بوردومانكرنا گوندان بوویه ئه‌گه‌ر گه‌نج قه‌ستا ده‌رڤه‌ی وه‌لاتی بكه‌ن
ئه‌ڤرۆ، هه‌رهین محه‌مه‌د:
گوندێن ده‌وروبه‌ر به‌رده‌وام ژلایێ په‌كه‌كێ ڤه دهێنه بۆردومانكرن و زیانێن مادی و گیانی ل دووڤ خوه دهێلن و ئه‌ڤ چه‌نده ژی بوویه ئه‌گه‌ر ترس و بێ هیڤی بوون ل ده‌ڤ خه‌لكێ گوندان په‌یدابیت و گوندێن خوه بهێلن و قه‌ستا باژێران بكه‌ن و هه‌ردیسان ته‌خا گه‌نجان ژی قه‌ستا وه‌لاتێن بیانی بكه‌ن ژبۆ ده‌ستپێكه‌كا ژیانه‌كا بێ ترس و گه‌ف.
گه‌نجه‌ك بناڤێ (ئه‌حمه‌د ره‌شید محه‌مه‌د) گه‌نجه‌كێ سیه و سێ سالیه و خه‌لكێ گوندێ هرۆرێ یه و نوكه ل ئه‌لمانیا دژیت گۆت: ده‌مێ ئه‌م گوندێ هرۆرێ من كارێ سه‌رتراشیێ كروهه‌ردیسان خودان ره‌زو بیستان و ته‌رش و كه‌وال بووین و مه ژیانا خوه ب خوشی دبوراند، به‌لێ پشتی گوند چه‌ندین جارا هاتیه بوردومانكرن و گه‌له‌ك زه‌ره و زیان گه‌هشتینه خه‌لكی من بریار دا گوندی بهێلم، چونكو په‌كه‌كێ گه‌له‌ك جارا بۆ مه گه‌نجان نه‌خوه‌ش دكر ئه‌وێن ده‌وار هه‌ین كه‌ل و په‌لێن وان بۆ ب گه‌هینه جهێن وان دڤێت و هه‌كه گه‌نجان بۆ وان نه‌كربا بۆ وان نه‌خوش كر و هه‌كه گه‌نجان ژی هاریكاریا وان كربا ژ ترسا بوو دا كو چل وان نه‌كه‌ن دبیت ژلایێ حكومه‌تێ ڤه هاتبا تومه‌دباركرن و گرتن، له‌ورا من بریاردا قه‌ستا ده‌رڤه‌ی وه‌لاتی بكه‌م دا كو ژ وێ نه‌خوشیێ رزگاربم و پشتی من گوند هێلای و چوویمه ده‌رڤه مالا من ژی گۆند هێلا، چونكو گه‌له‌ك بۆ وان ژی نه‌خوشدكرو پرسیارا گه‌نجان دكر و وان ئه‌م دنیاسین، چونكو وه‌كو كریكارا كار ب مه دكر و ژیانا مه گه‌نجان گه‌له‌ك یا نه‌خوش بۆ گه‌له‌ك جاران مه خوه گه‌هاندیه جهێن به‌رپرس، به‌لێ چو بۆ مه نه‌هاته كرن و نه‌بتنێ گوندێ هرۆرێ دهاته بوردومانكرن، به‌لكو شێلادزێ و ئامێدیێ و نێروه و رێكان و گه‌له‌ك گوندێن دی و ل هاتینه چول كرن و ژیان لێ نه‌مایه و ئه‌و گوندێن نوكه كێم مال ژی تێدا نه‌شێن ل باژێران بژین، له‌ورا یێن ماین، به‌لێ پتریا گه‌نجێن وان قه‌ستا ده‌رڤه‌ی وه‌لاتی كریه.
ژلایێ ده‌رۆنی ڤه نه‌جمه‌دین زێباری دبێژیت: ب شێوه‌كێ گشتی گه‌له‌ك ئه‌گه‌ر هه‌نه ژبۆ كوچكرنا گه‌نجان وه‌كو بێكاری و حه‌زو ڤیانا ده‌رڤه و نه‌چاری و بوردومانكرنا گوندن و هتد.. و ده‌رباره‌ی بابه‌تی ژی راسته ل ڤێ دووماهیێ گه‌له‌ك ده‌ڤه‌رێن چیایی هاتنه بوردومانكرن و گه‌نجێن مه ژی حه‌زو ڤیانا چیایان هه‌یه ژبۆ گه‌شتان و ئینانا گژو گیایی، به‌لێ دبینن رۆژانه هه‌ڤالێن وان یێن دهێنه كوشتن ب رێكا بردومانكرنا فرۆكان ئه‌ڤه ژی بوویه ئه‌گه‌ره‌ك وه‌لاتێ خوه بهێلن و قه‌ستا ژده‌رڤه‌ی وه‌لاتی بكه‌ن ژ ترسادا و ئه‌ڤ چه‌نده وه‌دكه‌ن قه‌یران ب سه‌ر وان دا ده‌ستپێبكه‌ت زێده‌تر گۆت: ئه‌ڤ جورێ كوچكرنێ بێ ئومێدیێ و دودلیێ و ترس دكه‌ڤیته دناڤ ملله‌تێ مه‌دا و كو هه‌ست بێ هیڤی بوونێ و ده‌ستهه‌لاتیێ بكه‌ن وێ هزرێ دكه‌ن هه‌رتشته‌كێ وان هه‌ی ب جاره‌كێ ژده‌ستێ وی بچیت وهه‌روه‌سا گه‌نج ژی هزردكه‌ن ئه‌م هه‌رێمه‌كین و ده‌وروبه‌رێن مه هه‌موو دوژمنن و نه‌شێن خوه ب پارێزین و هه‌رگاڤه‌كا وان ڤیا دشێن بهێنه سه‌رسه‌رێ مه و ئه‌ڤ چه‌نده‌ژی كارتێكرنا خوه یا ده‌رونی و جڤاكی هه‌یه.
