شاره‌زايه‌كێ له‌شكرى: بێ چه‌كێ گران و پێشكه‌فتى پێشمه‌رگه پشكدارى ئازادكرنا مووسل نابيت
ئه‌ڤرۆ نيوز:
فه‌رمانده‌كێ هێزێن پێشمه‌رگه‌يى راگه‌هاند كو چه‌كدارێن داعش ده‌ست ب لێدانا خه‌نده‌كان كريه ل ده‌ڤه‌را خازرى ژ ترسا پێشڤه‌چوونا هێزێن پێشمه‌رگه‌يى ل ده‌ڤه‌رێ، به‌رپرسه‌كێ ل وه‌زاره‌تا پێشمه‌رگه‌يى ژى رادگه‌هينيت كو هه‌كه چه‌كێ گران ب كوردان نه‌هێته دان پشكداريێ د ئازادكرنا مووسل دا ناكه‌ن.
عه‌ميد سه‌يد هه‌ژار جێگرێ هێزێن بژاره يێن زێره‌ڤانى ل ده‌ڤه‌را خازر يا نێزيك مووسل بۆ شه‌رقولئه‌وسه‌ت راگه‌هاند كو چه‌كدارێن داعش ب ره‌نگه‌كێ به‌رده‌وام ل ده‌ڤه‌را وان خه‌نده‌كان لێ دده‌ن، به‌لێ ئه‌و رێ ناده‌ن وى كارى بكه‌ن و ب مووشه‌ك و تۆپان رێگريێ لێ دكه‌ن و گۆت: “ئه‌و وه‌سان هزر دكه‌ن ب كولانا وان خه‌نده‌كان دێ رێگريێ ل پێشڤه‌چوونێن مه كه‌ن، به‌لێ چو تشتێ رێگريێ ل پێشمه‌رگه‌يى ناكه‌ن هه‌مبه‌ر پێشڤه‌چووێن وان”.
ژ لايه‌كێ دى ڤه ليوا سه‌لاح فه‌يلى شاره‌زايێ له‌شكرى ل وه‌زاره‌تا پێشمه‌رگه‌يى بۆ شه‌رقوئله‌وسه‌ت گۆت: “پێدڤيێن له‌شكرى ل هه‌رێما كوردستانێ به‌رهه‌ڤ نه‌بوونه كو هێرشێ بكه‌نه سه‌ر چه‌كدارێن داعش ل مووسل و له‌شكرێ عيراقى بۆ ڤێ چه‌ندێ نه‌يێ به‌رهه‌ڤه”.
ئاماژه ب وێ چه‌ندێ ژى كر كو ئه‌و باوه‌ر ناكه‌ت بێى وه‌رگرتنا چه‌ك و پێدڤيێن له‌شكرى يێن پێشكه‌فتى، پێشمه‌رگه پشكداريێ د ئازادكرنا مووسل دا بكه‌ت.
