د. دلین سه‌ردار:دڤێت ئه‌م نفشه‌كێ نوو یێ ئافره‌تێن سه‌ركرده ئاڤا بكه‌ین
ئه‌ڤرو، شه‌هلا رێكانی:
ماموستایه‌كا زانكویێ كو راوێژكارا قانوونیه بو روژناما ئه‌ڤرو دیار كر ئافره‌تا كورد یا گه‌هشتیه ئاسته‌كێ زورێ بلند ب هه‌بون و بوچونێن خوه‌ڤه و گۆت: مه ل جهێن بریارێ ژن هه‌نه به‌س ئه‌م بڤی ئاستی د رازی نینین، ژبه‌ركو شیانێن ئافره‌تا كورد زورن و دشێت جهێن هێشتا بلندتر وه‌ربگریت.
سه‌باره‌ت كه‌ساتیا ئافره‌تا سه‌ركرده ماموستایا زانكویێ و راوێژكارا قانوونی دكتوره دلین سه‌ردار دیار كر كو كه‌ساتیا سه‌ركرده كارتێكرنێ ل سه‌ر كومه‌كا مروڤان دكه‌ت و شیان هه‌نه ژ بو دیتنا چاره‌سه‌ریان بو ئاریشان و ئه‌نجامدانا هنده‌ك گوهورینێن بله‌ز و هاندانا كارێن پوزه‌تیڤ و كێمكرنا یێن نێگه‌تیڤ.
د. دلینێ دیار كر كو كه‌ساتیا سه‌ركرده هنده‌ك سالوخه‌تێن دیار تێدا هه‌نه ئه‌و ژی هێزه‌كا مه‌زن هه‌یه، هه‌روه‌سا كارتێكرنه‌كا زور ل سه‌ر ده‌وروبه‌رێن خوه هه‌یه و ده‌ستهه‌لات هه‌یه و ده‌ستهه‌لاتا سه‌ركرده‌ی چه‌ند پتر بیت دێ كارتێكرنا خوه پتر هه‌بیت.
راوێژكارا قانوونی دا زانین كو سه‌ركردایه‌تی دابه‌ش دبیته سه‌ر سێ ئاستا و گۆت: (ئاستێ ئێكێ سه‌ركردایه‌تیا خویه‌تی كو خوه ئاڤا كه‌ی و خودان بریار و شیان بی، ئاستێ دویێ سه‌ركردایه‌تیا دناڤبه‌را گروپی، ئه‌ڤه گرێدایه ب چاوانیا سه‌ره‌ده‌ری كرنێ و كارتێكرنێ ل سه‌ر كومه‌كا مروڤان، ئاستێ سیێ كو زور یێ گرنگه، جڤاكێ نیڤ ده‌وله‌تی و یاسایێن ده‌وله‌تان ل سه‌ر كار دكه‌ن كو ئافره‌ت ببیته سه‌ركرده و خودان بریار).
د. دلینێ دیار كر كو قانوون هه‌نه رێكێ دده‌نه ئافره‌تێ ماف هه‌بیت ل جهێن به‌رپرسیار و دانا بریارێ بیت، له‌وما جڤاك نه‌شێت رێگر بیت و ئافره‌تێ ب ره‌نگه‌كێ تایبه‌ت رولێ خوه هه‌یه و دشێت مافێن خوه ب ده‌ستڤه بینیت و گۆت: (ره‌نگه جاران جڤاك رێگر بیت به‌س خێزانێ كارتێكرنه‌كا پوزه‌تیڤ هه‌یه ژ بو كارێ ژنێ د بوارێ سه‌ركردایه‌تی دا).
دكتوره دلینێ گوتژی: (پێدڤیه ئه‌م ئافره‌تان هان بده‌ین نه‌ك به‌س كاركه‌ر بیت دڤێت ل جهێ بریارێ ژی بیت، رولێ ژنا كورد گه‌له‌ك یێ دیاره و شیانێن هه‌ین، به‌س ئه‌م پێدڤی ب بزاڤه‌كا مه‌زنین كو جڤاكی هشیارتر بكه‌ین، داكو رولێ وێ پتر به‌رچاڤ بهێته وه‌رگرتن، چونكی ئه‌م یێن د چه‌رخه‌كی دا دونیا هه‌موو یا ڤه‌كریه) .
د. دلینێ د به‌رده‌وامیا ئاخفتنێن خوه‌داگۆت: (ب دیتنا من دڤێت ئه‌م نفشه‌كێ نوو ئاڤا بكه‌ین ژ ئافره‌تێن سه‌ركرده و تێگه‌هێن سه‌ركردایه‌تیێ یێن هه‌ڤچه‌رخ نیشا وان بده‌ین و شیانێن هه‌ڤركیێ لده‌ف هه‌بن به‌رامبه‌ر هه‌ر ئاسته‌نگه‌كا دكه‌ڤیته د رێكا وێ دا و باوه‌ری بخو هه‌بیت د دانا بریارێ دا).
د. دلینێ ئاماژه بڤێ چه‌ندێ ژی كر كو دڤێت ئه‌م ره‌وشه‌نبیریا جێنده‌ری به‌لاڤه بكه‌ین و وه‌كهه‌ڤیێ د شیانادا بێخینه دناڤبه‌را ره‌گه‌زێ نێر و مێ، ئه‌ڤجا پێدڤیه ئه‌م هنده‌ك تێگه‌ها به‌لاڤه بكه‌ین كو ئه‌ڤ ره‌وشه‌نبیریه د جڤاكی دا به‌لاڤه ببیت، هه‌روه‌سا دڤێت ل زانكو و په‌یمانگه‌هان و قوتابخانا ئه‌ڤ تێگه‌هه به‌لاڤه ببیت كو پوست و جهێن گرنگ یێن سه‌ركردایه‌تیێ به‌س بو ره‌گه‌زێ نێر نینن و گۆت: (به‌لكو دڤێت ژن ژی به‌ره‌ڤانیێ ژ مافێ خوه بكه‌ت ژ بو وه‌رگرتنا جهێ بریارێ و ببیته كه‌سایه‌تیه‌كا سه‌ركرده كارتێكرنه‌كا زور هه‌بیت ل سه‌ر خێزانا خوه و جڤاكی و ئه‌و گروپێ ل گه‌ل كار دكه‌ت).
د. دلین سه‌ردار راوێژكارا قانوونی ئه‌و چه‌نده ژی دیار كر كو پێدڤیه ئافره‌ت بشێت به‌رپرساتیێ راكه‌ت، ژبه‌ركو كه‌ساتیا سه‌ركرده نه هندا ب ساناهیه، چونكی هه‌تا مروڤ ژ ئاسته‌كێ كرێكاری بهێته بهێته جهێ بریارێ دڤێت گه‌له‌ك شیان هه‌بن و گۆت: (وه‌ك باوه‌ری بخوه بون و هه‌ست كرن ب به‌رپرساتیێ بو گوهورانكاریێ هه‌روه‌سا دڤێت بابه‌تێ كارتێكرنێ ژن لده‌ف خوه ئاڤا بكه‌ت).
