پشتی 22 سالا بازارێ چه‌لێ هاته خرابكرن
دهۆك، نه‌وزاد هلۆری:
بازارێ چه‌لێ كو دناڤ خه‌لكی پتر ب سیكا چه‌لێ دهێته نیاسین، ئێك ژ وان بازارێن كه‌ڤنارێن دهۆكێ یه و 22 ساله هاتیه چێكرن، به‌لێ ل شوونا بهێته نووژه‌نكرن، هاته خرابكرن و هاته ڤه‌گوهاستن بۆ نێزیكێ سینه‌ما نه‌ورۆز.
سه‌فه‌ر دێره‌شی ئێك ژ وان خودان بازارێن چه‌لێ یه بۆ ئه‌ڤرۆ گۆت: (ئه‌ڤه 22 ساله بازارێ چه‌لێ كو ب سیكا چه‌لێ دهێته نیاسین هاتیه دانان و تایبه‌ته ب فروتنا په‌روك و جلوبه‌رگێن بالا و كه‌ڤن و نوێ، به‌لێ ب لێبورین ڤه د نوكه دا هاته خرابكرن و ل شوونا وێ دێ بیته تاوه‌ر، هه‌ر چه‌نده خودان ئازاده بكه‌ته چ تشت، به‌لێ ژ به‌ر كو بازارێ چه‌لێ كه‌ڤناره و بوویه ناسنامه‌یه‌ك بۆ دهۆكێ، ئه‌گه‌ر به‌رده‌وام بایه باشتر بوو، ژ به‌ركو خه‌لك ل ڤێره ب بازارێ چه‌لێ دنیاسین، زێده‌باری كو نێزیكێ هزار كه‌س ل سه‌ر ڤان بازاران دژین، له‌وا ئه‌گه‌ر مابایه باشتر بوو ب تایبه‌تی بۆ خودان بازارێن ل ڤێره كار دكه‌ن).
كوڤان ئه‌حمه‌د، ئه‌و ژی ئێك ژ خودان بازارێن دی یه ل بازارێ چه‌لێ بۆ ئه‌ڤرۆ گۆت: (بازارێ چه‌لێ ب ئێكجاری هاته خرابكرن و خودان دێ بۆ پرۆژه‌كێ دن بكارئینیت، زیاندارێن بازارێ چه‌لێ ب پله ئێك ئه‌مین پاشی خه‌لك، ژ به‌ر كو بازاره‌كێ ناسیار و كه‌ڤناره، ئه‌و جهێ نوكه هاتیه چێكرن هه‌تا دهێته نیساین ده‌م پێ دڤێت).
خودان بازاره‌كێ دی ل بازارێ چه‌لێ بناڤێ ره‌مه‌زان سپینداری ئه‌و دبێژیت: (هه‌ر چه‌نده مانا بازارێ چه‌لێ زور گرنگ و باشتر بوو، به‌لێ ئه‌و جهێ نوكه بازارێ چه‌لێ بۆ هاتیه ڤه‌گوهاستن خراب نیه و ئه‌و ژی باشه، ژ به‌ر كو جهه‌كێ به‌رفره‌هه و دكه‌ڤیته به‌رامبه‌ر سه‌رداڤا فێقی و نێزیكێ سینه‌ما نه‌ورۆز كو دهێته نیاسین ب نه‌ورۆز سه‌نته‌ر، دڤێت جاره‌كا دی ئه‌ڤ جهه ب بازارێ چه‌لێ بهێته نیاسین، دا كو بهایێ خوه ژ ده‌ست نه‌ده‌ت، ئه‌ڤ بازاره دێ هه‌ر یێ تایبه‌ت بیت ب فروتنا جلوبه‌رگێن بالا و كه‌ڤن و نوێ).
