رێژا توند و تیژیێ ل سه‌ر ئافره‌تێ و خێزانێ كێمبوویه
دهۆك، له‌زگین جوقی
” ئه‌ڤ ساله د ماوێ 10 هه‌یڤاندا سێ هزار و 762 سكالا یێن هاتینه تۆماركرن”
رێڤه‌به‌رێ به‌رهه‌نگاریا توند و تیژیێ دژی ئافره‌ت و خێزانێ ل پارێزگه‌ها دهۆكێ دیار كر:” رێژا توند و تیژیێ ل دهۆكێ گه‌له‌ك كێمبوویه، پتر ره‌وشه‌نبیری بۆ ئافره‌تێ په‌یدابوویه و ب رێیێن یاسایی دخوازا مافێن خۆ دكه‌ن و گۆت: ئه‌ڤ ساله د ماوێ 10 هه‌یڤێن بۆریدا سێ هزار و 762 سكالایێن توند و تیژیێ یێن هاتینه تۆماركرن و پتریا وان یێن هاتینه چاره‌سه‌ركرن”.
عه‌قیدی مافپه‌روه‌ر، ئارام محه‌مه‌د رێڤه‌به‌رێ به‌رهه‌نگاریا توند و تیژیێ دژی ئافره‌ت و خێزان ل پارێزگه‌ها دهۆكێ بۆ ئه‌ڤرۆ دیار كر: “ل سه‌رانسه‌ری پارێزگه‌ها دهۆكێ رێژا توند و تیژیێ ل سه‌ر ئافره‌تی و خێزانێ كێمتر لێهاتیه به‌رامبه‌ر سالێن بۆریدا، بۆ نموونه رێژا خۆكوشتنێ و كوشتنێ و ده‌ستدرێژیا سكسی هه‌موو كێمبووینه.
زێده‌تر گۆت: رێژا سكالایان ده‌مێ زێده‌دبیت رامانا وێ ئه‌و نینه توند و تیژیێ ل سه‌ر ئافره‌تی زێده‌بوویه، به‌لكو ره‌وشه‌نبیری بۆ ئافره‌تێ په‌یدابوویه و ئافره‌ت ب رێیێن ئاسایی داخوازا مافێن خۆ دكه‌ن. ئه‌ڤه ڤه‌دگه‌ریت بۆ ره‌وشه‌نبیریا خه‌لكی و یاسایا به‌رهه‌نگاریا توند و تیژیێ دژی ئافره‌تێ و ڤه‌كرنا نڤیسنگه‌هێن توند و تیژیێ و ڤه‌كرنا سه‌نته‌رێن راوێژكاریا خێزانی و هه‌موو هه‌ولا دده‌ن ژێكڤه‌بوون دناڤبه‌را خێزاناندا دروست نه‌بیت.
ئاشكه‌را كر، جیاوازیا ژی ل ده‌ڤ مه نینه، هنده‌ك كه‌س دبن 18 سالیێ دانه و تووشی توند و تیژیێ دبن، هنده‌ك ژی ژیێ وان گه‌هشتیه هه‌تا 60 سالیێ تووشی توند و تیژیێ دبن ب تایبه‌تی ژی ئافره‌ت، توند و تیژی به‌رامبه‌ر دهێته كرن و هنده‌ك جاران زارۆك به‌رامبه‌ر دایكا خۆ توند و تیژیێ دكه‌ن و حاله‌ت ژی هه‌نه زه‌لام دگه‌ل هه‌ڤژینا خۆ توند و تیژیێ ئه‌نجام ده‌ت، هه‌روه‌سا ژی حاله‌ت هه‌نه برا و باب و كه‌س و كارێن ئافره‌تی توند و تیژیێ به‌رامبه‌ر ئافره‌تێ ئه‌نجام ده‌ن “.
عه‌قیدی مافپه‌روه‌ر، ئارام محه‌مه‌د:” توند و تیژیا به‌ربه‌لاڤ نوكه خراب بكارئینانا سوشیال میدیایێ یه، ئه‌ڤه دبیته ئه‌گه‌ر گه‌له‌ك جاران ئافره‌ت یان كچ هزرا خۆ كوشتنێ بكه‌ت، ده‌مێ نه‌زانیت رێیا دروست چییه، ئه‌و ئافره‌ت و كچێن رێیێن یاسایی هه‌لدبژێرن دهێنه پاراستن، چونكو یاسا مافی وان دپارێزیت، ئه‌و هزرا خوكوشتنێ نامینیت د سه‌ری دا. ده‌مێ هزر دكه‌ت دێ خۆ كوژیت و كه‌سه‌ك هه‌بیت پشته‌ڤانیێ لێ بكه‌ت و رێیا دروست نیشا ئافره‌ت و كچێ بكه‌ت، ئه‌و هزرا خوكوشتنێ نامینیت ده‌ڤ ل عه‌شیره‌تگه‌ری گه‌له‌ك پشته‌ڤانه دگه‌ل مه‌دا ب كێمكرنا توند و تیژیێ”.
عه‌قیدی مافپه‌روه‌ر ئارام محه‌مه‌د، گۆت ژی: بێگومان هاتنا ئاواره و په‌نابه‌ران نه رێژا توند و تیژیێ زێده‌كریه، به‌لكو ل كه‌مپان ژی ئه‌م ب به‌رهه‌نگاریا توند و تیژیێ كار دكه‌ین، تیمێن موبایل هاتینه دروستكرن و سه‌ره‌دانا كه‌مپان دكه‌ن بۆ هاریكاریا وان خێزانان یێن تووشی توند و تیژیێ دبن ژلایێ كه‌س و كارێن خۆ ڤه”.
