیبراهیم ئه‌حمه‌د سمۆ زێده‌تر گۆت: ئه‌ڤ مه‌زاختیێ ل ئامیره و كاغه‌زێن سومو هاتیه مه‌زاختن بۆ ئه‌گه‌ر ب خورتی پێنوسێن بێ حوبر بكه‌ینه د به‌ریكێن قوتابیان دا و دێ مامۆستا داخازا دارشتنه‌كێ ژ قوتابیان كه‌ت نوزانن دروست بنڤیستن.
راوێژكارێ زانكۆیێن جیهان گۆت: هه‌تا ئاسته‌كێ باش ژ بیاڤێن كێمیا و فیزیا و پزیشكی رازیمه، لێ یا گرنگ ئه‌وه وه‌زیرێ خواندنا بلند بله‌ز فه‌ره‌مانه‌كێ ده‌ربكه‌ت و قوتابیێ قوناغا چارێ بۆ پرۆژێ ده‌رچوونێ نابیت بچیت ڤه‌كولینه‌كێ ل نڤێسینگه‌هه‌كێ ب 40 هزار دیناران بكریت، چاره‌سه‌ری هه‌یه و دڤێت لژنه‌ك هه‌بیت ژ سێ مامۆستا وه‌ك گه‌نگه‌شێن ماسته‌ر و دكتورایێ و هوله‌كێ دا بیت و میدیا یا به‌رهه‌ڤ بیت و هه‌ر مامۆستایه‌ك بۆ 20 خوله‌كان گه‌نگه‌شێ بكه‌ت و دڤێت زانكۆیێن كوردستانێ گرنگیێ بده‌نه پرۆژێن ده‌رچوونێ.
پ.د.ئیبراهیم ئه‌حمه‌د سمۆ زێده‌تر گۆت: گرنگه هه‌ر مامۆستایه‌كێ ماسته‌ر وه‌رگرتی ئه‌و ماسته‌ر ببیته په‌رتووك و بهێته به‌لاڤه‌كرن دا خه‌لك بزانیت كا ماسته‌را وی ل سه‌ر چ بوویه و دكتورا ب هه‌مان شێوه و پرۆفیسور ب هه‌مان شێوه و بڤی ره‌نگی دێ گه‌له‌ك تشت دیاربن، و گرنگه زانكۆ خواندنا په‌رالێل كێم بكه‌ت و هه‌كه نه‌هێلیت باشتره، دڤێت گه‌نگه‌شێن ماسته‌ر و دكتورایێ بهێنه وێنه‌كرن و په‌خشكرن و گه‌له‌ك نه‌شێن و هه‌تا مامۆستا ژی دێ خوه به‌رهه‌ڤ كه‌ت .
