تایبه‌تمه‌نده‌كێ په‌روه‌ردا زاروكان:دایك و باب هه‌ردو به‌رپرسیارن ژ د په‌روه‌رده‌كرنا زارۆكان
ئاواز یوسف جمیل
تایبه‌تمه‌نده‌كێ په‌روه‌ردا زاروكان بو ئه‌ڤرۆ دیار كر كو زارۆك بالنده‌كێ دو چه‌نگه چه‌نگێ راستێ دایك نوینه‌راتیێ دكه‌تن و چه‌نگێ چه‌پێ باب نوینه‌راتنێ دكه‌ت و هه‌ر ده‌ما ئێك ژ وان رۆلێ خوه ب دروستی نه‌دیت ئه‌و بالنده دێ مینیته ب چه‌نگه‌كی بتنێ.
له‌زگین دوسكی تایبه‌تمه‌ند د بوارێ په‌روه‌ردا زارۆكان دا سه‌باره‌ت رۆلێ بابێ د په‌ره‌رده‌كرنا زارۆكان دا دیار كر كو ل دووڤ ڤه‌كولینێن زانستی پێدڤیه خودانكرنا زارۆكان ل ده‌ڤ دایك و بابان یا وه‌كهه‌ڤ بیت و زارۆك د ژینگه‌هه‌كا ئارام دا بهێته په‌روه‌رده كرن وه‌كی بالنده‌كێ دو چه‌نگ و چه‌نگێ راستێ دایك نوینه‌راتیێ دكه‌تن و چه‌نگێ چه‌پێ باب نوینه‌راتیێ دكه‌ت و گۆت: (ئانكو هه‌ر ده‌ما ئێك ژ وان ب درستی رولێ خوه نه‌بینیتن ئه‌و بالنده دێ مینیته ب چه‌نگه‌كی و نه‌شێت بفریتن، ژبه‌ركو رۆلێ هه‌ر ئیك ژ وان یێ جودایه زێده‌باری هندێ كو رۆلێ دایكێ یێ گرێدایه ب پاقژی و خوارنێ و حه‌ژێكرن و ڤیانێ و رۆلێ بابێ گرێدایه ب زه‌لامینیێ و وێره‌كیێ).
دوسكی ئه‌و چه‌نده ژی دیار كر كو هه‌ر ل ده‌ستپێكا هه‌ڤژینیێ رێكه‌ڤتنه‌كا نه نڤیسی و نه ئاشكرا یا دناڤبه‌را هه‌ڤژینان دا هه‌ی و ئه‌و رێكه‌ڤتنامه دبێژیتن دێ زه‌لام كارێن ژ ده‌رڤه كه‌تن و پارا په‌یداكه‌تن و ژن دێ ب رولێ په‌روه‌رده‌كرنا زاروكان و كارێن ناڤ مالێ رابیتن، و ئه‌ڤ رێكه‌ڤتناما نه یا دروست یاخه‌له‌ت ده‌مێ سێ چار سالێن ده‌سپێكێ دچن و دو سێ زارۆك دهێن ل وی ده‌می ژن نه‌شێت ڤی بارێ مه‌زن راكه‌تن دێ هه‌وارا خوه گه‌هینیته زه‌لامی داكو هاریكاریا وێ بكه‌تن ل وی ده‌می بۆ زه‌لامی ژی یا غه‌ریبه، چونكی خوه نه فێر كریه په‌روه‌رده‌كرنا زارۆكان و ل وی ده‌می ئاریشه دناڤبه‌را هه‌ڤژینان دا په‌یدا دبن ژ ئه‌گه‌رێ ڤیً رێكه‌فتناما خه‌له‌ت و بتنێ زارۆك دبیته قوربانیێ ڤێ په‌روه‌ردێ.
تایبه‌تمه‌ندێ بوارێ په‌روه‌ردا زارۆكان گۆتژی (پێدڤیه باب ده‌مه‌كێ پری حه‌ژێكرن و ڤیان بۆ زارۆكێ خوه ته‌رخان بكه‌تن و په‌روه‌رده‌كرنا زارۆكێ وان و دبیته مه‌زنترین وه‌به‌رهێنان كو باب د ژیانا خوه دا ئه‌نجام دده‌ت).
دوسكی ئاماژه پێ كر كو هنده‌ك باب یێن هه‌ین هه‌تا هه‌كه ل مال ژی بن ده‌مێ خوه ب یاریكرنێ ڤه ل گه‌ل زارۆكێ خوه نابورینیت ل ڤێرێ دێ بیته بابه‌كێ خائین و گۆت: (دڤێت باب ده‌ه خوله‌كان ده‌مێ خوه ته‌رخان بكه‌ت بۆ زارۆكێ خوه و یاریان ل گه‌ل بكه‌ت، ژبه‌ركو هه‌كه باب یاریان ل گه‌ل زارۆكێن خوه بكه‌ت ئه‌و زارۆكه دهێته پاراستن ژ نه‌خوشێن ده‌روونی، چونكی زارۆكی یاریێن بها گران نه‌ڤێن به‌لكو بتنێ یاریه‌كا ساده دڤێت كو بابێ وی ل گه‌لدا بیتن و یاریكرن ل گه‌ل زارۆكی ئێكه ژ رێكێن هه‌ره سه‌ره‌كی د په‌روه‌رده‌كرنه‌كا سه‌ركه‌ڤتی دا، هه‌روه‌سا دڤێت باب روژانه بۆ ده‌مێ پێنچ خوله‌كان گوهداریا زارۆكێن خوه بكه‌تن).
له‌زگین ئه‌وچه‌نده ژی دیاركر كو ئه‌وا زارۆكی ژ دایك و بابێ خوه وه‌ردگرتی ره‌نگڤه‌دانا وێ ل سه‌ر زارۆكی دیار دبیتن و ده‌مێ زاروك دبینن باب یێ توره‌یه د مالدا زارۆك ژی وه‌كی بابێ خوه ره‌فتاران ب توره‌یی دكه‌تن و گۆت: (لێ به‌رۆڤاژی هه‌كه باب یێ ئارام و بهێنفره‌ه بیتن د په‌روه‌رده‌كرنا زارۆكێ خوه داو ده‌مێ خوه ل گه‌ل زارۆكێ خوه ببورینیت هینگێ دێ زارۆكه‌كێ سه‌ركه‌فتی درۆست بیتن).
