ڤه‌كۆله‌ره‌كێ جڤاكی:كچه مودێلێن تورێن جڤاكی كارتێكرن ل سه‌ر زه‌لامان هه‌یه
ئه‌ڤرۆ، هه‌رهین محه‌مه‌د:
زور جاران د تورێن جڤاكی دا دبینین كو كچه مودێل گرنگیه‌كا ئێكجار مه‌زن ب خوه دده‌ن، ژبلی ڤێ چه‌ندێ ئه‌و كه‌ره‌ستێن خانم بۆ جوانكاریێ بكاردئینن نیشان دده‌ن، ئه‌ڤجا چ بۆ ریكلام كرنێ بیت، یان ژی مه‌ره‌م ئه‌و بیت كو هه‌موو ئافره‌ت چاڤ ل وێ بكه‌ن و خوه جوان بكه‌ن.
زه‌ینه‌ب ئه‌حمه‌د، كچه‌كا رۆژنامه‌ڤانه دیار كر كو هه‌ر ژ كه‌ڤندا ئافره‌تانت گه‌له‌ك گرنگی ب جوانیێ دا و ئافره‌ت حه‌ز دكه‌ن روخسار و به‌ژنه‌كا جوان و سه‌رنجراكیش هه‌بیت و گۆت: (به‌لێ نوكه د سوشیال میدیایێ دا كچه مودێل هه‌نه و ئه‌وان پتر شاره‌زایی بۆ كه‌ره‌ستێن جوانكاریێ هه‌یه و رێكێن پاراستنا جوانیێ ژی بكاردئینن و گه‌له‌ك ئافره‌تێن مه ژی چاڤ ل وان كه‌سایه‌تێن د سوشیال میدیایێ دا ده‌ردكه‌ڤن دكه‌ن).
زه‌ینه‌بێ گۆتژی: (ل ڤی سه‌رده‌می مرۆڤ دشێت ب رێكا موبایلێ جوانترین ئافره‌تا جیهانێ بینیت و حه‌ز دكه‌ت وه‌كو وان جوان و سه‌رنجراكێش ده‌ركه‌ڤیت و ئه‌ڤه سرۆشتێ مرۆڤایه ل دووڤ جوانیێ دگه‌رن و حه‌ز دكه‌ن ب جوانترین شێواز دیار بیت، ئه‌ڤجا ژبه‌ر كه‌سانێن سوشیال میدیایێ بیت یان بۆ ده‌روونی خوه و هه‌ڤژینێ خوه بیت).
موسا جه‌عفه‌ر، رێڤه‌به‌رێ قوتابخانا پاسێ دیار كر كو ئافره‌ت گرنگیێ دده‌ته پاقژیێ و جلوبه‌رگێن خۆه و سه‌ره‌نجا خه‌لكی بو خوه رادكێشیت و پتر حه‌زژێكه‌را ل خوه كوم دكه‌ت و دبیته هێما و سومبول بۆ ده‌ورۆبه‌رێن خوه و گۆت: (بدیتنا من جوداهیه‌كا مه‌زن هه‌یه دناڤبه‌را ئافره‌تا مالێ و ئافره‌تا سپورت كو دناڤ تورێن جڤاكی دا گه‌له‌ك دیارن و ئه‌و بتنێ گرنگیێ دده‌نه پاقژی و سه‌روبه‌رێ خوه و كه‌ره‌ستێن جوانكاریێ د تورێن جڤاكی دا نیشا دده‌ن داكو وان كه‌ره‌ستان ب فرۆشن و دیسان ئه‌و كه‌سێن گرنگیێ ب جوانی و سه‌روبه‌رێ خوه نه‌ده‌ن ئه‌و ژی چاڤ ل وان بكه‌ن و خوه جوان بكه‌ن، چونكی زه‌لامی دڤێت هه‌رده‌م ژنه‌كا جوان و بالكێش ب ره‌خڤه بیت).
ڤه‌كوله‌رێ جڤاكی ره‌مه‌زان ئیسماعیل دیار كر كو د شه‌ریعه‌تی دا یا فه‌ره ل سه‌ر ئافره‌تێ خوه جوان و پاقژ بكه‌ت به‌ری هه‌ڤژینێ وێ بهێته مال، ژبه‌ركو گه‌له‌ك كه‌یفا زه‌لامی دهێت ده‌مێ ژ كاری دزڤریته مال و دبینیت هه‌ڤژینا وی خوه بو وی جوان كریه.
ڤه‌كۆله‌رێ جڤاكی د به‌رده‌وامیا ئاخفتنا خوه‌دا گۆت: (سوشیال میدیایێ و كچه مودێلا كارتێكرنا خوه ل سه‌ر زه‌لامان هه‌یه، ب حوكمێ هندێ كو ل سوشیال میدیایێ هه‌موو كه‌س ڤان كچێن مودێل دبینن و زه‌لام حه‌ز دكه‌ن هه‌ڤژینا وی ژی وه‌كو وێ ئافره‌تێ بیت یا كو دتورێن جڤاكی دا خوه جوان و پاقژ دكه‌ت).
